Fransýz kompozıtory Per Tıllýa jazǵan qobyz ben skrıpkaǵa arnalǵan «Baqsy sıqyry» atty jańa mýzykalyq shyǵarma barsha óner súıer qaýymdy tánti etti.
Eki ishekti aspap – qylqobyz ben skrıpkanyń qaıtalanbas dýetin tyńdarmandar joǵary baǵalady. Álemdik premerany Fransııadan kelgen qobyzshy Aıgerım Ersaınova-Shýster men skrıpkashy Kventın Fogel oryndady.
Sondaı-aq bul keshte belgili qazaqstandyq jáne sheteldik óner juldyzdary fransýz kompozıtorynyń fortepıanolyq jáne ansambldik týyndylaryn shyrqady. Belgili pıanıst, Qazaqstannyń eńbek sińirgen qaıratkeri Tımýr Ýrmancheev, alt aspabynda oınaǵan Anna Serova (Italııa), skrıpkashy Sholpan Mankeeva, vıolonchelıst Murat Narbekov pen pıanıst Dına Mırmanovanyń sheberligi zor yqylasqa bólendi. Mýzykanttar Per Tıllýa shyǵarmalarynyń áýeni men kórkemdik alýan túrliligi erekshe ekendigin atap ótti.
Per Tıllýa – 8 úlken sımfonııanyń, 20 sımfonııalyq poemanyń, 3 orkestr, 3 hor jáne 7 solıst úshin jazylǵan oratorııanyń avtory. Kóptegen ulttyq jáne halyqaralyq syılyqtardyń ıegeri. Kompozıtor álemdi aralap, Ortalyq Azııa men Ortalyq Shyǵys elderine jıi saıahattaǵan. Birneshe jyl Ázerbaıjan men О́zbekstanda ómir súrip, osy elderdiń mádenıetin tereń zerttegeni kompozıtordyń mýzykasynda da aıqyn kórinis tapqan. Qazirgi kezde Tıllýany álem mýzykanty dep ataıdy. Fransýz avtory qazaq mýzykasy negizinde ulttyq aspaptarda oryndalatyn kóptegen kompozısııalardy jazdy. Avtordyń aıtýynsha, qobyzdyń úni oǵan erekshe áser etken.
«Qobyzdyń úni meni birden baýrap aldy. Onyń qaıtalanbas áýenderi «Baqsy sıqyry» atty qobyz ben skrıpkaǵa arnalǵan shyǵarmanyń jazylýyna shabyt berdi. Bul – meniń Qazaqstan eline degen qurmetimdi bildiretin arnaıy tartýym. Qazaqstanǵa alǵash ret kelip, osy keremet eldiń astanasynda shyǵarmashylyq keshimdi ótkizý – men úshin úlken mártebe», dep jetkizdi Per Tıllýa.
Ol festıvaldiń uıymdastyrýshysy – «Degdar» gýmanıtarlyq qoryna alǵysyn bildirdi.
Fransýz kompozıtorynyń mýzykasy ónerde shekara bolmaıtynyn taǵy bir dáleldeı tústi. Bul týraly óz pikirin «Degdar» qorynyń dırektory Laýra Ahmetova jetkizdi.
«Per Tıllýanyń shyǵarmashylyǵy kóp qyrly. Onyń Fransııa tórinde týǵan áýenderinde Azııa úni estiledi. Kompozıtor qazaq mýzykasyn óte jaqyn qabyldady. Jalpy, jyl saıyn festıval aıasynda san túrli memlekettiń mýzykalyq ónerin ózara jaqyndastyratyn erekshe konsertter ótedi. Demek, mýzyka óneri aınalamyzdy jarqyn etip, birligimizdi arttyra túsetin alyp kúshke ıe», dedi Laýra Ahmetova.
Eske salsaq, aldaǵy ýaqytta «Astana keshteri» óner festıvaliniń taǵy 3 konserti «Astana balet» teatrynda ótedi jáne kórermender olardy tegin tamashalaı alady.
