Bul aty men zaty erekshe konsert Memleket basshysy Qasym-Jomart Toqaevtyń bastamasymen qurylǵan Abaı oblysynyń resmı ashylýy kezeńine jáne álemdik deńgeıdegi zańǵar jazýshy Muhtar Áýezovtiń týǵanyna 125 jyl toýyna arnaldy.
«Qutty qonaq kelse, qoı egiz tabady» degendeı, dál sol kúni Eýrazııa ýnıversıtetiniń álemdik QS World University Rankings reıtıngi boıynsha 277 oryndy ıelengeni málim etildi. Dúnıejúziniń úzdik 3 myń ýnıversıteti arasynan osylaı alǵy shepten kóriný – tamasha jetistik! Bul – Qazaqstan joǵary biliminiń abyroıy.
Jańa Qazaqstanmen birge qaıta jańarǵan Abaı oblysyndaǵy Ámire Qashaýbaev atyndaǵy memlekettik fılarmonııa – 77 jyldyq tarıhy bar óner ujymy. Áý basta onyń irgetasyn qalaǵan ánshi-kúıshilerdiń shyǵarmashylyǵyn klassık-jazýshy Muhtar Áýezovtiń ózi tamashalap, joǵary baǵa bergeni de málim.
О́ner ujymy keıin, 1965 jyly «oblystyq memlekettik fılarmonııa» mártebesin aldy. 1969 jyldan ataqty ánshi Ámire Qashaýbaevtyń esimin ıelendi. Atalǵan memlekettik fılarmonııanyń tarıhy men óner taǵylymy aıryqsha. Mádenıet Eshekeev, Bolat Sybanov, Daýyl Haırýllın, Keldenbaı О́lmesekov, Roza Baıdalına, Máýlen Masalımov, Marhaba Kerimqulova, Saǵı Mekishov, Myrzaǵalı Aıdabolov, Rahymbek Noǵaıbaev, Joldybaı Dástenov, t.b. burynǵy-keıingi semeılik shyǵarmashyl tulǵalardyń esimi otandyq mádenıet tarıhyna engenin maqtanyshpen aıtýǵa bolady.
Sońǵy jyldary fılarmonııany basqarýǵa EUÝ-da qyzmette shyńdalǵan Qazaq ulttyq mýzyka akdemııasynyń túlegi, mádenıettaný magıstri, tanymal kúıshi Aıbek Bekbosyn basqaryp júr.
«Abaı jolymen» konserti atalǵan fılarmonııanyń «Bıbigúl qazaq halyq aspaptar orkestri» súıemeldegen A.Bekbosynnyń uly Abaı men onyń aqyndyq aınalasyna, dańqty abaıtanýshylarǵa arnalǵan «Telǵara» kúıimen ashyldy. Jınalǵan elorda zııalylary men oqytýshy-ǵalymdar sahnada óner kórsetken dırıjerler – Nurlan Tókeı, Ádilet Serikov, ánshiler – Maprýza О́týlenova, Erkebulan Musaev, Gúldana Noǵaıbaeva, Áıgerim Toqtybaeva, Áıgerim Áshirova, Dına Isbekova, Kenjegúl Aqshekına, Jasulan Tájıev, dombyrashylar – Ádilet Serikov, Erzat Maǵýfarov, Dýman Nurqamysov, Erbolat Talaphan, t.b. izdenisi men talǵamyna, sezim pernesin dóp basqanyna rıza boldy. Uly Abaıdan bastap otandyq kompozıtorlardyń, álemdik tulǵalardyń klassıkalyq murasy shyrqaldy. Sonymen birge Nurbek О́mirbekov pen «Dala úni» akapellasy oryndaǵan M.Dýlatulynyń «Alash marshy» jurtshylyqtyń eldik rýhyn shyńdaı tústi.
Á.Qashaýbaev atyndaǵy memlekettik fılarmonııa ónerdegi jáne rýhanııattaǵy Abaı jolyn, Muhtar dástúrin jańa deńgeıde ákelgenine kýá boldyq. Kesh sońynda ýnıversıtet rektory Erlan Sydyqov elorda jurtshylyǵy atynan Á.Qashaýbaev atyndaǵy memlekettik fılarmonııa ujymyna rızashylyǵyn jetkizdi.
