Jylý máselesi sheshilmegendikten keıbireýi mundaǵy úılerin saıajaı retinde paıdalanady. Qysta qulyppen «qarýlanyp», tereze-esikti shegelep, oblys ortalyǵyndaǵy úıinde kúneltedi. Al kóbi qysy-jazy osynda turady. Jalǵyz baspanasy – osy. Amalsyzdan aýyldyń halqy sııaqty kómir jaǵýǵa májbúr. Otynnyń shyǵyny óz aldyna, áýejaı aspanynda jaıylǵan kók tútinniń ekologııalyq zardaby da bar emes pe? Oǵan bas qatyryp otyrǵan sheneýnikter joq. Kezinde ýádeni úıip-tókken shendiler zeınetkerlikke shyǵyp ketken de bolar...
Turǵyn úıdiń irgetasy qalanǵan ýaqytta máre-sáre kúı keshken Maqsat Eshmuratovtyń qazirgi kóńil kúıi kóterińki deý qıyn.
– Jeke turǵyn úı qurylysy jobasynda ortalyqtandyrylǵan jylý júıesi qarastyrylǵan. Men jer alǵan ýaqytta qubyrlardyń tóselgenin kórgen edim. Keıin belgisiz sebeppen ony qaıtadan sýyryp alypty. Sodan beri qubyr da joq, jylý da joq. Búginde munda úı salǵandardyń basym bóligi sýsyz, jaryqsyz otyr, – deıdi M.Eshmuratov.
Qalalyq qurylys bólimi basshylyǵynyń málimetinshe, jobanyń saraptamasy daıyn bolǵan soń jelilerdi tartý úshin respýblıkalyq bıýdjetten qarajat suralmaq. Eger qoldaý tapsa, bıyl tıisti jumystar qolǵa alynbaq. Kesh bolsa, kelesi jyly jalǵasatynyna sendirýde.
Ákimdiktiń jaýabyna turǵyndardyń razy bolmaǵany anyq. Respýblıkalyq bıýdjet saýyn sıyr emes. Odan da mańyzdy jobalar jeterlik. Sonda respýblıkalyq qazynadan qarajat bólinbese, jeliler tartylmaıdy degen sóz be? Turǵyndar taǵy 10 jyl kútýi kerek pe? Ne desek te, jergilikti bılik ýádesinde turyp, qolǵa alǵan sharýasyn sońyna deıin aıaqtaýǵa tyrysady degen úmit bar. Turǵyndardyń tilegi sol.
Pavlodar oblysy
