Merekelik kóńil kúıde ótken veloserýen 7 mamyr kúni saǵat 10.00-de oblys ákimdiginiń aldyndaǵy ortalyq alańnan bastaldy. Qaladan shyqqan soń Tobyldyń ar jaq betinde jatqan Mıchýrın aýylynan keri aınalyp 15 shaqyrym qashyqtyqty basyp ótken velosıpedshiler Gashek kóshesindegi Táýelsizdik qaqpasyna bir-aq kelip toqtady.
Kásibı sportshylar on bes shaqyrymdy op-ońaı eńserdi. Alaıda buǵan deıin velosıpedte kóp júrip ádettenbegen keıbir áýesqoılar márege jetkenshe alqynyp, sharshańqyrap qaldy. О́ıtkeni qaptaldap soqqan qatty jel jyldamdyqty arttyrýǵa mursat bermedi.
Is-sharaǵa qatysýshylardy úrmeli orkestrmen kútip alǵan uıymdastyrýshylar ár velosıpedshige shaǵyn syılyq tartý etip, Otan qorǵaýshy merekesine arnalǵan saltanatty jıyn ótkizdi. Jıynda sóz alǵan oblys ákiminiń orynbasary Vıktor Ionenko Tobyl óńirindegi velosporttyń damýyna úlken úles qosqan Valentına Bobylevany eske alýǵa arnalǵan dástúrli kópkúndik maýntınbaık týrnıriniń bastalǵanyn aıtty.
– Kópkúndik týrnırge elimizdiń ár óńirinen kelgen velosportshylardyń birazy búgingi Otan qorǵaýshylar kúnine arnalǵan merekelik sherýge de qatysyp jatyr. Barlyq meımandardy, qala turǵyndaryn ataýly merekemen shyn júrekten quttyqtaımyn. Ásirese keıingi býynǵa úlgi-ónege kórsetip, búgin jastarmen birge 15 shaqyrym qashyqtyqty baǵyndyrǵan sport ardagerlerine erekshe alǵys bildirgim keledi. Aspanymyz ashyq, irgemiz bútin, tatý-tátti, beıbit tirshiligimiz baıandy bolsyn! – dedi V.Ionenko.
Jalpy, Qazaqstan velosportyna bıyl 108 jyl tolyp otyr. Bul sport túrinen eń alǵashqy jarys 1914 jyly Aqtóbe qalasynda ótipti. Oǵan nebári 15 velosportshy qatysyp, márege Sybaǵat Zabırov birinshi bolyp jetken. Jarysty uıymdastyrýshylar jeńimpazǵa saf altynnan quıylǵan 15 gramdyq medal tapsyrypty.
Qostanaı oblysy
