TMD elderi ǵana emes, Taıaý Shyǵys elderine tanymal bolǵan holdıng «Qyzyljar» arnaıy ekonomıkalyq aımaǵyna salynyp jatqan osy zaýytty óziniń qurylǵanyna 25 jyl tolý mereıtoıynyń qarsańynda iske qosty. Úsh jylǵa taıaý ýaqytta holdıng 10 mlrd teńge ınvestısııa quıǵan eken. Quramynda 5 myńǵa jýyq adam qyzmet atqaratyn holdıng óziniń Kentaý, Shymkent, Almaty, Qyzylorda, Oral, Aqtaý, Nur-Sultan qalalaryndaǵy kásiporyndary qataryna endi Petropavldy da qosyp otyr. Bul zaýyt Soltústik Qazaqstan óńirindegi iri kásiporyndardyń biri bolmaq. Ol jylyna 13 myń dana transformator shyǵaryp, onyń 90 paıyzyn shetelderge eksporttaıdy. Tolyq qýatynda jumys istegende kásiporyn 400-ge jýyq adamdy jumyspen qamtıdy.
Aǵylshynshasy Alageum Electric dep jazylatyn osy kompanııany alǵashqy bolyp qolǵa alyp, negizin salǵan kásipker Saıdolla Qojabaev. Ol óziniń jumysyn aldymen Kentaý transformator zaýytyn ashýdan bastaǵan. Túrkistan qalasynda ómirge kelgen ol qazir elimizdegi iri kásipkerlerdiń qatarynda quramyna «Kentaý transformator zaýytynan» basqa Oral, Aqtaý transformator zaýyttary, «Almaty elektrmehanıkalyq zaýyty», Shymkenttegi «Elektromontaj» AQ jáne taǵy basqalary enetin Alageum Group korporasııasy baqylaýshylar keńesiniń tóraǵasy.
«Biz ónimderimizdi Armenııa, Ázerbaıjan, Reseı elderine úzdiksiz shyǵarýdamyz. Olardyń tarapynan ónimderimizge esh shaǵym bolǵan joq. Endi osy ónimder Petropavl qalasyndaǵy jańa zaýytta da shyǵarylatyn bolady. Máskeýdiń «Mosızolıator» atty kompanııasymen 20 jylǵa óndiristik yntymaqtastyq ornatqanbyz. Olar bizge transformatorǵa qajetti joǵary voltti tetikter jiberip turatyn. Sonyń ishinde emaldy ızolıasııalanǵan tetikter de bar edi. Ondaıdy Reseı alys shetelden alatyn, endi atalǵan qural olarǵa kelmeıtin boldy. Sondyqtan emaldaý jelisin ózimizde ashýǵa májbúr bolyp otyrmyz», dedi «Petropavl elektrtehnıkalyq zaýytynyń» ashylý saltanatyna qatysqan ol.
Osy saltanatqa Máskeýdiń «Mosızolıator» AQ satý jónindegi dırektory Maksım Osıpov ta qatysty. Ol jańa zaýyttyń ónimderine óz baǵasyn berdi. «Zaýyttyń stanoktary joǵary tehnologııaǵa barynsha saı. Mundaı jerde ónimde aqaý bolýy múmkin emes dep oılaımyn. Senimdi jabdyqtar bolsa árqashan da sapaly ónimder shyǵarýǵa bolady», dedi.
Oblys ákiminiń orynbasary Dáýren Jandarbek korporasııaǵa salyqtyq jeńildikter berilgenin aıtty. «Bul preferensııalar olarǵa 2044 jylǵa deıin beriledi. Biz «Qyzyljar» AEA» óndiris ornyn ashýǵa engen barlyq kásiporynǵa osyndaı jeńildikter qarastyrǵanbyz», deı kelip, Alageum Electric óz jumysshylaryna qamqorlyq jasap, olarǵa jeńildetilgen baǵaǵa turǵyn úı salyp beretinderin aıtty. «Ázirge olar 40 páterli úıdi paıdalanýǵa berdi. Odan basqa 104 páterli úıdiń qurylysyna kiristi. Sondyqtan bul kásiporyn Qyzyljarda túpkilikti tamyr jaıýǵa bet alyp otyr dep sanaýǵa bolady», dedi.
Zaýyttyń ashylý saltanatyna Qazaqstan kásipkerleriniń múddesin qorǵaıtyn «Aq jol» partııasynyń tóraǵasy, Májilis depýtaty Azat Perýashev te qatysqan edi. Ol óziniń sózinde Jańa Qazaqstandy qurýda osyndaı kásiporyndardyń mańyzdy ekenin atap ótti. «Joǵary tehnologııamen jumys isteıtin osyndaı zaýyttar kóptep ashylsa, elimizdiń ekonomıkasynyń órkendeı túsýine óziniń oń yqpalyn tıgizedi. Basqa kompanııalar da osyndaı ozyq kásiporyndardan úlgi alýy kerek», dedi ol.
Ázirge jańa kásiporyn 1 mlrd teńgeniń tapsyrysyn alǵan. Bıyl shyǵaratyn transformatorlar sanyn jyldyń aıaǵyna deıin 4 myńǵa jetkizbek. Ázirge onda 80 adam jumys isteýde. Aıtýlaryna qaraǵanda, orta eseppen 250 myń teńgeden eńbekaqy alady. Árıne, ónimderi suranysqa ıe bolatyn osyndaı kásiporyndar ashyla berse nur ústine nur bolar edi.
PETROPAVL
