Ádebıet • 18 Mamyr, 2022

Kúıeýiniń kitabyn satqan áıel

139 ret kórsetildi

«Kel, balam, kitap alshy, saǵan arzan beremin», degen qart áıel kisiniń daýysy áli qulaǵymda jańǵyryp tur. Almatynyń áldebir kóshesiniń qıylysynan ótip bara jatqan men onyń ótinishin oryndap, alty-jeti kitap satyp aldym.

Sý tegin. Kóne kitaptardy eski kilemge jaıyp, kóshede satyp turǵan bul kisi meıli kim kelse de, quraq ushyp qarsy alyp, kitaptaryn satyp jatyr. «Qazaqsha kitaptar bar ma?», dep surap edim, «munda bar», dep ar jaǵynda turǵan já­shiktiń ishinen alyp shyqty. Yńǵaı jaqsy kitaptar eken. Bárin aldym. Ketip bara jat­qanymda, ol kisi meni qaı­ta sha­qyryp, «balam, saǵan sat­qan kitaptar joldasymnyń jı­naǵan kitaptary edi, kózi tiri­sinde paıdalanǵan, eki jyl buryn qaıtys bolǵan, balalarym oryssha minezdi bolyp ósti, kitap degenge olar múlde qyzyqpaıdy, tipti ákesiniń jazyp-syzǵan dúnıesine de kóz qyrlaryn salmaıdy. Aıt­paqshy, meniń joldasym jazýshy kisi», dep bireý-mireý estip qoıa ma degendeı aınalasyna alaq-julaq etip qara­dy. Sosyn menimen qoshtasyp, kitaptaryna qaraı ketti. «Meniń joldasym jazýshy», degen sózine selk ettim, qoly­ma ustap turǵan kitaptardyń alǵashqy betterin paraqtaı bastadym. Múmkin bir jerine aty-jónin jazǵan shyǵar degen oı jeteledi. Esh­teńe tappadym. Eki-úsh kitapqa áldekimniń esimi jazy­lypty, biraq ony korrektor qaryndashpen óshirip tas­tapty. «Kúıeýiniń kitaptaryn nege satady?», degen uly su­raq kókiregimdi tyrnalap bara jatty. Sosyn oıyma «Ba­la­larym oryssha ósti», degen sózi túse ketti. Árıne, oryssha sóı­leıtin urpaqqa qazaqtyń qun­dylyǵynyń túkke keregi joq ekeni osy eken ǵoı degen tujyrym men úreı aldymnan sopań etip shyǵa keldi. Jele jortyp qyzym oqıtyn mektepke bardym. Oqýshylar úılerine qaıtyp bara jatyr. Anadaıda toǵyz-on jasar qyz bala ákesimen oryssha sóıle­sip barady. Kenet kóz aldyma álginde ǵana men kitabyn satyp alǵan jazýshy «elestedi». Kim biledi,  ol da kezinde balalaryn mektepten alyp qaıtarda osylaı ózge tilde sóılesip bara jatqan shyǵar?! 

Araǵa aı salyp, sol kóshege áldebir jumyspen bara qal­dym. Biraq kúıeýiniń kitabyn sat­qan álgi kisini kezdestirmedim, múmkin, marqum jazýshynyń jıǵan kitaptary taýsylǵan bolar?    

 

Sońǵy jańalyqtar

Atyraý oblysynda 77 brakoner anyqtaldy

Aımaqtar • 23 Qyrkúıek, 2022

Novak Djokovıch Qazaqstanǵa keledi

Tennıs • 23 Qyrkúıek, 2022

Atyraýda qonaqúıden órt shyqty

Oqıǵa • 23 Qyrkúıek, 2022

Bolgarııada tótenshe jaǵdaı jarııalandy

Oqıǵa • 23 Qyrkúıek, 2022

Uqsas jańalyqtar