– «Aqynnan hal surama, jyr sura» degen. О́mirdi óleńmen órip kelesiz. Shırek ǵasyr tósek tartyp jatqanda da taǵdyryńyzǵa taıanysh bolǵan osy óleń edi... Jańa jınaǵyńyzdyń oqyrmany kóp bolsyn! Ákelerdiń jurty alpysta jazylǵan júrek sózin Almaty qalaı qabyldady?
– Qarańdaǵan dúnıege qadala qaraıtyn, bilgeniń jambasyńa batqan belge men de ilindim. Qus kóńilim dúrligip, ýyz uıqydan alshaqtadym. Ár nárse ýaqytynda ǵoı... Ýaqyt shirkin jyldardy asyqtyryp, júzderge órnek salyp jyljyp barady. Aldyń sıreńkirep, artyń qalyńdaı túsken tusqa jettim. Áke ǵasyrlar urpaǵyn óleńmen sýsyndatyp keledi. Meniki – óz topyraǵymnan qumarta jolyqtyrǵan tamshy sýymdy, ómir dalasynyń alabyna aqkóńilmen usyný ǵana. Arman inishek, aldymen ishki arpalysymdy bólisip jatqan azamattyǵyńa razymyn. El gazeti – ultymyzdyń mańdaıaldy rýhanı jol basshysy ǵoı. Jańasha túlep, qanatyn parasattylyqtyń sabyrly nuryna malyp ushqan gazetimiz – ulttyq qundylyqtyń júrek qýaty. Aryǵa umtylǵan ómir saparyndaǵy rýhty adamdardyń oı qaıraty der edim.Taǵdyr talaıyn kórip kelemin ǵoı. Búgin úlken ortaǵa kelip, aǵa bolyp, aıaýly jandarǵa tabıǵatymdy usyndym. Ákeler jurtynyń oshaq jylýyna shaqyrdym. О́leń oqyldy. Ishim bosady. Jyrlarym jyly kózderde turdy. Qýandym. Iá, aǵalyq arnasy shetsiz dalaǵa qaraı syrǵydy...
– Jórgeginde jyr qudiretin emgen halyq úshin aqyn degen qasterli, qasıetti uǵym. Dese de romantıka azaıyp, qundylyqtar quldyraǵan búgingi qoǵamda aqyndardyń bet-beınesi qandaı hám olardy qoǵam qalaı qabyldaıdy?
– Aqyn – adam. Adam sansyz formaly sýbekt. Janynyń da salmaǵy, qasıet qýaty bar. Aqyl, óner, kúlli adamı qasıetter ózińmen birge jaratylady. Markstik ıdeologııada da solaı. Az aqyl – eseıgende ulǵaımaıdy. It minez molaıyp, tisi sarǵaıady. Bar nárse ǵana kórinedi. Bilimdi joldan, ómirden juqtyrasyń. Tárbıe – týma dúnıeni ıkemdeý, beıimdeý. Biraq ol túrli ortada kirige sińispese, ózgergish keledi. Minez – aqylǵa qaırat, qorǵan. О́ner eki jaqty tektilik tamyrynan órbıdi. Kóleńke men kúngeıi de solaı. Aınymaıtyn asylǵa oıly orta, áserli oshaq kórgendiligi, áke men ana qudireti ýyzynan juǵady. Úlkeıgen saıyn, taǵdyryń da tulǵalana túsedi. Ákeden – el balasyna aınalady. Urtynda ulylyqtyń kesek sheshimi turady. Mine, tirlikti oı-armanynan uzatpaıtyn da osyndaı quıma daryndar. Endeshe, jasyq rýhty aqyndyqty ómir tolqyndary alysqa laqtyryp tastaıdy. Jańa zamannyń reńi qalaı ózgerse de, qııada týǵan qyran óleń qanatyn qaǵýǵa tıis. Qoǵam reńi aınyǵysh. Tabıǵı beıneńdi ár adymyń kórsetedi. Satqyny mol dúnıe daýyly bıikke urynǵysh. Kózge de som tulǵa jyldam ilinedi. Oıyń taýsylsa – kóńil ilip áketýi kerek. Qaırap alar rýh qarýyń – júrekte ǵana. Ár qustyń óz úni, qumyrsqanyń óz izi bar. Men dalanyń balasymyn. Qoǵam – tirliktiń kóshpendi kerýeni. Táýeldilik – tamyryńdy keptiredi-aý osy.
