Aqtaýda 200 páterlik jańa turǵyn úıler paıdalanýǵa berildi. Bes qabatty úılerdiń turǵyndary – jastar, ıaǵnı jas otbasylar.
«Qoljetimdi baspana-2020» memlekettik baǵdarlamasy aıasynda jas otbasylarǵa arnap salynǵan turǵyn úıdiń biri – 100 páterli úı ıelerine jyl basynda tapsyrylǵan bolatyn. Bul joly 40 páterlik 5 úı qojaıyndaryn qarsy aldy.
О́ńirde qazir turǵyn úı salý isi qarqyndy kúıde. О́tken jyly Mańǵystaý oblysynda 532 myń sharshy metr turǵyn úı paıdalanýǵa berilgen. Sondaı-aq, merziminde laıyqty paıdalanylmaǵan 24 gektar jer telimi memleket menshigine qaıtarylǵan soń, osy jerden jańa shaǵyn aýdannyń jospary jasaqtalyp, ınfraqurylymdarynyń jobalary syzylǵan. «Qoljetimdi baspana-2020» baǵdarlamasy aıasyndaǵy úıler boı kóteredi dep josparlanǵan jańa shaǵyn aýdanda jyl basynda 40 páterli jáne 60 páterli turǵyn úılerdiń irgetasy qalanǵan bolatyn. Talaı otbasyny úıli qylýǵa talaptanǵan baǵdarlama sheńberinde Aqtaý qalasynda ózge de jańa turǵyn úıler qurylystary júrmek.
Saltanatty sátke qatysqan aımaq basshysy A.Aıdarbaev jas otbasylardy qýanyshymen quttyqtap, Memleket basshysynyń tapsyrmasyn júzege asyrý baǵytyndaǵy ıgilikti istiń jalǵasyn tabatyndyǵyn aıtty.
Táýelsiz elimizdiń jastary baspanaly boldy. Otaý kóterip, óz aldyna shańyraq tikti desek jarasady. Alaıda, zamandastaryna qyzyǵa kóz salyp, alystan jabyrqaı qarap turǵan jan qanshama áli?! Bári úıli bolsa eken...
Gúlaıym ShYNTEMIRQYZY,
«Egemen Qazaqstan».
AQTAÝ.
