Aımaqtar • 28 Mamyr, 2022

Tarazda zamanaýı oqýshylar saraıy ashyldy

46 ret kórsetildi

Memleket basshysy jarııalaǵan Balalar jylyna arnalǵan is-sharalar jospary aıasynda jáne 1 maýsym – Halyqaralyq balalardy qorǵaý kúni qarsańynda Tarazda «Baqytty bolashaq» oqýshylar saraıynyń ashylý saltanaty ótti, dep habarlaıdy Egemen.kz.

Sharaǵa elimizdiń barlyq óńirinen jáne Reseı Federasııasynan kelgen pedagogter qatysty.

Jınalǵandar aldymen, robototehnıka, 3D-modeldeý, avıamodeldeý, keme modeldeý, qazaq jáne qazirgi zamanǵy sándik-qoldanbaly óner, landshaftyq dızaın kabınetteri men sáýlet jáne dızaın mektebin, kovorkıng-ortalyqty, observatorııany jáne planetarııdi aralap kórdi. Barlyǵy 81 úıirme jumys isteıtin bolady.

Foıede oqýshylardyń ǵylymı-zertteý jáne shyǵarmashylyq jumystary qoıylǵan kórme uıymdastyryldy.

Oqýshylar saraıynyń ashylýyna oraı mektepten tys uıymdardyń beıini boıynsha pedagogter men mamandarǵa arnalǵan «Qosymsha bilim berýdegi ınnovasııalar: ıdeıadan bastap iske asyrýǵa deıin» taqyrybynda respýblıkalyq qurylymdyq dıalogy ótti.

QR Bilim jáne ǵylym mınıstriniń keńesshisi, balalarǵa qosymsha bilim berýdiń respýblıkalyq oqý-ádistemelik ortalyǵynyń dırektory Raısa Sher balalardyń tolyqqandy damýy úshin qolaıly jaǵdaı jasaýdyń qanshalyqty mańyzdy ekenin atap ótti.

«Jańa oqýshylar saraıy balalar úshin de, pedagogter úshin de ınnovasııalyq alańǵa aınalatynyna senimdimin. Qazirgi ýaqytta elimizde barlyǵy 1523 mektepten tys uıym jumys isteıdi. Bul – óte jaqsy kórsetkish. Oqýshylardyń kásibı daıarlyqqa deıingi tyńǵylyqty daıyndyǵyn uıymdastyrý úshin kúsh-jigerimizdi biriktirý – asa mańyzdy. Jastar bolashaq mamandyǵyn senimdi túrde tańdap, kreatıvti, belsendi azamattyq ustanym ıesi bolýy tıis. Bilimdi jastar – eldiń zııatkerlik áleýeti ekenin umytpaýymyz kerek», dedi ol.

Jambyl oblysynyń ákimi Nurjan Nurjigitov óz sózinde oblysta kórkemóner, mýzykalyq, ǵylymı-tehnıkalyq, áskerı-patrıottyq baǵyttaǵy qosymsha bilim beretin 75-ten astam mektepten tys uıym ashylǵanyn atap ótti. Mundaı nysandar jyl sanap artyp kele jatyr.

«Memleket basshysy 2022 jyldy Balalar jyly dep jarııalady. О́skeleń urpaqtyń balalyq shaǵynyń qamsyz, baqytty ótýin qamtamasyz etý – bizdiń ortaq mindetimiz. Búgingi tańda Jambyl oblysynyń balabaqshalarynda 57 myńnan astam bala tárbıelenip jatyr. 244 myń bala mektepterde, 23 myń stýdent kolledjderde bilim alýda», - dedi aımaq basshysy.

Sońǵy jańalyqtar

Dollar arzandady

Qarjy • Keshe

Uqsas jańalyqtar