Sondaı-aq jańa arnaıy ekonomıkalyq aımaqtar qurýǵa moratorıı engizý, beıindi emes baǵyttardy qysqartý, sondaı-aq qaıta bólý deńgeıi boıynsha óńdeýshi ónerkásip sheńberinde qyzmettiń basym túrleriniń jeke tizbesin qalyptastyrýdy usyndy.
Komıtet tóraǵasy Serikbaı Trumov dóńgelek ústel otyrysyn asha kelip, arnaıy ekonomıkalyq aımaqtardyń qurylý sebebine toqtaldy. Qazirgi zamandaǵy ónimdiligi joǵary, básekege qabiletti óndiristerdi jedel damytý, qyzmet sapasynyń jańa deńgeıin qalyptastyrý, ınvestısııalar tartý, salalar men óńirlerge jańa tehnologııalar engizý, sondaı-aq halyqty jumyspen qamtý maqsat etilgenin jetkizdi.
Qarjy mınıstriniń orynbasary Marat Sultanǵazıev AEA qyzmetiniń tıimdiligin talqylaý barysynda baıandama jasady. Ol Bıýdjettiń atqarylýyn baqylaý jónindegi esep komıteti arnaıy ekonomıkalyq aımaqtardyń qyzmetine aýdıt júrgizgenin, onda ınfraqurylymnyń aıaqtalmaǵany, ónerkásipke ınvestısııalar tartý deńgeıiniń tómendigi jáne óndiris kóleminiń azdyǵy jóninde birqatar júıeli kemshilik pen zań tarmaǵynyń buzylǵany anyqtalǵanyn aıtty.
Sonymen qatar Indýstrııa jáne ınfraqurylymdyq damý mınıstriniń orynbasary Marat Qarabaev, Energetıka mınıstriniń birinshi orynbasary Murat Júrebekov, sondaı-aq «Innovasııalyq tehnologııalar parki» AEA bas dırektory Oljas Sartaev baıandama jasady.
Senatorlar dóńgelek ústel jumysynyń qorytyndysy boıynsha Úkimetke jiberiletin usynystar ázirledi. Serikbaı Trumov ınvestısııalar kólemine, AEA aýmaǵyndaǵy qyzmet túrleriniń basymdyǵyna baılanysty jeńildikter berý kezinde saralanǵan tásil máselesin pysyqtaý qajettigin atap ótti. Sondaı-aq barlyq obekti paıdalanýǵa berilgennen keıin AEA qatysýshylaryna jer alańyn satyp alý múmkindigin berýdiń, aralas tásildi engizýdiń mańyzdy ekeni jáne basqa da máseleler aıtyldy.
