Naqtyraq aıtsaq kúdiktiler júıeli túrde Maqtaaral jáne Jetisaı aýdandarynda ornalasqan medısına mekemeleriniń qyzmetkerlerinen, olardyń qarjylyq qyzmeti týraly málimetterin taratyp, jala jaýyp, ony jarııalaý qaýpin tóndirip, aqsha bopsalaýmen aınalysqan.
Bul týraly brıfıngte Túrkistan oblysy Polısııa departamenti bastyǵynyń orynbasary polısııa polkovnıgi Qurmanbek Sahov aıtyp berdi.
«Krımınaldyq polısııa basqarmasyna medısına mekemesiniń biriniń qyzmetkeri shaǵymdandy. Onyń aıtýynsha, belgisiz bireýler jalǵan málimetterdi taratyp jarııalaımyz, sondaı-aq baqylaýshy organdardyń jospardan tys tekserýlerin uıymdastyramyz dep bopsalap, 32 mıllıon teńge talap etken. Atalǵan jaıt bizdiń polıseılermen birden QR QK-niń 194-baby 4-bóligi «Asa iri mólsherdegi bopsalaý» boıynsha SDTBT-ǵa tirkeýge alyndy», dedi ol.
Qylmystyq topty ustaý jáne qylmysty ashý maqsatynda, Túrkistan oblysy boıynsha PD KPB men QR UQKD qyzmetkerlerinen arnaıy top quryp, kezek kúttirmeıtin tergeý jumystaryn júrgizgen.
Jedel-izdestirý is-sharalary kezinde Jetisaı qalasyndaǵy kafelerdiń birinde iri kólemde aqsha qarajatyn bopsalap, alyp jatqan Jetisaı qalasynyń turǵyny ustaldy. Seziktiden aıǵaqty zat retinde 32 mln teńge kóleminde aqsha tárkilendi.
«Budan ári Shymkent qalasyndaǵy mekemelerdiń biriniń janyndaǵy tergeý áreketteriniń nátıjesinde, PD Krımınaldyq polısııa basqarmasynyń jedel ýákilderi, UQKD qyzmetkerleri jáne Jyldam qımyldaıtyn arnaıy jasaq birlesip, ekinshi kúdikti, Maqtaaral aýdanynyń turǵynyn ustadyq. Búginde 2 kúdikti ýaqytsha ustaý ızolıatoryna qamaýǵa alyndy. Qazirgi ýaqytta ustalǵandarǵa qatysty qajetti jedel-tergeý amaldary júrgizilip jatyr», dep túıindedi PD bastyǵynyń orynbasary Q.Sahov.
