Joǵaryda atalǵan komandalardyń barlyǵy da azýly. Máselen, AQSh Devıs kýbogyn 32 márte oljalady. Bul – rekordtyq kórsetkish! Taǵy olar 28 ret fınalda utyldy. Dál osyndaı tabysymen birde-bir memlekettiń tennısshileri maqtana almaıdy. Amerıkalyqtar sońǵy ret 2007 jyly osy týrnırde top jardy. Qazirgi kezde AQSh-tyń eń myqty tennısshileri dep Teılor Frıts pen Raılı Opelkany ataýǵa bolady. 24 jastaǵy Frıts álemdik reıtıngte 13-oryndy ıelenýde. Kezinde jasóspirimder arasynda álemniń birinshi raktetkasy atanǵan Kalıfornııa shtatynyń týmasy bıyl Aýstralııanyń ashyq birinshiliginiń tórtinshi kezeńine jetip, ATR týrnırlerinde 13 márte top jardy. Teılormen túıdeı qurdas Raılı 2021 jyly Melbýrndegi dodanyń úshinshi aınalymynda súrindi. Asa iri halyqaralyq jarystarda tórt ret jeńimpaz atanǵan Opelka úzdikter tiziminde 17-oryndy enshileýde.
37 jastaǵy Djon Izner jaıynda uzaq áńgimeleýge bolady. 15 jyldan asa kásipqoılar arasynda tabysty óner kórsetip júrgen Soltústik Karolınanyń sańlaǵy kezinde Ýımbldonnyń jartylaı fınalynda kúsh synasyp, AQSh-tyń ashyq birinshiliginiń shırek fınalyna shyqty. ATR dodalarynda Djon 16 ret teńdessiz dep tanyldy. Bul kúnderi Izner dúnıejúzilik reıtıngte 25-oryndy ıemdenýde. Sondaı-aq AQSh-tyń myna ókilderi «TOP-100» tennısshiniń qatarynda: Frensıs Tıafo – 29, Tommı Pol – 34, Djenson Brýksbı – 43, Makkenzı Makdonald – 51, Markos Hıron – 53, Maksım Kressı – 65, Brendon Nakashıma – 76, Denıs Kýdla – 84 jáne Stıv Djonson – 96.
Atalǵan jarysta 10 ret dara shyǵyp, segiz ret fınalda óner kórsetken Ulybrıtanııa tennısshileri qazirgi kezde qarqynyn biraz báseńdetip aldy. Olaı deýge negiz, bul kúnderi Tumandy Albıon eliniń úsh óreni ǵana – «TOP-100» tennısshiniń qatarynda. Solardyń arasynan Endı Marreıdi bóle-jara atap ótýge bolady. 34 jastaǵy Glazgonyń týmasy osydan alty jyl buryn álemniń birinshi raketkasy atandy. Ol Ýımbldonnyń eki dúrkin jeńimpazy, AQSh-tyń ashyq birinshiliginde bir ret bas júldeni oljalady. Aýstralııanyń ashyq birinshiliginiń fınalyna bes ret shyqty. Rolan Garrostyń aqtyq synynda oınady. Endı Olımpııa oıyndarynyń jekelegen saıysynda eki ret altyn alyp, juptyq básekede kúmispen kúpteldi. ATR týrnırlerinde 46 ret qarsylas shydatpady. Áıgili sportshy 2012 jyly Brıtanııa ımperııasynyń ordenimen marapattaldy. Keıinnen aýyr jaraqat alyp, biraz ýaqyt emdeldi. Búgingi tańda Marreı álemdik reıtıngte 81-oryndy qanaǵat tutýda. Brıtanııalyqtar sońǵy ret Devıs kýbogyn 2015 jyly oljalasa, sol jeńimpaz komandanyń sapynda dál osy ser Endı Marreı de óner kórsetken edi.
Ulybrıtanııa quramasy sapyndaǵy taǵy eki myqty oıynshy jaıynda aıtar bolsaq, olar – Kemeron Norrı men Denıel Evans. 23 jastaǵy Kemeron OAR-da týyp-óskenimen, keıinnen Londonǵa qonys aýdardy. Búgingi tańda ol álemniń 11-raketkasy atanyp otyr. Al 31 jastaǵy Denıel úzdikter tiziminde 35-satyǵa turaqtady.
Devıs kýbogynda Nıderland quramasy óziniń eń zor tabysyna 2001 jyly qol jetkizdi. Sol kezde olar jartylaı fınalǵa deıin jetken edi. Qalǵan týrnırlerde ala-qula óner kórsetti. Qazirgi kezde atalǵan memlekettiń eki tennısshisi ǵana «TOP-100-diń» qatarynda. Olar – Botık van de Zandshýlp (40-oryn) pen Tallon Grıkspýr (56-oryn). Biraq asa iri halyqaralyq jarystarda Qyzǵaldaqtar eliniń órenderi aýyz toltyryp aıtarlyqtaı nátıjege jete alǵan joq.
Esterińizge sala keteıik, 2019 jyly Devıs kýbogynyń toptyq saıysynda Qazaqstan quramasy Ulybrıtanııa jáne Nıderland tennısshilerimen sheberlik baıqasqan edi. Sol jarysta jerlesterimiz nıderlandtyqtardy 2:1 esebimen utsa, dál sondaı eseppen brıtanııalyqtarǵa ese jiberdi. Al amerıkalyqtarmen bizdiń jolymyz áli birde-bir ret qıysqan joq.
О́zge toptarda myna komandalar ózara kúsh synasady: A toby – Horvatııa, Italııa, Argentına jáne Shvesııa. V toby – Ispanııa, Kanada, Serbııa jáne Ońtústik Koreıa. S toby – Germanııa, Fransııa, Belgııa jáne Aýstralııa. Bul básekeler Bolonıa (Italııa), Gambýrg (Germanııa) jáne Valensııada (Ispanııa) ótedi. Ár toptan úzdik shyqqan eki qurama 23-27 qarasha kúnderi Malagada jalaýy jelbireıtin pleı-off saıystarynda baq synaıdy.
