Atap aıtqanda, Pavlodar oblysyndaǵy Tereńkól, Sharbaqty jáne Pavlodar aýdandaryndaǵy 36 aýylda mal jaıatyn jer joq. Basqa aýdandarda da jaıylymnyń azdyǵy aıtarlyqtaı baıqalady. Máselen, Ýspen aýdanynyń turǵyny Muhtar Baımamyrov qorasyndaǵy azdy-kópti qoı men jylqysynyń sanyn arttyrýdy qalaǵanymen, qoly baılaýly.
«Aýdandaǵy bos aýmaqtyń barlyǵyna egin egiledi. Árıne, astyq ósirgen durys. Oǵan esh qarsylyq joq. Biraq bul mal sharýashylyǵyn shetke ysyryp qoıý qajet degendi bildirmese kerek. Tórt túlik ustap otyrǵan biz sııaqty qarapaıym turǵyndarǵa da jaǵdaı jasalsa eken deımiz. Qazir aýdan ortalyǵynyń mańynda jaıylymdyq jer joqtyń qasy. Kúnde tańerteń qoı men jylqynyń joldyń ar jaǵyna shyǵaryp, keshqurym qaıta qoraǵa ákelip, qamaýdan basqa amal bolmaı tur. Sharýalar egin ekken soń jaǵdaı tipti qıyndaıdy. Jyl saıyn osy máseleni kóterip, jaıylymdyq jer suraǵanymyzben, másele sheshilmeı keledi», deıdi Muhtar Baımamyrov.
Pavlodar oblystyq jer qatynastary basqarmasynyń basshysy Rýslan Dáýitbaevtyń aıtýynsha, bıyl bul baǵytta ilgeri qadamdar jasalady. Atap aıtsaq, qarapaıym halyqtyń qajettiligi úshin 380 myń gektar jer paıdalanýǵa beriledi.
«Jaıylymdyq jerlerdiń tapshylyǵy ótkir tur. Mysaly, Sharbaqty aýdanynda aýmaqtyń basym bóligin orman, al Pavlodar men Tereńkól aýdandary Ertis ózeniniń jaǵasynda ornalasqandyqtan sýarmaly alqap alyp jatyr. Bul máseleni sheshý úshin jalpy aýmaǵy shamamen 100 myń gektar bolatyn 200-ge jýyq jer ýchaskesi memleketke qaıtarylady. Sondaı-aq jaıylymdar kólemi jer qorynyń esebinen artady. Osylaısha, 380 myń gektar aýmaq elektrondy saýda arqyly nemese jer komıssııasy sheshimimen turǵyndar men sharýalarǵa usynylady», deıdi Rýslan Dáýitbaev.
Jyl basynan beri barlyǵy 20 myń gektar jaıylym úlestirildi. Barlyǵy Pavlodar oblysynda 8,3 mln gektar mal jaıatyn jer bar. Onyń 4,7 mln gektar aýyl sharýashylyǵy taýarlaryn óndirýshilerdiń ıgerilýine berilgen.
