Onyń birge týǵan Sultanbek, Musylmanbek, Asylbek, Omarbek, Muratbek esimdi bes uly men Jamal atty qaryndasy bolǵan. Asylbektiń ákesi 1901 jyly aýyr syrqattan qaıtys bolypty. Alty balanyń anasy Qadısha Áıtpenqyzy balalarynyń jaqsy mamandyq ıeleri bolýyn kóksep, qanshama qıyndyq kórse de, olardyń oqýyn jalǵastyrýyna muryndyq bolady. Sóıtip júrip, aıaýly ana uldary Sultanbekke – topograf, Musylmanbekke – muǵalim, Asylbek pen Muratbekke dáriger mamandyqtaryn ıgertedi. (Omarbek jastaı aýyr naýqastan qaıtys bolady).
1913 jyly Omby gımnazııasyn úzdik baǵamen bitirgen Asylbek Tomsk ýnıversıtetiniń dárigerlik fakýltetinde 4 jyl bilim alǵan. Sońǵy eki jylyn Aqmola gýbernııasy zemstvosynyń járdem qarjysymen oqıdy da, qarajatyn alǵan soń, dárigerlik qyzmetti Aqmola ýezinen bastaıdy. Osy kezde ol Aqmola oblystyq qazaq komıtetiniń múshesi bolyp saılanyp, qoǵamdyq qyzmetke de aralasa bastaıdy.
О́z salasynda jáne qoǵamdyq qyzmetterde tanylyp qalǵan Asylbek 1917 jyly Orynbor qalasynda ótken Birinshi Búkilqyrǵyz sezine delegat bolyp qatysady. Asylbek Seıitov jóninde Sáken Seıfýllın «Tar jol taıǵaq keshý» atty kitabynda keńirek toqtalady. Osydan-aq onyń tegin tulǵa emesin ańǵaramyz.
1922 jyly Asylbek Semeı qalasynyń gýbernııalyq densaýlyq saqtaý bólim meńgerýshisi qyzmetine aýystyrylady. Densaýlyq saqtaý salasyna tájirıbeli dáriger-mamandy jınap, «Aýyl» shıpajaıyn jáne «Berezovka» saýyqtyrý ortalyǵyn qurady. Qaıda júrse de, eliniń densaýlyǵyn, bolashaǵyn oılaǵany osydan bilinedi.
Almatydaǵy Densaýlyq Halyq komıscarıatynyń josparlaý bóliminiń meńgerýshisi qyzmetine shaqyrylǵan bilikti mamanǵa, Almaty temeki fabrıkasyna qarasty dárigerlik pýnkttiń bas dárigeri mindetin qatar atqarý júkteledi. 1937 jyldyń 25 qarashasynda deıin burynǵy Lenın, qazirgi Jetisý aýdanyna qarasty №5 emhananyń ashylýyna shuǵyl tapsyrma beriledi. Ýaqyt tyǵyzdyǵyna qaramastan, mindetti belgilengen merzimnen bir apta buryn oryndap, ózi bas dáriger bolyp taǵaıyndalǵan Asylbek Jumanuly 1937 jyldyń 3 jeltoqsanynda jazyqsyzdan-jazyqsyz, tutqyndalyp kete barady.
Al Asylbektiń jary Nafıǵa Sadýaqasqyzy ádildik izdeýmen bir jylǵa jýyq ýaqyt túrme esigin tozdyrýmen júrgende kenetten qaıtys bolady. Artynda qalǵan qyzdary on bes jastaǵy Roza men segiz aılyq Klara baspanasyz, qaraýsyz kóshede qalady. Qos baldyrǵan qaıyrymdy jandardyń kómegimen el qataryna qosylypty. Búginde olardyń ekeýi de urpaq súıip otyr.
Ákesiniń jazyqsyz jazaǵa kesilgenin el-jurtqa dáleldeý Klara Asylbekqyzyna ońaıǵa soqqan joq. Eline eńbek etý jolynda naqaq ketken ákesi tek 1957 jyldyń sáýir aıynda ǵana jazyqsyz dep aqtalady. Azaptaý lagerinde ótken jıyrma jyly onyń eline jasaǵan eńbegin joqqa shyǵara alǵan joq. Biraq eli úshin týǵan esil er atylyp ketti.
1996 jyly Klara Asylbekqyzynyń ótinishi boıynsha Almaty oblysy men qujattar basqarmasy bergen S-39 tańbaly anyqtamada jarty ǵasyrdan astam ýaqyt NKVD organdaryndaǵy qupııa istiń betperdesi ashylǵan. 1937 jyldyń 3 jeltoqsanynda Asylbek Seıitovpen tergeý kezinde kezdesken qarjy mekemesiniń qyzmetkerleri: «1933 jyly úıinde otyrǵanda onyń Keńes ókimetin qaralap, qazaqty jer betinen qurtý úshin ashtyqty qasaqana uıymdastyrdy, halyqty budan qutqarýdyń birden-bir amaly – Qytaıǵa jappaı kóshirý degen usynys aıtyp, bizdi úgittedi», dep kýálik jasapty. Sonymen Asylbek Jumanulynyń qylmysy úsh-aq táýlikte anyqtalyp, atý jazasyna kesilgen. Úkim sol kúni oryndalǵany belgili bolady. Biraq 1957 jyly oblystyq prokýratýra qaıta jaýapqa shaqyrǵanda, kýágerler burynǵy jaýaptarynan tanyp, janymyzdan qoryqtyq degen syltaý aıtady. Osylaısha, 20 jyldan keıin Asylbek Seıitov «halyq jaýy» degen jaladan aqtalady. Klara Seıitova ákesi jóninde derekter izdestire júrip, onyń qazaq halqy úshin atqarǵan qyrýar sharýalarynyń kýási bolady.
Asylbek Jumanuly tek halqynyń densaýlyǵyn oılaǵan ashyq oıly azamat qana emes, bilikti qoǵam qaıratkeri, ultyn súıgen ultjandy perzent ekenine de kóz jetkizetin ýaqyt keldi. Maǵjan Jumabaev, Ahmet Baıtursynov, Ilııas Jansúgirov, Sáken Seıfýllın sııaqty uly tulǵalarmen syrlas, teń turǵyda sóılese alatyn úzeńgiles bolǵan Asylbek Jumanuly syndy azamattardyń eńbegin búgingi urpaqtar, árıne, jadyna saqtaýǵa tıis. Qoǵam qaıratkeri, dáriger Asylbek Jumanulynyń qujattary 2002 jyly qyzy Klara Seıitovanyń tapsyrýymen Almaty qalasy Ortalyq memlekettik muraǵatyna turaqty saqtaýǵa alynyp, № 357 jeke adamnyń qalyptasý qory berilgen. Almaty qalasy Ortalyq memlekettik muraǵat sarapshysy Láılá Rahıpovanyń usynysymen osy materıaldy oqyrman nazaryna jetkizip otyrmyz.
Onyń óshpes esimi «Azaly kitaptyń» birinshi tomyna engizildi. Semeı qalasynda bir kóshege Asylbek Seıitov esimi berilse, Almaty qalasyndaǵy Jetisý aýdanynda 1937 jyly Asylbek Jumanuly irgetasyn qalaǵan №5 kópsalaly emhana qabyrǵasyna eskertkish taqta qoıyldy. Nebir qıyn qystaý kezde de elin umytpaǵan, tipti, sol úshin janyn qıǵan Asylbek Seıitov esimi umytylmaq emes. Umytylmaıdy da.
