Sport • 24 Mamyr, 2022

«Shirkin, Zıdan qazaq bolǵanda ǵoı!»

156 ret kórsetildi

«Shirkin, Zıdan qazaq bolǵanda ǵoı!», «An myqty ma? Kan myqty ma?», «Gol kirmese kirmesin, tek Dıýgarrı aman bolsa eken», «Bir goldyń bolatyny sózsiz búgin, dál qaı mınýtta ekenin aıta almaımyn», «Baryssha atylyp, keneshe jabysty», «Túıeniń qos órkeshindeı jarasyp kele jatqan Flo men Kannavaro», «Qyryq jyl qorǵanysta oınappyz. Múmkin shabýyldaý kerek pe edi?», «Bylaı qarasań, eki qol, eki aıaq bizdiń de fýtbolshylarda bar, ıá?», «Aıýdyń apanyndaı qaqpa turǵanda, alaqandaı ǵana mańdaıshaǵa tıgeni nesi depti aýyldaǵy bir apamyz», «Oıbaı-aý, Muhtarhan uıyqtap júrip osylaı bokstassa, oıanyp ketse, onda ne bolady?»...

Kóptegen dúbirli dodadan tikeleı reportaj júrgizgen tanymal sport kommentatory Amangeldi Seıithanovtyń osy sekildi kóptegen qanatty sózderi áli kúnge deıin jankúıerlerdiń jadynda. Eńbek jolyn respýblıkalyq «Sport» gazetinde bastaǵan ol sol kezdiń ózinde-aq oıly, zerdeli, salmaqty, salıqaly maqalalarymen óz oqyrmandaryn baýrap alǵan-dy. Stýdenttik shaǵynda aıtysker aqyn retinde tanyldy. Keıinnen «Qazaqstan» men «Habar» telearnalarynda eńbek etti. Kommentator retinde óziniń myqtylyǵyn túbegeıli moıyndatty. Amangeldi aǵamyzdyń sol kezde aıtqan keremet teńeýleri men óreli oı-pikirlerin áli de saǵynyp júrgen jaıymyz bar.

Seıithanovtardyń otbasy jáne Jandos Aıtbaı bastaǵan Amangeldi Mýatqanulynyń bir top shákirti bas qosyp, ótken aptanyń aıaǵynda Almatydaǵy «Han Táńiri» stadıonynda  BAQ ókilderi arasynda shaǵyn fýtboldan respýblıkalyq týrnırdiń tusaýyn kesti. Oǵan elimizdiń segiz óńirinen kelgen 16 komanda qatysty. Jarysty «Habar» agenttiginiń basqarma tóraǵasy Berik Ýálı ashty. Toptyq týrnır aıaqtalǵan soń óz toptarynda alǵashqy eki oryndy alǵan segiz ujym pleı-off saıystarynda sheberlik baıqasty. Sóıtip, bul týrnır quramynda Rıshat Turǵanbaıuly, Samat Esentaıuly, Esbolat Aıdabosyn, Asyl Sultanǵazy, Aıdar Qalıev, Arshyn Aıdynbekuly, Serik Qantaev syndy oıynshylary bar Taldyqorǵannyń «Qareket» komandasynyń jeńisimen aıaqtaldy. Fınalda olar «KTK» arnasynan 2:0 esebimen basym tústi. Qola medaldi «Ekspress K» gazetiniń ujymy ıelendi. Úshinshi oryn úshin ótken básekede olar Nur-Sultannyń «Habar» komandasyn 2:1 esebimen  utty.

– Amangeldi Seıithanov pen Beısen Quranbek tek syılas áriptester ǵana emes, ajyramas dostar da edi. Eńbek jolyn olar «Sport» gazetinde birge bastady. Keıinnen teledıdardan jarqyrap kórindi. О́kinishke qaraı, asyl aǵalarymyz ómirden erte ozdy. Ekeýi de naǵyz kemeldengen shaǵynda kelmestiń kemesine mindi. 2020 jyly Beısen Quranbek baqılyq bolǵan soń, artynan ergen ini-shákirtteri sol kisiniń atynan komanda quryp, ony «Qareket» dep atadyq. Qysqa ǵana merzim aralyǵynda bizdiń jigitter BAQ ókilderi arasynda ótken Almatydaǵy eki birdeı týrnırde top jaryp, taǵy birneshe dop dodasynda júldegerler qatarynan kórindi. Mine, endi Amangeldi Mýatqanulyn eske alýǵa arnalǵan jarysta Beısen Abaıuly atyndaǵy komanda bas júldeni oljalady, – dep jeńimpaz komandanyń kapıtany Rıshat Turǵanbaıuly tebirene sóıledi.

Bas júldeni oljalaǵan komandaǵa 200 myń teńge tabys etilse, fınalda jeńilgen ujym 150 myńdy enshiledi. Qola medaldyń ıegerleri 100 myń alsa, tórtinshi orynǵa turaqtaǵan komanda 50 myń teńgeni ıemdendi. Jarys qorytyndysy boıynsha myna jýrnalıster úzdik dep tanyldy: Qaqpashy – Samat Esentaıuly, qorǵaýshy – Dáýren Berikqajy, shabýylshy – Aıtbaı Jumaǵul, oıynshy – Sraıl Smaıyl. Olar da aqshalaı jáne baǵaly syılyqtarǵa ıe boldy. Sonymen qatar birqatar BAQ ókiline Amangeldi Seıithanov jaıynda jazylǵan «Jeńisti kúnderde júzdeskenshe» atty kitap tabys etildi.

Osy jarysty tamashalaýǵa kelgender arasynan Parlament Senatynyń depýtaty Nurtóre Júsip, Májilis depýtaty Janarbek Áshimjan, «Atamura» korporasııasynyń prezıdenti Raqymǵalı Abraruly, respýb­lı­kalyq gandbol federasııasynyń prezıdenti Gúlnar Turlyhanova, ardager sport jýrnalısi Rabat Jánibekov, aıtysker aqyn Dıdar Qamıev jáne taǵy basqalar boldy.   

 

ALMATY

Sońǵy jańalyqtar

Dollar arzandady

Qarjy • Keshe

Uqsas jańalyqtar