– Alys aýylda jatyp-aq ádebı ortada moıyndalyp, talaı múshaırada jarqyrap kórindińiz. Kózi tirisinde Farıza apamyzdyń batasyn alyp, rýhanı úndes bolǵanyńyzdan habardarmyz. Solaı bola tura kóńilińizde ádebıettiń qaınaǵan ortasyna kelip, qanattas-qalamdastarymmen kóp aralasa almadym-aý degen ókinish joq pa?
– Bar ǵoı. Adam bolǵan soń bárin kóresiń. Úlken armanǵa úlken kúsh kerek. Jolyqqan adamǵa óleń oqyp, án aıtpaısyń ǵoı. О́mir tek jańalyqtan turady. О́leń josparmen jazylmaıdy. Ras, aqyldy adamdarmen jaqyn júrgendi qalaımyn. Qazannyń mańyndaǵylardyń tirligi ózge. Esepteýli dúnıeniń esigi, laýazymnyń lebi – ekinshi pendege ózgeris ákeledi. Qyzǵanysh ta týdyrady. Uqsamaý – ońashalaý. Ádeıi qylmaısyń, taǵdyrdyń arbasynda otyrasyń. Osy óner keshinde, Baýyrjan Jaqyp, Aqberen Elgezek, Erjan Jumabek, Baǵdat Múbarak, Serik Qalıev syndy arnaly aqyndarmen áńgimelestim. Rızalyqtan ishim ezilip turdy. Erjan Alashtýǵan aqynnyń taza dúnıesine jolyqtym. Kesek talanttyń kelbetine súısindim. O, naǵyz aqyn inilerim bar eken ǵoı. Baýyrjan men Aqberenniń kisilik, tipti óz qolymnan kele me, deıtin adamdyq ajaryna qatty tánti boldym. Osy ótken qońyr áńgimeniń ortasyn alystan orap, ornyqtyrǵan – aıaýly Ulyqbek aǵam-aý!
Apaıy ómirden alystap, aqyn kóńili báseń tartsa da eńsesin túsirmedi. Aqyn ormany tolqysa da ornynda qaldy. Báse, adamnyń – adamdyǵy qýanysh pen qaıǵyda tarazylansa kerek. Igi sharaǵa sálemin jetkizdi. Ishim jylyp qaldy. Aqyldylyq aldyńda otyrsa-ishki qustaryń dúrligip qalady. О́nerge, óleńge jasalǵan qamqorlyq – uly jandardyń ǵana qolynan kelmek. Razymyn!
– Adamzat kóshi aıaldar tusqa deıin jalǵasa beretin kúresterdiń ishindegi eń uly kúres dep neni ataǵan bolar edińiz?
– Menińshe, aqyl men óner kúresi. Sansyz soqpaqtarmen astasatyn osynaý uly kúres – máńgiliktiń máresi. Aqylyń artqan saıyn – jaýyń molaımaq. О́neriń ózgeshe kelse – soryń. О́zińe uqsas myqty tulǵalar qoldasa ǵana, ne óz dúmpýiń áleýetti kelip jatsa qane! Qyzmet – qoldyń kiri emes. Azamattyǵyń pendeligińdi taqymynda ustasa ıgi. Sonda kúrestiń adal jaǵy basym keledi. Pasyq, ishi qyl-qybyr adamdar qaı zamanda da kóp bolǵan. Aram shóp syndy. Qyzyl tasty jaryp ósken qaraǵaılar az, biraq ońaılyqpen qulamaıdy. Aryzyn ala júgiretin, dalalyq taza tabıǵatyńdy lastaıtyn pendeniki – nadandyq. Nadandyq ta – bir qasıet qaýyrsyny. Qanatyńda ol da turady. Iá, kúresterdiń ulysy – qyzǵanyshtan órbıtin aqyl men ónerdiń ıgiliksiz kúresi bolar.
