Buǵan deıin de oblys ortalyǵyndaǵy sheshimin tappaı kelgen ótkir taqyryp qala mańyndaǵy eldi mekenderge qatysty edi. Shynymen, Taldyqorǵannyń irgesindegi saıajaılarda problema shash-etekten. Sonyń ishinde aýyz sý, gaz, elektr jelisi, jol ınfraqurylymdarynyń bolmaýy, mektep pen dárigerlik ambýlatorııa jetispeýshiligi turǵyndardy jıi mazalaıdy. Jalpy, saıajaılardy qoıyp, qalanyń ózinde sýmen jabdyqtaý júıesiniń 62 paıyzy, káriz júıeleriniń 64 paıyzynyń tozyǵy jetken. Memleket bul máselemen aınalysýda. Mysaly, byltyr qalaǵa qaraıtyn «3-bólimshe» atalatyn aımaqta aýyz sýmen qamtý júıesi salynsa, bıyl «Ulan» áskerı qalashyǵyna, Erkin aýyldaryna aýyz sý tartý jumystarynyń qurylysy bastalmaq. Saıajaı aýmaqtaryn gazdandyrý jaıy da syn kótermeıdi. Qazir qalanyń ózinde 30 myńdaı abonent qana kógildir otyn jelisine qosylǵan. Endi kottedj qalashyǵyn, basqa da birneshe eldi meken men saıajaı massıvterin gazdandyrý isi kún tártibinde tur.
Kún tártibi demekshi, qala mańyndaǵy 20 myń adam turyp jatqan 12 saıajaıdy ınfraqurylymmen qamtyp, abattandyrý jumystaryn jalǵastyrý kezek kúttirmeıdi. Qazir «Klıýchı», «Almaly», «Qaratal» saıajaı birlestikterine uzyndyǵy 29,7 shaqyrym bolatyn aýyz sý júıesi tartylǵan. Al «Úıtas» saıajaıynyń 4,4 shaqyrym joly jóndelip, «Shaıqorǵan», «Agropromyshlennık», «Merekelik» saıajaılarynyń 39 kóshesine qıyrshyqtas tóseldi. «Úıtas» pen «Qyzyl tas» birlestiginiń negizgi kósheleri jaryqtandyryldy. Bıyl «Ashybulaq» saıajaıyna aýyz sý júıesin tartýǵa 206,4 mln teńge qarjy bólindi. Endi «Qyzyl tasqa» sý qubyryn júrgizý bastamasy qarastyrylyp jatyr.
Soǵan qaramastan turǵyndar oblys ákimdigine saıajaılarǵa qatysty kóptegen saýal qoıyp otyr. Máselen, úıtastyqtar elektr jaryǵyn tartý, jol jóndeý, mektep salý qajettigine, sýarmaly sýdyń jetispeýshiligine, ornatylǵan kameralardyń jumys istemeıtinine shaǵymdansa, Prıgorodnyı aýylynyń turǵyndary 2020 jyly tartylǵan gaz qubyry áli kúnge iske qosylmaǵanyn, aýylǵa júretin №16 avtobýstyń qatynaý jıiligin ulǵaıtý jáne úlken avtobýs shyǵarý keregin aıtady. «Qyzyltas», «Merekelik» saıajaılarynyń azamattary da osy mazmundaǵy máselelerdi jıi kóteredi. Demek Jetisý oblysynyń ákimi bolyp jańadan taǵaıyndalǵan Beıbit Isabaev myrzanyń aldaǵy jumysyna syn bolatyn másele jetkilikti.
– Qala mańyndaǵy saıajaılarda 6 269 turǵyn úı bar. Onda barlyǵy 20 myń adam turady. «Almaty», «Ashybulaq», «Qyzyltas», «Merekelik», «Úıtas» saıajaı qoǵamdary boıynsha josparlaý jobalary ázirlenip, bekitildi. Shaıqorǵan, «Saryarqa» jáne «Qaratal» saıajaılaryna ınfraqurylym tartý boıynsha sharalar júrgizilýde. Al qala men qala mańyndaǵy eldi mekenderdi gazben qamtamasyz etý máselesi de kezeń-kezeńimen sheshimin tabady. Búgingi tańda gazǵa 28,5 myń abonent qosylǵan. Qalany gazdandyrý jobasy 4 kezeńge jáne 22 iske qosý keshenine bólingen. Birinshi kezeń boıynsha 5 327 abonent, ekinshi kezeń boıynsha 15 792, úshinshi kezeń boıynsha 4 260, tórtinshi kezeń boıynsha 2 897 abonent kógildir otynǵa qosylady. Gazǵa qosylý quny 300 myń teńgeden 920 myń teńge mólsherinde, – deıdi Taldyqorǵan qalasynyń ákimi Áset Masabaev.
Jalpy, buǵan deıin oblysta 215 myńnan astam adamnyń saıajaı birlestikterinde turatyny aıtylǵan. Iаǵnı Taldyqorǵandaǵy jaǵdaı osynsha adamnyń bárine ortaq másele ekeni anyq. Onyń ishinde ınfraqurylym máselesi birinshi orynda tur. Árıne, bul jaǵdaıdy túbegeıli sheshý úshin aldymen saıajaılarǵa eldi meken mártebesi berilýi kerek. Al ol úshin ákimdik qalanyń bas josparyn qaıta ázirleýge tıis eken. Bul ýaqyt pen aqshany jáne Úkimettiń kelisimin qajet etedi. Iаǵnı aldaǵy kezeńde Taldyqorǵan qalasynyń mańyndaǵy saıajaılardyń ǵana emes, tutas oblys aýmaǵyndaǵy jańǵyrtýdy qajet etetin aýyldardyń jaǵdaıyn ońaltý – óńir turǵyndarynyń zamanǵa saı ómir súrýin qamtamasyz etý ǵana emes, tutas elimizdegi qordalanǵan áleýmettik problemalardy joıýdyń da alǵysharty bolmaq.
Jetisý oblysy
