Tórt jumysshy kóz jumdy

Usta-baspaq sehyndaǵy №9 termııalyq peshtiń otqa tózimdi kirpishpen qalanǵan qabyrǵasyn buzý kezinde, istemeı turǵan nysannyń tóbesi qulap, sol jerde jumys istep júrgen bes adamdy basyp qalǵan. Ba­qyt­syz oqıǵanyń saldarynan sol jerde tórt jumysshy kóz jumyp, bireýi aýrýhanaǵa jet­kizildi. Dárigerler bergen sońǵy aqparatqa qaraǵanda, ju­mysshynyń densaýlyq jaǵdaıy túzelip kele jatqanǵa uqsaıdy.

Apatty oqıǵa týraly aq­parat jarııa bolysymen, oqıǵa ornyna Qaraǵandy obly­sy­nyń ákimi Jeńis Qasymbek, tótenshe jaǵdaı departamenti jáne ónerkásiptik qaýipsizdik mekemeleriniń basshylary jedel túrde jetti. Quramynda 27 qyzmetker men jeti birlik tehnıkasy bar TJD qutqarýshy toby jáne «Seriktes О́rt Són­dirýshi» JShS-niń on qyzmetkeri úıindilerdi arshyp, jumysqa qyzý kirisip ketti.

Eńbek kodeksiniń talaptaryna sáıkes, eńbek jónindegi ýákiletti organnyń ókimimen komıssııa qurylyp, qazirgi ýaqytta jazataıym oqıǵanyń sebep-saldaryn anyqtaý maqsatynda arnaıy tekserý júrgizilip jatyr.

Tótenshe oqıǵadan habardar bolǵan Prezıdent Qasym-Jomart Toqaev qaza bolǵan jumysshylardyń jaqyndary men týystaryna kóńil aıtý jedelhatyn joldady.

«ArselorMıttal Temirtaý» aksıonerlik qoǵamynyń sehynda bolǵan apat saldarynan qazaǵa ushyraǵan jumys­shylardyń otbasylary men týǵan-týystarynyń qaıǵysyna ortaqtasyp kóńil aıtamyn. Zardap shekken azamattardyń tezirek saýyǵyp ketýin tileımin. Úkimetke jáne Qaraǵandy obly­synyń ákimine qaıǵyly oqıǵanyń sebepteri men mán-jaıyn anyqtaý úshin shuǵyl sharalar qabyldaýdy jáne qaza tapqandar men zardap shek­kenderdiń otbasylaryna kómek kórsetýdi tapsyrdym», dep jazylǵan Memleket bas­shysynyń jedelhatynda.

Qaraǵandy oblysynyń bu­rynǵy ákimi, Parlament Máji­lisiniń tóraǵasy Erlan Qo­sha­nov ta jazataıym oqıǵa týraly pikir bildirip, ony «óte aýyr synaq» dep atady. Sondaı-aq ol jaǵdaıdyń «Prezıdenttiń baqylaýynda» ekenin de málim etti.

Budan bólek óńir basshysy Jeńis Qasymbek te qaza tapqan jumysshylardyń otbasy men týǵan-týystaryna kóńil aıtyp, qara jamylǵan shańyraqtarǵa qajet bolǵan kómektiń bári jasalatynyn jáne apatqa kináli adamdardyń jaýapqa mindetti túrde tartylatynyn málim etti.

Qaza bolǵan tórt jumysshy­nyń ekeýi О́zbekstannan kelip, azamattyq alǵan qandas­tar eken. Bul týraly Dúnıe­jú­zilik qazaqtar qaýym­dasty­ǵy Qaraǵandy oblystyq fılıa­lynyń basshysy Merýesh Bashaı habarlady. «Eki azamattyń da ata-anasy О́zbekstanda turady. Olardyń Qazaqstanǵa kelip-qaıtýyna О́zbekstan elshiligi de barynsha kómek kórsetip jatyr», dep habarlady M.Bashaı.

Budan bólek, apatty oqıǵa málim bolǵannan keıin, «ArselorMıttal Temirtaý» kom­panııasynyń qańyltyr qaqtaý sehynda on jyldan astam ýaqyt jumys istegen Erkebulan Sabıtov esimdi azamat óziniń feısbýk paraqshasynda ashý-yzaǵa toly jazba qaldyrdy. Onda ol alpaýyt kásiporynda jyldan-jylǵa kisi ólimimen aıaqtalatyn apattardyń jıilep ketkenin aıta kelip, bylaı dep jazady: «Qazirgi tańda barlyq tehnologııa eskirgen, adam kúshiniń arqasynda ǵana tur. Zaýytqa adam almaıdy, kadr tapshy. Dıplomyń bola tura jumysqa turý – qııamet-qaıym. Barlyq ǵımarattardyń, qubyrlar men jabdyqtardyń ábden tozyǵy jetken. Basshylar qarajat quıýǵa qulyqsyz. Aq­sha salǵannyń ózinde, ony ón­diriske jaýapty basshylar talan-taraj qylady. Bir sózben aıtqanda, basshylardyń bári «shabadannyń» ústinde otyr. Bul jaǵdaıǵa tikeleı osy basshylar kináli. Sebebi jemqorlyq jaılaǵan, azyn-aýlaq bólingen qarajat dittegen jerine jetpeıdi...».

Alpaýyt kásiporyn úshin adam ómiriniń sonshalyqty arzandap ketkeni alańdatady. Bul jaıynda buǵan deıin de talaı aıtylǵan, biraq budan tıisti qorytyndy shyǵar emes. Tegi «ArselorMıttal Te­mir­taý» kompanııasyndaǵy eń­bek qa­ýipsizdiginiń máse­lesin maı­shammen qarap, taǵ­dyr­­sheshti qatań sheshimder qa­byl­damaıynsha adam ólimimen aıaq­talatyn oqıǵalardyń legi taýsylmaıtyn tárizdi.

Qaraǵandy oblysy