Naýyrzym aýdanynyń turǵyndary Parlament Májilisiniń depýtaty Álııa Saparovamen kezdesti. Kezdesý barysynda halyq qalaýlysy alda kútip turǵan konstıtýsııalyq ózgeristerdiń mán-jaıy týraly áńgimelep, kópshilik tarapynan, qoıylǵan birqatar saýalǵa jaýap berdi.
Eń bastysy, halyq aldaǵy naýqandy qyzý qoldap otyr. Májilis depýtaty osy aýdandaǵy «Kenesary» jaýapkershiligi shekteýli seriktestigine de at basyn buryp, sharýalarmen tildesti. Sharýashylyq jumysshylary kásipkerlik salasyndaǵy tabystaryn alǵa tarta otyryp, Memleket basshysynyń saıası bastamalaryn biraýyzdan qoldaıtyndaryn aıtty. Jıynda Konstıtýsııanyń 33 babyna engiziletin túzetýler, Prezıdent ókilettigi men Parlamenttiń yqpalyna qatysty ózgerister týraly jan-jaqty áńgime boldy.
«Konstıtýsııalyq reformanyń nátıjesinde bıliktiń zań shyǵarýshy tarmaǵy aıtarlyqtaı ózgeredi. Sonyń nátıjesinde Parlamenttiń jáne onyń palatalarynyń róli edáýir kúsheıip, mártebesi artady. Qazaqstan halqy Assambleıasynyń Májilistegi kvotasy Senatqa beriledi. Onyń sany 9-dan 5 depýtatqa qysqarady. Soǵan sáıkes Májilis depýtattarynyń jalpy sany 107-den 98-ge azaıady. Prezıdent jarııalap otyrǵan referendým tóńireginde konstıtýsııaǵa engiziletin ózgerister qyzý talqylanatyn bolady. Buǵan deıin de kóptegen aýdandy aralap, ózderińiz sııaqty aýyl turǵyndarymen, jalpy ár salada eńbektenip júrgen mamandarmen kezdesý ótkizdik. Konstıtýsııalyq reforma boıynsha Prezıdenttiń birqatar ókilettiligin Úkimetke, mınıstrlikterge, jergilikti atqarýshy organdarǵa berý, sondaı-aq oblys ákimderiniń taǵaıyndalý máselesi halyq talqysyna túsetin bolady. Sondyqtan 5 maýsym kúni ár qazaqstandyq óziniń jeke azamattyq boryshyn oryndaýǵa tıis», dedi Álııa Saparova.
Jergilikti turǵyndardyń aıtýynsha, Memleket basshysynyń Jańa Qazaqstandy qurýdaǵy jańasha reformalardy jarııa etýi der kezinde jasalǵan, úlken saıası mańyzy bar qadam.
«Prezıdent usynǵan saıası reformalar memlekettik qurylysty nyǵaıtýdyń jańa tarıhı kezeńi, al búgingi jarııalanǵan konstıtýsııalyq reformaǵa baılanysty referendým týraly sheshim Prezıdent Joldaýynyń júıeli júzege asyrylyp jatqanynyń aıǵaǵy deýge bolady. Al úlken jeńisterge tek birlik arqyly ǵana jetýge bolatyny aıtpasa da túsinikti», deıdi turǵyndar.
Májilis depýtattary ótken aptadan bastap aýyldardy aralap, halyqpen kezdesip aldaǵy saıası naýqannyń máni men mańyzyn túsindirý jumystaryn júrgizip jatyr. Halyqtyń aldaǵy mańyzdy naýqanǵa beıjaı qaramaıtyny anyq. Máselen, naýyrzymdyqtar kezdesý barysynda ár normaǵa toqtalyp, referendýmnyń qalaı ótetinin, bıýlleten arqyly qalaı daýys berýge bolatynyn surap jatty.
Álııa Saparovanyń aıtýynsha, Májilis depýtattarynyń óńirdegi jumys sapary ótken jetiden bastap osy aptanyń sońyna deıin jalǵasady. «Oblys ortalyǵynan shalǵaı jatqan eldi mekenderde bolyp qaıttym. Aldaǵy ýaqytta aýyl halqynyń barlyǵymen kezdesýdi josparlap otyrmyn», dedi Májilis depýtaty.
Qostanaı oblysy