– Pende bitkenge tán ahýaldyń barlyǵy aqynǵa da tıesili ǵoı. О́mirde qulazıtyn kezderińiz kóp bola ma, kóńilde qandaı alań bar?
– Tamaq jeımiz. Páleniń basy osydan shyǵa ma, dep oılaımyn. Jalǵyz jemeısiń, aınalań bar. Eńbek qyl, aqsha tap. Biraq ol qalaı? Al endi sheksiz mehnatty prosess bastalady. О́leń satylmaıdy. Rýhanı ulylyq. Senen áldeqaıda álsiz, óleń túgili qaripti áreń ajyratatyn adamdarǵa isiń túsedi. Ol ıtke endi seniń áńgimeń, ániń, tátti óleńiń turpaıylaý nárse-aý osy. Aıbergenovti estimegen bireý, klastasyńyz ba, dep surady. Jumys bólmemniń tórindegi Álıhan Bókeıhanov ǵulamany, laýazymdy bireý ákeńiz ǵoı ıá, dedi. Ras, ákem dedim. Maı jep otyrǵan azamat saýdadaǵy qaryzyn ala almaı ókinip, emhanaǵa tústi. Ákesi ómirden qaıtqanda alystan kelmegen jigit maly ólip, jınalysta jylady. Bir naqurys óleń oqyǵan balasyna zekidi. Aspanǵa umtylǵan úıi bar tanystyń qoqsyǵynda dombyra jatyr. Án aıtý birtúrli aýytqýshylyq tárizdi. Kitapqa úrke, odyraıa qaraıdy. Shaı basynyń shatpaǵyn Jumeken, О́mirzaqpen shatastyrdy. Osyndaı opyryq, borkemik orta ulǵaıa bastady ma dep úreılenem, Arman! Sumdyq qoı, bári birdeı bolmasa da bul – obrazdy shyndyq! Osyǵan qatty alańdaımyn. Qarapaıym kúıeýin aqyn dep tanyǵan zamandas qatynnyń túsiniginen túńildim. Alańdaǵanym, ol – ana edi. Balasyna obal ǵoı... Qulazyǵanym – qabyrǵamnyń juqarǵany-aý. Ulttyq ıdeologııanyń bıigi – óz otbasy, shańyraǵyń. Tútin túzýligi úı adamdarynyń kisilik qyrynan. Qońyr áńgimege qolpash tappaı alańdap qalam...
– Baqytty bolý úshin adamǵa ne kerek?
– Baqyt týraly talas týdyratyn pikir kóp. Túsinik sheksiz. Kózqaras sansyz. О́mir – máńgilik, ǵumyr – sáttik. Baqyt degen áıteýir jaqsylyq bolar. Arman qanatyndaǵy sýsyl áýresi bolar. Qybyrlaǵan sheksiz tirlik pe eken. Azapqa toly ǵashyqtyq pa, álde. Bireýge ketken eseniń qaıtqany ma. Sátin salǵan dúnıe me, top ete qalǵan syı ma. Uzaq ǵumyr ma. Adal jar, qatparly qarttyq pa eken. Qýlyq pa álde, utylmaǵan. Aldap qulatqan arman ba eken. Kúshenip, ishińde júrgen esebiń be. Qınalǵanǵa qımaǵan aqshań ba. Shaınaǵan maıly jiligiń be eken. Sulýlaý suryń ba. Asqynyp alǵan aramdyǵyń ba. Qýlyqqa toly qyzmetiń be. Alańsyz qorylyń ba. Tynysh qara shaıyń ba? Endeshe, adamǵa baqytty bolý úshin ǵana sheksiz nárse kerek eken. Maǵan da solaı. Men ómir súrý úshin – óleń jazam. О́leń jazý úshin – ómir súrem. Sondyqtan adamǵa keregi – ǵashyqtyq áýresi!
