NURIS bıznes-ınkýbasııalaý jáne akselerasııa baǵdarlamasynyń túlekteri jetistikterin kórsetti. Atap aıtqanda, E-Commerce, Education & HR, AgriTech jáne HealthTech salalaryndaǵy máselelerdiń sheshimderin 23 startap arqyly usyndy. Sondaı-aq Demo Day jańa baılanystardy tabýǵa jáne seriktestik ornatýǵa baǵyttalǵan 100-den astam qatysýshyny biriktirgen tıimdi kommýnıkasııa alańyna aınaldy. Is-sharaǵa 50-ge jýyq uıym, onyń ishinde ulttyq kompanııalar, venchýrlyq qorlar, halyqaralyq konsaltıngtik uıymdar, bankter, ýnıversıtetter, bıznes-qaýymdastyqtar, iri kompanııalar qatysty.
«Inkýbasııa – erte kezeńdegi startaptarǵa qoldaý jasaıtyn baǵdarlama, al akselerasııa ósý, ári qaraı damý, shetelderge shyǵý, ınvestısııalaý qajet bolǵan startaptarǵa qoldaý kórsetýdi qamtıdy. Bizge ıdeıamen kelip, 3 aı ishinde belgili bir bıznes týraly trenıngterge qatysyp, ekspertterdiń, Nazarbaev Ýnıversıtetiniń professorlarynan aqyl-keńes alady. Sonymen qatar bıznes mamandarymen jeke kezdesý uıymdastyrý arqyly óz jobalaryn jetildirip, damytady. Búginde mine, keıbireýleri alǵashqy satylymǵa jetti, al keıbireýleri ózderiniń prototıpterin jasap, ınvestorlarǵa jáne óziniń seriktesterine usynyp otyr. Inkýbasııa jobasy aıasynda eń úlken jetistikterge jetken úzdik startaptarǵa NURIS óz atynan 2 mln teńgege deıin qarjylaı qoldaý kórsetti», dedi NURIS bıznes-ınkýbatorynyń menedjeri Arnagúl Qabyken.
Grant utyp alǵandardyń qatarynda Elnur Qaınarbek, Dmıtrıı Nam jáne Altyngúl Taıbasarova bar. E.Qaınarbek oılap tapqan GoDays qosymshasy paıdalanýshylardyń ónimdiligin arttyrýǵa kómektesedi. Al D.Nam jetekshiligimen jasalǵan B2B naryǵy – A2optics startapy optıkaǵa arnalǵan.
Úshinshi jeńimpaz, BALAM mobıldi qosymshasyn jasaǵan A.Taıbasarovany sózge tartqan edik. Ol eki balanyń anasy, mektepke deıingi bilim berý salasynda eńbek etedi. Altyngúl balabaqshadan alǵan tájirıbesi arqyly balabaqsha ákimshiligi men tárbıeshilerdiń, ata-analardyń kez bolatyn máselelerimen tanys. Osy máselelerdiń ınnovasııalyq sheshimi retinde Altyngúl jáne onyń toby BALAM mobıldi qosymshasyn oılap tapty.
«Bul mobıldi qosymsha qazirgi barlyq balabaqsha máselesin sheshedi. Birinshiden, balabaqshada isteıtin árbir qyzmetker kúnine 2 saǵatyn tek qana ata-analarmen áleýmettik jelide hat almasý úshin, sonymen qatar qaǵaz jumystaryna jumsaıdy. Osylaısha, balaǵa tıisti kóńil bólinbeıdi. Ekinshiden, óte kóp balanyń allergııasy bar. Balabaqshada bul aqparat ártúrli jerde saqtalady jáne tárbıeshi nazarynan tys qalýy da múmkin. Sonyń saldarynan bala densaýlyǵyna zııan keledi. Al mektepke deıingi uıymnyń bedeline teris áser etedi. Bizdiń mobıldi qosymsha osy máseleniń bárin sheship, balabaqshaǵa: ata-analarmen qarym-qatynasty jaqsartýǵa; ata-analardyń qanaǵattaný deńgeıin eki ese arttyrýǵa; oqýshylar týraly barlyq mańyzdy aqparatty bir jerde saqtaýǵa múmkindik beredi. Osy kúni biz Nur-Sultannyń 3 balabaqshasynda qosymshanyń jobalyq nusqasyn iske qostyq, taǵy 5 balabaqsha qosymshanyń júrgizilýin kútip otyr. Bolashaqta budan da kóp mekeme bizge qosylady dep úmittenemiz», dep bólisti A.Taıbasarova.
Budan bólek taǵy 3 startap «Eń úzdik ınnovasııalyq sheshim», «Eń úzdik pıtcher» jáne «Eń úzdik dızaın» atalymy boıynsha yntalandyrý syılyǵyn ıelendi.
Arýjan NAǴAShYBAI,
L.N.Gýmılev atyndaǵy Eýrazııa ulttyq ýnıversıtetiniń stýdenti
