Oqys oqıǵa oryn alǵan ýaqytta shahardy Nurjan Áshimbetov basqaryp otyrǵan-dy. Ákim shuǵyl jınalys ashyp, atalǵan jaıtqa qatysy bar mekeme basshylary galstýktaryn taǵýǵa úlgermeı asyǵys ákimdikti betke aldy. Tek káriz qudyqtarynyń qaqpasyn ashyq kúıinde qaldyrǵan «Dala» JShS-niń ókilderi tóbe kórsetpedi. Seriktestik ózderin «bankrotpyz» dep jarııalapty.
Belgili bolǵandaı, «Dala» seriktestigi Aqsý qalasyna 2018 jyly kelgen. Iаǵnı pavlodarlyq merdiger emes. Sol jyly tozyǵy jetken sý qubyry jelilerin qaıta jańǵyrtýǵa konkýrs jarııalanyp, atalǵan mekeme jeńimpaz atanypty. Joba aýqymdy. Aqsý qalasyndaǵy 20 shaqyrym sý qubyrlary aýystyrylýy kerek-tin. Iri joba bolǵandyqtan, bul iske bólingen qarajat ta qomaqty ekenin ańǵara berińiz. Qysqasy, «dalalyqtar» 3 jylǵa sozylǵan jobanyń astan-kesteńin shyǵaryp, 10 shaqyrym jerge ǵana qubyr tósepti. Al 2020 jyldyń qarasha aıynda shahardan taıyp turǵan.
Keıin anyqtalǵandaı, atalǵan merdigerdiń buǵan deıin qarjylyq problemalary bolǵan eken. Esepshottary buǵattalyp, sáıkesinshe Aqsý qalasyndaǵy jobany aıaqtaı almaǵan. Sonyń kesirinen, byltyr qys boıy qazylǵan ýchaskeler ashyq kúıinde jatyp, kóktemde erigen qardyń saldarynan apatty kúıge aınaldy. Eski qubyrlardyń kesirinen qys boıy sý qubyrlary jıi jarylyp, apatty jaǵdaılar oryn aldy. Soraqysy sol, 50 káriz qudyǵynyń qaqpaǵy ashyq kúıinde qalǵan. Solardyń birine oqýshy qyz qulap ketken.
Bul máseleni osy ýaqytqa deıin quqyq qorǵaý organdary maıshammen qarap, aqyry memleket qarjysynyń jymqyrylǵanyn anyqtady. Aqsý qalasynyń qurylys bóliminiń basshysy T.Muzdybaev, «Dala» JShS-niń dırektory B.Rysbekov jáne tehnıkalyq qadaǵalaý mamany J.Nurtazın tıisti jumystar atqarylmasa da sharýanyń aıaqtalǵany týraly qujattarǵa qol qoıyp, memleketke 340 mln teńge shyǵyn keltirgen. Sottyń sheshimimen T.Muzdybaev jáne J.Nurtazın 7 jylǵa bas bostandyǵynan aıyrylsa, B.Rysbekov 9 jylǵa sottaldy. Aıtpaqshy, T.Muzdybaev «Eren eńbegi úshin» medalimen de qosh aıtysty.
Osylaısha, osydan 4-5 jyl buryn qolǵa alynǵan sý qubyry júıesin jańǵyrtý jumystarynyń astan-kesteńi shyqty. Kináliler sottalǵanymen, bıýdjet shyǵynynyń orny toltyryla ma? Jergilikti ákimdik aıaqsyz qalǵan sharýany óıtip-búıtip aıaqtaǵanymen, áý basta josparlanǵan jańǵyrtý jumystarynyń júzege asqany ekitalaı. Sebebi «Dalalyqtar» aqshany dalaǵa shashty eken dep respýblıkalyq qazynadan qomaqty qarajat qaıtadan bólingen joq. Oblystyq bıýdjet te saýyn sıyr emes. Abyroı bolǵanda bıyl qys jaıly ótti. Áıtpese, túrli aqaýlar tabylyp, sý qubyrlary jarylyp, ákimdikti aıaǵynan tik turǵyzar ma edi? Jalpy, ótken qysqa aqsýlyq bıliktiń ókpesi joq shyǵar. Shahardaǵy jylý júıesiniń ońyp turǵany da shamaly. Aldaǵy qys qandaı tosyn syı daıyndap otyrǵany belgisiz. Sondyqtan da jergilikti ákimdik kommýnaldyq problemalardy ýaqtyly retteıdi degen senim mol.
Joǵaryda burynǵy qala ákimi Nurjan Áshimbetovti beker sóz etkenimiz joq. Ol shaharǵa basshy bolyp kelgennen keıin az ýaqyttyń ishinde nebir zańbuzýshylyqtar anyqtala bastady. Qolastyndaǵy qyzmetkerleriniń merdigerlermen ym-jymy bir ekeni de aıtyldy. Burynǵy tátti ómirden qol úzgen ákimdik qyzmetkerleri aqyry qol jınap, Nurjan Áshimbetovti jumysynan ketirip tyndy. Búginde shahar bıligi ózgergen. Biraq problemalar sol qalpy...
Pavlodar oblysy,
Aqsý qalasy