– Oqýshylardy ádebıetke, rýhanııatqa baýlyp júr ekensiz. Aýylda ózińizge shákirt bolarlyq jastar ósip kele jatyr ma?
– Aýylda eki mektep bar. Tarıhy tereń atamekenim, Qabanbaı batyrdyń topyraǵy. Jarbulaq ózeniniń eki jaǵasy – jeti Qabanbaı, bes Móneıdiń mekeni! Uzaq áńgime. Osynda ákem Qubash, anam Aǵaıshanyń otbasynda týdym. О́stik, tárbıe kórdik. Uzaq aýyrdym. Oqý oqydym. Talaı belester artta qaldy. Ol týraly kitaptarymda aıtyp kelemin. Endi osyny balalar bilsin deısiń. Sol maqsatta álgi mektepten burysh ashtyq. Uzaq jyldar jumys atqaryp kelemiz. «Baladaryn» –ádebıet úıirmesi.
Maqsatym – parasatty adam qalyptastyrý. О́nerge aparar jol tanytý. Kúlli adamı nárselerge jaqyndatý. Sóz óneriniń baqshasyn aralatý. Áńgimeniń alysyna jetekteý. El tarıhy, jer shejiresi, sóz qudireti, jeke tulǵalar – bizdiń taýsylmaıtyn taqyryptarymyz. Ádebıet teorııasy, óleń qurylysy, qısyny, troptar, tarıhy týraly qaıtalaı oqımyz. Sóz qısyny, óleń formasy, sýret, án, uıqastar, qabyrǵa gazeti, áńgime – osylarǵa biz ózgeleý ádistermen baramyz. Árıne, qıyndyǵy da mol. Úıirmege úrke qaraıtyn túsinigi ózgeshe adamdar da bolady. Baladan esh ýaqytta teginde joq aqyndyqty jasaı almaısyń. Ár nárseniń tamyry bolady. Adamdy tabý, taný, túsiný – ǵajap nárse. Men shákirtterimniń júreginen ulttyq irilik rýhyn izdep kelemin. Kesek minez, aınymas rýh tabylyp jatsa – jańa qazaq elin qurý úshin azapqa túser azamattar taby ulǵaıady. Usaq, aıar ortadan mezi bolǵan kıeli dalanyń uldary bar shyǵar. Ustaz osy baǵytta qımyldaý kerek. Erkek minezdiń ıisi kerek, ıini qashqan tusqa.
– Eń basty shyǵarmańyzdy jaza aldyńyz ba?
– Eger osyǵan jaýap retinde, bir óleńimdi alsam – júregimnen umtylǵan barsha qushtarlyq ataýlynyń qalǵany jabyrqap qalar edi. О́leń – tutas ómirdiń ózine uqsaıdy. Kádimgi jandy aǵza. Aǵzadaǵy músheniń bári qymbat. Atqarar róli bar. Júrek – os. Iаǵnı aqyl da, sezim de, qýat ta júrekke táýeldi. Árıne, onyń da ártúrli deńgeıi bar, Ákem Qubash ekeýimiz osy tóńirekte tún uzaq áńgime quratynbyz. Qaıran ákem, qazir joq. Kóp balaly áke sekildimin. Bir sábıimdi bólip qaraı almadym. Úıdegi jeńgeńniń esimi – Gúlbahram. Endigi jerde biz ekeýlesip, bógde bireýlerdiń kózi tereńdep túse almaǵan óleń azabynda baqytty bolyp kelemiz. Asa qýanǵanymyz, «Men áli ómir keshem» kitabymyz boldy. Bastapqy jaǵy prozaly keldi. Jaqynda ǵana «Folıant» baspasynan jaryq kórdi. О́ziń týraly aıtý óte yńǵaısyz nárse. Qýandym. Sebebi menimen birge uzaq tósek tartqan armandarym edi ǵoı. Bireýlerdiń qyzǵana qabyldaǵanyn baıqadym. Rıza boldym. Iаǵnı týyndym qyzǵanyshqa turady eken ǵoı. Táttilik – tereńge, tazalyqqa, mahabbatqa shomdyrady. Oı qaldyrady. Uıqyńdy urlaıdy. О́zińe oralasyń. Áserden