«Birinshi kezekte, osy standartty ázirleý Úkimettiń tapsyrmasy boıynsha Ishki ister mınıstrliginiń bastamasymen júrgizilgenin atap ótken jón. Osy standart aıasynda biz samokattyń 25 km/saǵ deıingi maksımaldy jyldamdyǵyn, sondaı-aq jaıaý júrginshiler rejıminiń múmkindigin qarastyrdyq», dedi ol qujatty talqylaý boıynsha kezdesý barysynda.
Ulttyq standartqa sáıkes elektr samokat - bul oryndyǵy joq, elektr qozǵaltqyshyn paıdalaný arqyly bir adamnyń qozǵalýyna arnalǵan eki nemese úsh dóńgelegi bar jeke mobıldilik elektr kóligi. Standartty ázirleýshiler elektr samokattardyń barlyq túri úshin maksımaldy jyldamdyqty engizýdi usynady. Ol saǵatyna 25 shaqyrymnan aspaıdy. Qazaqstanda samokatshylardyń qatysýymen apattyń jıi bolýyna baılanysty jyldamdyq shekteledi.
Ishki ister mınıstrligi málimetinshe, 2021 jyly Qazaqstanda samokattardyń qatysýymen 68 apat bolyp, bir adam kóz jumǵan. 71 adam zardap shekti. Bıyl samokatshylardyń qatysýymen 41 apat boldy.
Eger erejeler qabyldanyp, zańnamaǵa tıisti túzetýler engizilse, elektr skýter óndirýshileri kólikke arnalǵan nusqaýlyqta júrgizýshiniń salmaǵy, jasy, boıy boıynsha normalardy qarastyrýǵa tıis. Samokattyń ózinde tańbalaý, jaryq shaǵylystyrǵysh, faralar bolýy kerek.
Jikteý boıynsha elektr samokattardy velosıpedterge jatqyzý qarastyrylyp jatyr. Olar jol boıymen de, trotýarmen de júre alady. Jaıaý júrginshilerge jaqyndaǵan kezde jyldamdyqty tómendetý qajet bolady.
«Bul standart zańnamadaǵy normatıvtik qujattarda, jol qozǵalysy erejelerinde osy máseleni retteý úshin ázirlenýde. Tolyq jaǵdaıdy biz standarttyń ózin pysyqtaǵannan keıin kóremiz. Zańnamaǵa tıisti ózgerister engiziledi», dep tolyqtyrdy Erbol Seıpilov.
Standarttardy bıyl qyrkúıekke deıin engizý josparlanyp otyr.
