Konferensııada oblys ákiminiń, ýnıversıtet basshylyǵynyń quttyqtaý hattary oqyldy. Baıandamashylar arasynan alǵashqy sózdi Almatydaǵy Sábıt Muqanov pen Ǵabıt Músirepovtiń memlekettik ádebı-memorıaldyq murajaı kesheniniń dırektory, fılologııa ǵylymdarynyń kandıdaty Ádilǵazy Qaıyrbekov aldy. «Sóz zergeriniń mýzeıdegi murasy» degen taqyrypta baıandama jasaǵan ol Ǵ.Músirepov eńbekteriniń jınaqtalýy men aldaǵy ýaqytta atqarylar ister týraly aıtty. Sonyń ishinde «Ǵabıt Músirepov ensıklopedııasynyń» daıyndalyp jatqanyn tilge tıek etti. Sh.Ýálıhanov atyndaǵy Kókshetaý ýnıversıteti qazaq tili men ádebıeti kafedrasynyń professory Jámbek Sábıt «Ǵ.Músirepov prozasynyń sýretkerlik bitimi» degen taqyrypqa baıandama jasap, sóz zergeriniń sóz oınatý tásilderin, bir sóziniń ekinshi sózge kóleńkesin túsirý sheberlikterin birshama mysaldardy keltire otyryp, ashty. «Alyptardyń aqyrǵysy» degen taqyrypta baıandama jasaǵan osy joldardyń avtory Ǵabeńniń ómirdegi qol jetkizgen tabystary men qazaq ádebıetiniń órkendeýine qosqan úlesteri týraly aıtty. Sondaı-aq L.N.Gýmılev atyndaǵy Eýrazııa ulttyq ýnıversıtetiniń professory Qarlyǵash Baıtanasova, «Turan-Astana» ýnıversıtetiniń professory Gúlnáz Káripjanova, M.Qozybaev atyndaǵy SQÝ professry Janar Qulybekova jáne t.b. jazýshynyń kórkem oılary men sheber tiliniń qyrlaryn ashýǵa tyrysty. Al Soltústik Qazaqstan oblysy arhıviniń dırektory Sáýle Málikova «Danadan qalǵan rýhanı mura» degen taqyrypta baıandama jasap, jazýshy murasynyń búgingi zerttelýi jaıyn áńgimeledi.
Konferensııaǵa jazýshynyń inisiniń kelini Bıken Seralına qatysyp, estelikter aıtty. Jıyn jumysyn SQÝ Qazaq tili men ádebıeti kafedrasynyń meńgerýshisi, professor Janar Talaspaeva qorytyndylap, aıtylǵan pikirler men usynystar boıynsha sharalar jasalyp, al baıandamalar jınaqqa engiziletinin aıtty. Konferensııa jumysyna M.Qozybaev atyndaǵy SQÝ basqarma tóraǵasy Aqmaral Ybyraeva qatysty.
