Búgingi tańda «Qurmanǵazy – týǵan jer» qoǵamdyq qory balalardy eńbekke baýlý, olarǵa kókónis ósirý tehnologııalaryn úıretý maqsatynda Orly aýylynda Nuǵman Manaev atyndaǵy jalpy orta mektepte jylyjaıdyń qurylys jumystaryn júrgizip jatyr. Jaqyn arada munda kókónister egilip, oqýshylarǵa arnalǵan praktıkalyq sabaqtar ótkizilmek. Bul sabaqtarda jasóspirimder kókónistiń túrlerin kútý daǵdylaryna, sýarý tásilderine, túrli mıneraldarǵa qatysty biliktiligin arttyra alady. Qoǵamdyq qor jetekshisi Azamat Abdýllaevtyń aıtýyna qaraǵanda, joba oqýshylarǵa bolashaq mamandyqtaryn tańdaýǵa septigin tıgizip qana qoımaı, aýdan jastary arasynda volonterlik qozǵalystyń jandanýyna arqaý bolady.
«Bizdiń aýdanda 32 mektep bar. Bir ókinishtisi, olardyń eshbirinde jylyjaı joq. Jylyjaıdy mektepte ornatý arqyly biz oqýshylardy eńbeksúıgishtikke shaqyramyz, óz eńbegimen taza ónim alýdy úıretemiz. Jylyjaıda arnaıy sabaqtar ótkizemiz. Bizge kórshi mektepterdiń de oqýshylary keledi. Olar volonterlik negizde aýdanymyzdyń kógaldanýyna óz úlesin qosady. Tipti mundaı sharalar sabaqtarǵa qatysatyn balalardyń bolashaqta agronomııa sııaqty mamandyqty tańdaýyna sep bola alady», deıdi Azamat Abdýllaev.
Jobany «Qurmanǵazy – týǵan jer» qoǵamdyq qory «Shell Qazaqstan» kompanııasy jáne Azamattyq bastamalardy qoldaý ortalyǵynyń «EkoBatys» bastamasy sheńberinde iske asyrady. Qor basshysy jylyjaıdyń qurylys jumystaryn maýsymda aıaqtap, egý sharalaryn bastaýdy josparlap otyr.
