Mańǵystaý aýdany ákimdiginiń baspasóz qyzmeti habarlaǵandaı, Maǵaýııa Nurǵazıev bes jyldan beri jeke turǵyn úıiniń 200 sharshy metr aýmaǵyna jemis aǵashy men kókónis ósirgen. Bıyldan bastap qus sharýashylyǵy kásibin qolǵa aldy. Búginde ol 100-ge jýyq balapan baǵyp otyr. 10 shaqty kúrketaýyqtan kúnine 10-15 jumyrtqa alady. Sonymen qatar «Sezarka», «Adler», «Kúrketaýyq» jumyrtqalaryn ınkýbatorda kóbeıtýde.
– Qus ósirýdiń ózindik ádis-tásili bar. Jumyrtqa aldymen arnaıy ınkýbatorǵa salynady. Onyń ylǵaldylyǵy men jylýyn qadaǵalap otyrý qajet. Ár kún saıyn jylý kórsetkishin kóbeıtip, ylǵaldylyǵyn saqtap otyramyn. Belgili bir kúnnen keıin ınkýbatordy jeldetip, sol aralyqta jumyrtqanyń balapanǵa aınalýyn tekseremin. Eger tamyrlanbasa, onda ony ári qaraı ınkýbatorda saqtaýdyń qajettiligi joq. Inkýbatordan shyqqan soń arnaıy orynǵa balapandardy ornalastyramyn. Ol jerge jaryǵy, jylýy, sýy men jemi ýaqytpen jáne ólshemmen beriledi. Kúrketaýyqtyń shóbi men jemi bólek bolady. Qarapaıym taýyqtar sekildi kez kelgen jemdi jemeıdi. Sondyqtan ár taýyqtyń baby ár bólek, – deıdi Maǵaýııa Nurǵazıev.
Taýyqty qoldan ósirip, ony kóbeıtip, eti men jumyrtqasyn satýdy kózdegen Maǵaýııa aldaǵy ýaqytta «Pavlın» qusyn da ósirip, qus eti men jumyrtqasyn aýdan kóleminde damytqysy keledi.
Mańǵystaý oblysy
