Oblystyq densaýlyq saqtaý basqarmasy basshysynyń orynbasary Gúlnár Jıenbaeva jańa mekemeniń iske qosylýy dıagnostıkalyq qyzmetterdiń san salasyn kóbeıtý esebinen medısınalyq kómek sapasyn arttyrýǵa, emdeý is-sharalarynyń aıasyn keńeıtýge mol múmkindik beretinin aıtady.
Mysaly, jańa aýrýhanada kúıikke qarsy «Klınıtron-Clinitron» markaly kereýet bolady. Budan bólek óte aýyr kúıik jaraqatyn alǵan balalar bul jerde keshendi túrdegi medısınalyq kómek alady. Kúıik demekshi, mamandar aıtqan derekterge súıensek, aýrýhanaǵa túsken úsh jasqa deıingi balalardyń 80%-ǵa jýyǵy kúıik jaraqatynan zardap shekkender eken.
Jańadan paıdalanýǵa beriletin aýrýhanada bilikti mamandar jas balalardy qınap júrgen san alýan syrqattan emdeıdi. Mysaly, munda qulaǵy múlde estimeıtin kishkentaı pasıentterge estý protezin salý múmkindigi qarastyrylǵan. Munyń ózi qos qulaǵy múkis jas pasıentterdi basqa jaqtan em izdep sarylýdan qutqarady dep senimmen aıtýǵa bolady.
Sonymen qatar jańa medısınalyq mekemede travmatologııa jáne ortopedııa, otorınolarıngologııalyq bólimshe bazasynda bet-jaq hırýrgııasy jumys istemekshi.
Oblystyq densaýlyq saqtaý basqarmasy basshysynyń orynbasary Gúlnár Jıenbaeva «Balalar jyly» aıasynda náresteler arasyndaǵy estý, kórý, sóıleý aýytqýshylyqtaryn jáne týabitti gıpoterıoz dertin anyqtaý maqsatynda jyl saıynǵy aldyn alý jáne skrınıngtik tekserýler júrgizýdiń jalǵasatynyn aıtady.
– Neonataldy skrınıngten jańa týǵan nárestelerdiń bári ótedi. Al oftalmologııalyq skrınıng shala týǵan balalar úshin júrgiziledi. Mysaly, osy jyldyń tórt aıy ishinde 382 náreste skrınıngten ótti jáne olardyń 33-ine qazirgi tańda operasııa jasaldy. Aýdıologııalyq jáne psıhofızıkalyq skrınıngter perınataldy ortalyq pen perzenthanalarda ǵana emes, sonymen qatar emhanalarda da jasalady, – deıdi G.Jıenbaeva.
Mamandar keltirgen derek boıynsha, búginge deıin aýdıologııalyq skrınıngten ótken 312 balanyń ishinde 52 kishkentaı pasıent jáne psıhofızıkalyq tekserý jasalǵan 70 myń balanyń 281-i psıhologııalyq-medısınalyq-pedagogıkalyq konsýltasııa kómegine júginýge jiberilipti.
Jalpy, óńirde erekshe qajettilikteri bar balalardy saýyqtyrýǵa basa mán berilgen. Mysaly, oblysta búginde 150 oryndyq respýblıkalyq «Úmit» saýyqtyrý ortalyǵy qalypty jumys isteıdi. Budan bólek Qaraǵandy, Jezqazǵan jáne Temirtaý qalalaryndaǵy úsh birdeı ortalyq memleket-jekemenshik áriptestigi negizinde medısınalyq qyzmet kórsetedi. Mine, osy medısınalyq mekemelerde bıyl kámelet jasyna tolmaǵan 1 700 múgedek bala em-dom qabyldaǵan.
Qurylysy uzaqqa sozylyp ketken jańa aýrýhananyń bıyl paıdalanýǵa beriletinine aýrý-syrqaýy bar balalardyń ata-analary ǵana emes, medısınalyq mamandar da qýanyshty. Osy oraıda oblystyq balalar klınıkalyq aýrýhanasynyń dırektory Arǵyn Bıdaıbekov endigi ýaqytta jas pasıentterdi emdeýdiń 200 oryndyq keń jáne zamanaýı qural-jabdyqpen qamatamasyz etilgen aýrýhanada jańa múmkindikter men jan-jaqty jaǵdaılarǵa saı sapaly bolatynyn aıtady.
Qaraǵandy oblysy