jylaǵyń keledi. Rızalyq kúlkisi kózińnen syrǵıdy. Umyt dúnıege umtylasyń. Bireýdi izdeısiń. О́rekpigen júrek ýyz qudiretimen qorektenedi. Az ǵana aıshyqty shaqta patshalyq qurasyń. О́leńdi sen jazdyń, qushaǵyńdaǵy qýanysh óz kóńiliń. Bir óleń – kıeli qustyń bir dúr etkeni. Bir ómir jyrtyǵynan aǵytyla quıylǵan kirsiz kóńil balqymasy. Tek, sharasyz sábı sekildi, kózińdi jumyp juta bergiń keledi. Kóp jerde moıyndala bermese de, túbinde aıtylatyn ǵajaıyp qubylys – óleń! Túsinigi tómen pendege, zırattaǵy qulpytas óleńin kórsetýge bolady. Sonda, Arman inim basty shyǵarmam – osy qazir ǵana jazyp otyrǵan óleńim boldy ǵoı. Erteń ol da ózgeredi. Keshegi – máńgilik, erteńgi – bolashaq bolady. Burynyraqta týǵan óleńiń eski tanysyń sekildi. Jyly ushyrap qalady.
– Qazaq poezııasynyń altyn dáýirin jasaǵan aldyńǵy tolqynnyń arnasynda kimderdiń qoltańbasy janyńyzǵa jaqyn?
– Ne nárse da elikteýden, qushtarlyqtan bastalady. Ásirese, ol ónerde, óleńde ǵajap-aq. Ákeme erekshe jaqyn boldym. О́mirtanymy, áni, qylyǵy, minezi úıirip áketetin. Úlken mektep edi. Sózdi qalap, qorshap, bir esikti etip aıtý onyń ózindik ereksheligi bolatyn. Sózdiń aıtylý ortasy, kisisi, mólsheri, salmaǵy, áseri bolatynyn ańǵarý sheberligi ákemde aıtarlyqtaı bıik qabiletinde edi. Endi, sózdiń yrǵaǵy, salqyny, uzaqtyǵy, dámi degenińiz eki jaqty qatynas obektisinde turýǵa tıis. Iá, onyń oryndalýy, órbýi, aıaǵy bar degen syndy. Keshegi ult alyptary, Abaıdyń aınalasy, Qasym, Muqaǵalıǵa qosylatyn el jaýhary men óz arnań bolyp kókiregińnen aqtaryla alsa ǵana –óleń! Sonda ǵana ol ulttyq rýhtyń ýyz qoregi. Erteńgi balaǵa bel, kóz, minez, qýat bola alatyn qudiretti tabıǵat edi. Osy tustaǵy ár óner ıesi, aqyl kesheni, daryn mólsheri, taǵdyr – uqsastyǵyna qaraı uryna tolqıtyny bar. Tarıhty halyq emes, jeke tulǵalar ǵana jasaıdy. О́nerde de solaı. Endeshe, Qasym, Muqaǵalı, Meńdekesh, Tólegender – ǵasyrda múmkin kezige bermeıtin ulttyń kesek tulǵalary. Tek, búgin de olardy túsine alsaq. Qadirin bile bilsek. Bala kezimnen ózime óte jaqyn, áserli bolǵany árıne, Tólegen aqyn. Qazaq poezııasyna Tólegen úlken jańalyq, tyń qýat ákeldi. Sózdi teńizdeı dóńbekshitti. Qýatyn qylǵa ákep tiredi. Tólegen óleńiniń tabıǵaty – oı orbıtasynyń bıigi. Yrǵaqtar yrshyp, sózderdi san qubyltty. Býyn, býnaq, shýmaqtar aǵytylǵan aqyn kókireginen burqaqtaı atty. O, sóz qudiretiniń sheberi aldynda taǵzym ettik! Týma darynnyń az ǵana ǵumyry – máńgilikke arna saldy. О́leń formasy, qısyn, qurylystardan aqyn ultyna, poezııaǵa óz bıigin turǵyzdy. Ol – móldir, qudiretti óleń kúmbezi edi. Kóp ǵasyrda osy qudiretti óleń kúmbezinde ómir keshetin bolamyz. Iá, men Tólegen aqyndy erekshe kórem, basymdy ıip táý etem!
