1921 jyldan bastap 1954 jyldar aralyǵynda KSRO-da shamamen 3 mln 700 myń kúnásiz azamattar qýǵyn-súrginge ushyrady, onyń 600 myńǵa jýyǵyna ólim jazasy berildi. Al qalǵandary uzaq merzimge bas bostandyǵynan aıryldy.
Saıası sebeppen 103 myń adam sottalyp, onyń 25 myńy atý jazasyna kesildi. Qazaqstan aýmaǵynda 11 jazalaý lageri qurylyp, onda sottalǵandar men olardyń otbasylary adam tózgisiz qıyn jaǵdaıda kún keshti. Qýǵyn-súrginniń zobalańyn qazaqtar ǵana emes, Qazaqstanǵa eriksiz, kúshpen jer aýdarylyp kelgen 1,5 mıllıon ózge etnos ókilderi de kórdi. Qazaq halqynyń janashyrlyǵy men kómeginiń arqasynda olar jan saqtap, aman qaldy.
Orasan shyǵynǵa ushyraǵanyna qaramastan, bizdiń halqymyz óziniń biregeı ulttyq bolmysy men asyl qasıetterin saqtap qaldy. Qatygezdikke boı aldyrǵan joq, san ǵasyrlyq danalyǵyn da joǵaltpady.
