Dástúrli týrnırdi grek-rım kúresi sheberleri bastady. Bul jarysta Iran men Túrkııa qurama komandalarynyń qarqyny óte kúshti boldy. Parsy eliniń pehlevandary tórt altyn oljalasa, Anadoly eliniń apaıtósteri úsh ret jeńis tuǵyrynyń eń bıik satysyna kóterildi. Úzdik úshtikti Qazaqstannyń balýandary túıindedi. Olar dál ırandyqtar sekildi 10 júlde ıelengenimen, medaldardyń sapasy jaǵynan basty qarsylastarynan qalyp qoıdy. Bizdiń jigitterge buıyrǵany – 1 altyn, 4 kúmis jáne 5 qola. Odan keıingi satylarǵa О́zbekstan (1+0+5), Qyrǵyzstan (1+0+4), Grýzııa (0+2+0) jáne Úndistan men Tájikstan (0+0+1) quramalary jaıǵasty.
Qazaqstannyń balýandary arasynan Qaharman Qısymetovtiń ǵana asyǵy alshysynan tústi. 77 kılo salmaq dárejesinde synǵa túsken ol alǵashqyda qyrǵyzstandyq Rınat Ilııasuly men grýzııalyq Kvısha Ananıdzeni qapy qaldyryp, fınalǵa joldama aldy. Sheshýshi tusta óziniń komandalyq áriptesi Demeý Jadyraevpen kúsh synasty. Kópshilik Jadyraevtyń jeńetinine kúmán keltirgen joq. О́ıtkeni onyń álem chempıonatynyń kúmis júldegeri degen dardaı ataǵy bar. Jáne de Demeý Tokıo Olımpıadasyna qatysty. Biraq Qaharman onymen esh qaımyqpaı aıqasty. Nátıjesinde, bir ǵana upaı aıyrmashylyǵymen jeńiske jetip, bas júldeni qanjyǵasyna baılady.
Qaharman renjı qoımas, biraq sol kúni kópshiliktiń yqylasy odan góri 72 kılo salmaqtaǵy Meıirjan Shermahambetke kóbirek aýdy. О́ıtkeni ol óziniń elishilik jarystardaǵy basty qarsylastarynyń biri Azat Sadyqovqa san soqtyrǵannan keıin Olımpııa oıyndarynyń jeńimpazy, álem jáne Azııa chempıony Mohammad Reza Geraeımen kezdesti. Bul aıqasty kórgende arman da, kórmegen de armanda. Qazaqtyń qaısar uly eshkimnen jeńilmegenine talaı jyldyń júzi bolǵan jampozǵa adym ashtyrmady. О́te saýatty taktıka quryp, únemi onyń aldyn orap otyrdy. Ataǵy alysqa jaıylǵan Geraeı sharasyz kúı keshti. Tablodaǵy esep 7:3-ke jetkende báseke toqtatyldy. Sol kezde Balýan Sholaq atyndaǵy sport saraıyna jınalǵan jankúıerlerdiń talaı shattanǵanyn kórseńizder ǵoı, shirkin! Ony qur sózben aıtyp jetkizý tipten múmkin emes!
Alaıda Shermahanbetke Almatyda altyn tuǵyrǵa kóterilý baqyty buıyrmady. Sebebi bul salmaqtaǵylardyń sany az bolǵandyqtan jarys aınalmaly júıe boıynsha ótti. Jerlesimiz kelesi kezdesýinde ózbek Jamol Jumabaevtyń 36 sekýndta aıaǵyn kókten keltirse, Geraeı ózge qarsylastaryn sypyra utty. Sodan erejege saı qos myqty qaıta fınalda kúsh synasýǵa tıis edi. Biraq Meıirjannyń jaraqat alǵany belgili bolyp, ol bozkilemge shyqpady. Nátıjesinde, bas júldeni ırandyq sportshy ıelense, bizdiń jigit kúmis medaldy qanaǵat tutty. «Áttegen-aı!» dep aıtqannan basqa amal qalmady.