– Qıyn shaqta qol sozǵan azamattar boldy ma?
– Jalpy, ómirdiń belgili bir erejesi joq sııaqty. Ýaqyt aǵysyna erip kete beresiń. Ony taǵdyr delik. Áıteýir, shıraǵyraq bolsań qalǵany salmaqtyraq kelmek. Oıly bolǵan saıyn ormanyń qoıýlana túsedi. О́nerli janǵa árnárse úıir. Bir kóziń tirlikke túspese, qaltań tesik bolyp qalyptasady. Úırenip alasyń. Uzaq jylǵy dert meni biraz ómirden keshiktirdi. Uzap ketken bolmashy tirliktiń sońyna tústim. Sóıtsem, ol sondaılyq ońaı nárse emes eken. О́ńi sýyq, qýlyǵy jylym adamdarǵa jolyqtym. Betim qaıtyp, búrkenip jattym. Balalarym Gákký men Dos eseıip, bólme taryldy. Ákem úlken ábigerge tústi. Men baldaqqa asylyp alysqa bara almadym. Jyldar jylystap ketti. Úı saldyq. Egdeleý jastyń esigin ashtym. Entikken aqyn tabıǵatym ózge reńge oıysty. Balalar arman aǵysymen alysta júr. Táýba. О́mir jete almaǵan joldardan, aldap ertken ýaqyttan bolar. Osyndaı shaqta aınalama qaradym. Adam izdedim. Sonda, osy azamattarǵa razy boldym. Máselen, Muhtar Qul-Muhammed, Farıza apaı, Erlan Sydyqov, Ulyqbek Esdáýlet, Baýyrjan Jaqyp, Qanat Zeınolla, Raqymǵalı Abraruly, Aıman Jaqypova, Dýman Anash, Baldyrǵan apaıym bolyp kete berer edi. Adamdyq izgiliktiń úlken-kishisi bolmaıdy. Zulymdyq ta solaı. Keıbiriniń esimderi sál umyt qalyp jatqan bolar. Ol búgingi ájimderimde jasyrynǵan shyǵar tegi. Erteń baıqarmyn. Barlyǵyna tilekshimin. О́mir ǵoı. Neshe túrli oqıǵa ortasynda júresiń. Árkim óz túsinigimen qabyldaıdy. Ańǵarmaı, ańqalańdap qasyna barasyń. Ol ári qaraıdy. Júrek shym ete qalady. Áńgimesi áserli, jyly ortany ańsaısyń. Alakólge baram. Gúlbarashpen syrymyz taýsylmaıdy. Itter úredi. Men alysqa ketip, azǵana tirligime aralasa batyp, ystyq kóshemde kele jatamyn...
– О́leńmen áldılep ósirgen qos perzentińiz ómirden óz jolyn tapty ma?
