Otandyq endaýmentter forýmy

Resmı derekterge súıensek, elimiz­degi joǵary oqý oryndarynyń janynan qurylǵan on shaqty endaýment bar. Endaýment uıymnyń turaqty damýy men bolashaqqa uzaq merzimdi ınvestısııalaý quraldarynyń birine jatady.

Ýnıversıtetter janynan quryl­ǵan endaýmentter ókilderi I Qazaqs­tan­nyń Endaýmentteri forýmynda júz­des­ti. Eýrazııa ulttyq ýnıversıteti muryndyq bolýymen ótkizilgen forým maqsatty ka­pıtaldy qalyptastyrý men da­my­tý­dyń ózekti máselelerin talqy­laý, endaýmentterdi basqarý boıynsha ozyq tá­jirıbe almasý úshin biryńǵaı alań qurý maqsatynda uıymdastyryldy.

Forým jumysyn ashqan Bilim jáne ǵylym vıse-mınıstri Qýanysh Erǵalıev endaýment qorlarynyń múmkindikterine toqtaldy. «Mundaı forýmdy ótkizý óte ýaqtyly jáne ózekti. Endaýment qoryn qurý – bilim berý úrdisine ınnovasııalardy engizýdiń mańyzdy quraldarynyń biri. Bul joǵary oqý oryndarynyń damýyna, stýdentterdi qoldaýǵa, zertteý qyzmetin ilgeriletýge yqpal etedi. Men bul bastamany qoldaımyn», dedi ol.

Is-shara barysynda MMHQI, QazUÝ, Ulttyq kardıohırýrgııa orta­ly­ǵynyń «Júrek ortalyǵy», KAZGIýÝ, Nazarbaev Ýnıversıtetiniń «Áleýmettik damý qory», t.b. ókilderi sóz sóıledi.

Forýmda L.N.Gýmılev atyndaǵy Eýra­zııa ulttyq ýnıversıtetiniń túlek­teri qurǵan ENU Endowment Fund tanys­tyryldy. Tanystyrylymda sóz alǵan L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov ýnıversıtet túlekteriniń áleý­met­tik jaýap­kershiligi joǵary eke­nin jet­kizdi.

 «Bizdiń túlekter ENU Endowment Fund qurýǵa bastamashy boldy. Ýnıversıtetimizde endaýment tájirıbesi júzjyldyqtarmen ólshenetin úzdik álem­dik joǵary oqý oryndarynyń úlgi­si boıynsha maqsatty kapıtal qo­ry­nyń qurylýy – buryn-sońdy bol­maǵan oqıǵa. Jaqyn arada qordyń tabysy daryndy stýdentterge jáne olardyń ınnovasııalyq jobalaryna qarjylyq qoldaý kórsetýge múmkindik beretinine senimdimin. Osylaısha, tú­lek­ter ózderiniń bilim alǵan JOO-nyń ómirine belsene aralasyp, adam áleýe­tin damytýǵa ǵana emes, búkil eldiń bola­sha­ǵyna da úles qosady», dedi rektor.

ENU Endowment Fund dırektory Dınara Musabalına qordy jáne veb-saıtty https://endowmentenu.kz/ tanys­tyrý barysynda maqsatty kapıtalǵa qol suǵylmaıtynyn jáne jınaqtaý sıpaty bar ekenin atap ótti. Odan tús­ken ınvestısııalyq tabys esebinen ǵana jobalardy qarjylandyrýdy júzege asyrý josparlanǵan. EUÝ-dyń quryltaıshy-túlekteri muqtaj stýdentterge granttar men stıpendııa­lar taǵaıyndaý arqyly qoldaý kórsetýdi, bilim alýshylardyń ǵylymı-ınnovasııalyq jáne kásipkerlik qyzmetine járdemdesýdi jáne talantty jastarǵa qolǵabys etýdi kózdep otyr.

Qorǵa alǵashqy jarnany 10 mln teńge kóleminde ENU Endowment Fund quryl­taı­shylarynyń biri ári JOO túlegi Dmıtrıı Inıýtın quıdy. Ol bolashaq urpaq ǵylymmen aınalysady dep úmittenedi. «Osy ýnıversıtette alǵan bilim men daǵdylar kóptegen ómirlik qıyndyqty jeńýge kómektesti. Búgingi jetistikterimde bilimniń úlesi bar. О́zim­niń ýnıversıtetime, onyń ishinde jańa tehnologııalar dáýirinde bilimge qush­tar stýdentterge kómektesý tárizdi jaýapty is-áreketterdiń ýaqyty keldi. Endaýment – qıyn-qystaý kezeńderde ýnıversıtetterdiń turaqtylyǵyn saq­taý men nyǵaıtýdyń tıimdi tetigi. Osy qor­dyń qoldaýymen bizdiń bolashaq urpaqtarymyz ǵylymmen aınalysady», dep atap ótti D.Inıýtın.