Sol sekildi Marlen Muqashev (55 kılo) pen Baǵlan Jaqansha (63 kılo) kúmispen kúptelse, Ernur Fıdahmetov (60 kılo), Madııar Maltekbaev pen Sultan Ásetuly (67 kılo), Oljas Syrlybaı (97 kılo) jáne Anton Savenko (130 kılo) qola medaldardy moıyndaryna ildi. Nesine jasyraıyq, talaı baıraqty básekede Qazaq eli namysyn abyroımen qorǵaǵan Qorlan Jaqansha (55 kılo), Meırambek Aınaǵulov (63 kılo), Azamat Qustybaev pen Nursultan Tursynov (87 kılo) jáne Álimhan Syzdyqov (130 kılo) syndy sańlaqtarymyzǵa osy joly úlken senim artqan edik. Biraq olar jarty jolǵa jetpeı súrindi.
О́zbek Jalǵasbaı Berdimuratov (álem chempıonatynyń qola júldegeri, Azııa chempıony) pen Rýstam Assakalov (álem chempıonatynyń eki dúrkin júldegeri, Azııa oıyndarynyń jeńimpazy, Azııanyń úsh dúrkin chempıony) jáne qyrǵyzstandyq Jolaman Sharshenbekov (álem chempıonatynyń eki dúrkin kúmis júldegeri, álem kýbogynyń ıegeri) Almatydaǵy jarysta úzdik úshtiktiń qataryna áýpirimdep júrip ázer qosyldy. Al grýzııalyq Iаkob Kadjaıa (Tokıo Olımpıadasynyń kúmis júldegeri, álem chempıonatynyń eki dúrkin qola júldegeri, Eýropa oıyndarynyń jeńimpazy) men ırandyq Meısam Dalhanı (álem chempıony) syndy dúldúlder múlde júldesiz qaldy. Osy jaıttyń ózi-aq, «Bolat Turlyhanov kýbogy» dep atalatyn reıtıngtik týrnırdiń deńgeıi qanshalyqty joǵary bolǵanyn ańǵartsa kerek.
Grek-rım kúresinen ótken jarystyń jeńimpazdary:
55 kılo – Poıa Papa Marz (Iran), 60 kılo – Alı Reza Nedjatı (Iran), 63 kılo – Kerem Kamal (Túrkııa), 67 kılo – Abror Atabaev (О́zbekstan), 72 kılo – Mohammad Reza Geraeı (Iran), 77 kılo – Qaharman Qısymetov (Qazaqstan), 82 kılo – Aqjol Mahmýdov (Qyrǵyzstan),
87 kılo – Ramın Taherısartang (Iran), 97 kılo – Metehan Basar (Túrkııa) jáne 130 kılo – Osman Iyldyrym (Túrkııa).
Áıelder kúresinen ótken jarysta Úndistan quramasyna teń keler eshkim tabylmady. Olar sarapqa salynǵan bas júldeniń teń jartysyn oljalady. Jalpy júldeleriniń sany 8 (5+1+2). Ekinshi oryndy Qazaqstannyń sulýlary (2+3+1) oljalady. Mońǵolııa (2+1+3) men Qyrǵyzstannyń (1+0+1) burymdylary úsh pen tórtinshi satyǵa jaıǵassa, О́zbekstan (0+2+3), Ázerbaıjan (0+2+2) jáne Mysyr (0+1+0) elderi júlde alǵan komandalardyń qatarynda.
Jerlesterimizdiń arasynan Marına Sedneva (55 kılo) men Mádına Baqbergenova (72 kılo) altynnan alqa taǵynsa, Juldyz Eshimova (53 kılo), Emma Tısına (57 kılo) jáne Irına Kýznesova (62 kılo) kúmis medaldy
moınyna ildi. Al Dıana Kaıýmova (59 kılo) qolaǵa qol sozdy.
