Jýyrda Sozaq aýdanyndaǵy Ybyraı Altynsarın atyndaǵy mekteptiń 2002 jylǵy, ıaǵnı 20 jyl burynǵy túlekteri muqtaj otbasyǵa úı syılady. Oqý ordasyn bitirgen soń ártarapta júrgen túlekter birlesip salǵan úıdiń kilti kópbalaly otbasyǵa tabys etildi. Otaǵasy ekeýi 5 balany ósirip otyrǵan Gúljanat Qydyrbaevaǵa berilgen 4 bólmeli úıdiń jylý júıesi, baý-baqsha ósirýge arnalǵan 20 sotyq jeri bar. О́ziniń jeke úıi bolmaǵan Sholaqqorǵan aýylynyń turǵyny Gúlnara Jumanbaeva da baspanaly boldy. Tórt bala tárbıelep otyrǵan ana páter jaldap turyp kelgen. Esimin atamaýdy ótingen kásipker muqtaj otbasyǵa 5 bólmeli baspana tartý etti. «Túrkistan oblysynyń ákimi О́mirzaq Estaıulynyń bastamasymen oblys kóleminde «Qamqorlyq» jobasy qolǵa alynǵan. Sozaq aýdanynan kómekke muqtaj 32 otbasy anyqtaldy. Búginde turmysy tómen otbasylarǵa azyq-túlik, kómir otynymen qamtý jáne ózge de qajetti kómekter kórsetilip keledi. Búgin júregi keń kásipker azamat aýdanymyzdyń turǵynyna úı tartý etti. Aýdanda búgingi tańǵa deıin «Qamqorlyq» baǵdarlamasy aıasynda 9 úı berildi», dedi turǵyn úı kiltin tabystaǵan aýdan ákimi Muhıt Turysbekov.
Aýdan ortalyǵynan berilgen úı kommýnaldyq qyzmetterge qosylǵan. Baý-baqsha ósirýge arnalǵan jeri bar. Jer ýchaskesi qosalqy sharýashylyqty damytýǵa múmkindik beredi. Bul, ásirese bala tárbıesine baılanysty jaldamaly jumyspen aınalysýǵa múmkindigi joq otbasy úshin óte mańyzdy.
Qazyǵurt aýdanynyń azamattary da az qamtylǵan otbasyǵa úı salyp berdi. Saraphana aýyly, Taldybulaq eldi mekeninde boı kótergen turǵyn úı jıhazdarmen qamtylǵan. Aýyl azamattary mektepti bitirgenderine 20 jyl tolýyna oraı osy ıgi isti qolǵa alýdy jón kóripti. Aýyldastarynyń qoldaýymen jańa qonysqa jaıǵasqan otbasyǵa demeýshiler azyq-túlik pen qajetti úı jıhazdaryn jetkizip berýde. Jańa úıge kirgen azamat jomart júrekti dostaryna, aýyldastaryna alǵysyn aıtty. Al Ordabasy aýdanynda turatyn jalǵyzbasty anaǵa baspana kiltin shymkenttik kásipker Ǵanı Nurjigitov ózi arnaıy kelip usyndy. Eki qyz, úsh uldy tárbıelep otyrǵan Mereke Úsenbaeva atymtaı jomartqa rızashylyǵyn bildirdi. Sonymen qatar kásipker jalǵyzbasty ananyń otbasyna turmystyq tehnıka syıǵa tartty. Úlgi eterlik osyndaı qaıyrymdylyqtyń nátıjesinde Túrkistanda taǵy bir otbasy baspanaly boldy. «Bekzat Sattarhanovtyń esimi berilgen shaǵyn aýdan turǵyndarynyń qaıyrymdylyq isi kópke úlgi. Jastardyń ultjandylyǵy kóńilimizge medeý bolyp júr. Osymen er Bekzattyń inileri az qamtylǵan otbasylarǵa qajetti turmystyq-tehnıkalarmen jabdyqtalǵan 7 baspanany tabystady. Uıymshyldyq tanytyp, qaıyrymdylyq iske úles qosqan zamandastaryma alǵys bildiremin. Estafeta kelesi 20 jyldyq túlekterine joldanady», deıdi shaǵyn aýdan turǵyny Beksultan Tileýbekov.
О́ńirdiń barlyq derlik aýdandarynda jasalyp kele jatqan qaıyrymdy jandardyń úlgili isi jalǵasyn tabary anyq. Osylaı baspanaǵa muqtaj jandardyń qatary az da bolsa azaıa túser. Degenmen halyqtyń turǵyn úıge suranysyn asarlatyp qamtamasyz ete almasymyz beseneden belgili. Bul oraıda oblysta memlekettik baǵdarlamalar aıasynda turǵyn úı qurylysy qarqyndy júrgizilýde. Úkimettiń keńeıtilgen otyrysynda Memleket basshysy Qasym-Jomart Toqaev byltyr elimiz boıynsha 17 mln sharshy metr turǵyn úı salynǵanyn, bul – buryn eshqashan bolmaǵan kórsetkish ekenin atap ótti. Al bıyl byltyrǵydan 1 mln sharshy metr artyq úı salynady dep josparlanyp otyrǵanyn jetkizdi. Qurylystyń mundaı qarqynyna kommýnaldyq ınfraqurylymnyń ilese almaı jatqany da aıtylyp, naqty tapsyrmalar berilgen bolatyn. Jýyrda Túlkibas aýdany, Sastóbe kentinde «Nurly jer» baǵdarlamasy aıasynda 64 páterlik turǵyn úı el ıgiligine paıdalanýǵa berildi. Iаǵnı aýdanda turǵyn úı kezeginde turǵan 2 700-den astam azamattyń 64-i baspanaly boldy. Onyń ishinde baspana 24 kópbalaly, 2 tolyq emes otbasyǵa, 13 ata-ana qamqorlyǵynsyz qalǵan balalarǵa, bıýdjet salasynyń qyzmetkerine jáne kent ortalyǵyndaǵy úıleri apatty dep tanylǵan 23 turǵynǵa berildi. Al oblys ortalyǵy Túrkistandaǵy jańa qala aýmaǵynda salynǵan 5 313 páter bıyl paıdalanýǵa berilmek. Páterlerdiń jalpy aýdany – 345 myń sharshy metr. Onyń ishinde 4 039 páter – kredıttik, al 1 274 páter kezektegi azamattarǵa beriledi. Ákimshilik-iskerlik ortalyqta 7, 9 jáne 12 qabatty jalpy 82 turǵyn úıdiń qurylysy memlekettik bıýdjet esebinen júrgizilýde, 10 kópqabatty úı mamyr aıynyń sońyna deıin tapsyrylady. Sondaı-aq Jetisaı qalasyndaǵy jańa qurylys aýmaǵynda 6 turǵyn úı bıyl paıdalanýǵa berilip, 200 otbasy baspanaly bolady.
Túrkistan oblysy
