Bárinen de eń sulý...

Qyzdar ýnıversıtetiniń arýy anyqtaldy

Baıyrǵy Qazaq memlekettik qyzdar pedagogıkalyq ýnıversıteti dástúrli «Ýnıversıtet arýy» baıqaýyn uıymdastyryp, eń kórkem qyzdaryn anyqtady. Qazaq qyzdarynyń aıaýly da sulý bolmysyn, búgingi rýhanı ult dástúri men mádenıetin boıyna jınaqtaǵan, aqylyna kórki saı boıjetkenderdi nasıhattaý maqsatynda ótken baıqaýǵa ár fakýltetten bir úmitkerden, san ónerdi tal boıyna toǵystyra bilgen, aqylyna kórki saı, burymdy qyzdar qatysty. Aldymen arýlar jınalǵan qaýymǵa arnaıy daıyndalǵan beınebaıan arqyly ózderin ta­nystyryp, arman, maqsattarymen bólisse, ekinshi kezeńde óz ónerlerin pash etti. «О́nerliniń órisi keń» atty óner baıqaýynda biri ánshiligin, bıshiligin kórsetse, endi biri búgingi qoǵamdaǵy ózekti taqyryptardyń biri bolyp tabylatyn jetimder máselesin kóterip, «Jetim balanyń muńy», «Ana men balanyń syrlasýy» degen taqyryptarda monolog oqyp, akterlik sheberlikterin alǵa tartty. Úshinshi «Aqyly – kórkine saı, taǵamy – dástúrine saı» kezeńinde boıjetkenderdiń bilim deńgeıi men jasaǵan taǵamy arqyly aspazdyq sheberlikteri synaldy. Baıqaýda qyzdar búginde umyt bolǵan «Ásip» (qoı isheginen jasalǵan) jáne «Qarma» (balyqtan jasalǵan) dep atalatyn as túrin usyndy. Ultymyzdyń tanymal óner adamdarynan quralǵan qazylar alqasynyń sheshimimen óner jáne mádenıet fakýltetiniń 1-kýrs stýdenti Sábına Qoıshanova ýnıversıtet arýy atandy. «Ýnı­versıtet arýy» tájin 2013 jyldyń arýy atanǵan Áıgerim Sopybekova saltanatty túrde tabystap, basyna kıgizdi. Aınash ESALI, «Egemen Qazaqstan». ALMATY. –––––––– Sýrette: «Ýnıversıtet arýy-2014» Sábına Qoıshanova.