«Ata Zańnyń barlyq jańa erejeleri Prezıdenttiń artyqshylyqtary men ókilettikterin arttyrýǵa emes, bılik tarmaqtary arasyndaǵy tejemelik ári tepe-teńdik júıesin nyǵaıtýǵa, barlyq azamattardyń múddelerin, quqyqtary men bostandyqtaryn qorǵaýǵa baǵyttalǵan. Konstıtýsııalyq ózgerister boıynsha búkilhalyqtyq erik bildirý jańa, ádiletti Qazaqstannyń berik irgetasyn qalaıtynyna senimdimin», dedi ol.
Sondaı-aq Prezıdent referendým bizdiń qoǵamnyń azamattyq jetilýine jáne saıası sanaǵa tekseris bolatynyn atap ótti. Ortalyq referendým komıssııasy men basqa da ýákiletti memlekettik organdar saılaý zańnamasynyń barlyq normalarynyń múltiksiz saqtalýyn qamtamasyz etedi. Daýys berý barysyn halyqaralyq baıqaýshylar men elimizdiń qoǵamdyq birlestikteriniń ókilderi baqylaıtyn bolady.
«Buryn-sońdy bolmaǵan geostrategııalyq belgisizdik pen elimizdiń aldynda turǵan kúrdeli mindetterdi sheshý qajettiligi jaǵdaıynda biz ózimizdiń birligimiz ben yntymaǵymyzben myqty bolýǵa tıispiz. Shynaıy demokratııa árbir azamattyń ortaq isine belsendi jáne jasampaz qatysýdy kózdeıdi. Jańa túzetýlerge daýys bere otyryp, siz sybaılas jemqorlyqqa, nepotızmge, saıasat pen ekonomıkadaǵy monopolııaǵa qarsy sheshim qabyldaısyz», dedi Prezıdent óz sózinde.