– Jastaý kúnderimdi oılasam, elegizip qalam. Osy bir qaptalymda turǵan sekildi. Asyǵa ótken, elesteı ǵana bolǵan qaıran ýyz oıly ýaqyttarym! Qadirin bilmedim, oısyz óttim demeımin. Tek, ulǵaıtyp alǵan saǵynyshtary bolmasa. Adambyz ǵoı, mahabbat qudiretiniń ósken, kóringen, tátti áýresi edi ǵoı. Endigisi, sondaǵy qudiretti sezim qoreginiń qýatymen kele jatqan qońyr tirlik qana. Iá, ómirge az da bolsa, mahabbat ýyzy aralasyp otyrýy kerek. Jylasań – ol júrek ýy bolady. Kúlseń – ol shyndyqtyń ájýasy eken. Qatelik – qushtarlyqtyń bir qadamy ǵana. Endi, osyny jalǵyz kóterseń eńseń túsip, syrtta álsiz kelesiń. Túzde myqty bolý úshin, úıde yrysyń ystyq bolýy kerek. Sen súıgen adamnyń – aınymas raıy bolýy qajet. Úıdiń qabyrǵasy syqyrlasa da, syry syrtqy daýyldan úreı qabyldamaýǵa tıis. Ol – senderdiń, ıaǵnı, óz uıalaryń ǵoı. Osy uıadan Gúlbahram ekeýimiz eki balapan ushyrdyq. Gákký – Semeıde doktorantýrada oqyp júr. Osy tóńirekte ustaz, dekan orynbasary. Ǵylymı jolda. Talaı irgeli oqý oryndarynda istedi. Bolashaǵy zor. Januıaly. Eldos kúıeý balam eńbekqor, ornyn biletin azamat. Aızada, Hanzada esimdi balapandar bar. Táýba. Ulym – Dos, T.Júrgenov óner akademııasyn bitirgen. Rejısser. Biraz kınolarda oınady. Qostanaıda teatrda boldy. Qazir, О́skemende osy salada kórkemdik jetekshi bolyp júr.Sahna syryn biraz meńgerip qalǵan bolar. Irgeli ortada, Rýslan Qaıyrbekuly sekildi úlken júrekti azamattardyń mańynda keledi. Jalpy, óner adamy kóleńke men kúngeıdi meken etedi ǵoı. Iá, úlken ómirdi, kishkene ǵana sahnada obrazdaý degenimiz – biraz eńbek. Kóńil men kózder ártúrli seziletin qýatty da názik orta. Baqytty da, azapty tabıǵat aıasy ǵoı ol jer... Mine, Arman, osyndaı balapandarymdy qanatymmen orap, altynshy belden asyńqyrap ushyp kelem.Amandyqtaryńdy tileımiz ǵoı. Alla uzaq ta, maǵynaly ǵumyr bersin, bárińe!
– Búgingi tirshiliktiń tynysy qalaı, aǵa?
– Qazir aýylda mádenıet úıiniń meńgerýshisimin. Aýyl tirligi men mádenıeti órleý ústinde. Jóndeýden ótken mádenıet úıi kóz tartarlyq kelbetke aınaldy. Qolymnan kelgeninshe ádemi etip otyrmyn. Kádimgi qala teatry dersiń. Talaı qıyn kezeńderden ótip kelemiz. Kezindegi ákim Serik Zaınýldınge razymyn. Osy úı úshin baryn saldy. Maǵan sendi. О́zi birge aralasty. Sheshimdi, minezdi azamat jańa úı salýyma da zor qaırat qyldy. Eńbegimdi baǵalady. Mádenıet úıine basshylyqqa usyndy. Arpalystarda arasha turdy. Aýdandy aldyǵa apardy. Alakólge zamanaýı óń berdi. Jaıly joldar sozyldy. Gúldi óńirdiń ajaryn ashty. Som minezi túrenge soqa saldy. Baladaı kóńili talaı júrekti eljiretti. Naǵyz ult minezdi, kórgendi azamat. El atynan alǵysym sheksiz. Iá, sol mádenıet úıinde ıgi ister áýresimen júrmiz. Nurjan, Birjan, Áset, syndy aýdan basshylarymen de úzeńgiles eńbektemiz. Qarbalas jumys baqytty, jańa eldiń bıigine bastap barady. Alty belestiń arqasynda turmyn. Taǵdyrdyń jazǵanyna ókpe aıtpadym. Týǵan topyraq adamdary arasynda, óleńimdi aıalap kele jatyrmyn. Iá, baqyt ta, ómir degen de osy bolar.
Ult gazeti – «Egemen Qazaqstan» ujymyna bıik shyǵarmashylyq tabystar tileımin. Barshańyzǵa Qabanbaı babamyzdyń topyraǵynan tek aǵalyq tilekshi kóńil aýanyn usyndym. Zor rızashylyǵymdy bildiremin. El irgesi aman bolsyn.
– Áńgimeńizge rahmet.
Áńgimelesken
Arman OKTIаBR,
«Egemen Qazaqstan»
Almaty
