Qasıetti tórde eldiktiń baıraǵy jelbiredi

Joshy óziniń ǵalamdyq uly joryqtaryna dál osy qasıetti Ulytaýda ulysymen batalasyp, jolǵa shyqqan. Berisi Reseıde, árisi kári qurlyqta atynyń aýyzdyǵyn aǵytqan Batyı da Joshynyń baıraǵyn osy Ulytaýda qolyna alǵan.

Alyp shaharlardy otqa oraǵan Altyn Ordanyń hany Toqtamysqa, er Edigege máńgilik jer besik bolǵan meken bul. Túbi bir túrki kósemderimen ymyraǵa kele almaı ketken Ámir Temir óziniń taǵdyryn Altynshoqydaǵy tasqa qashap qaldyrdy.

Qasqa joly jarǵyǵa aınal­ǵan Qasym hannyń aqtyq asy ótken Ulytaý bul.

Alataýdyń arǵy qaptalynda qapyda Kene hannyń basy ıyǵynan domalap bara jatqanda bir túıir topyraǵy búlk ete qalǵan Ulytaý!

Ulytaý – bizdiń ata-babala­rymyzdyń myńdaǵan jyl rýhanı ańyzyna aınalǵan, aqyndar jyryna arqaý etken, syn saǵatta pátýa minberi bol­ǵan qasıetti tór! Qyrym men Úrimniń úreıin alǵan kósh­pen­dilerdiń kóshin bastaǵan handar men bılerdiń joly dál osy Ulytaýdan bastalǵan.

Memleket basshysy Qasym-Jomart Toqaev sol qasıetti tórde eldik pen birliktiń baıra­ǵyn jelbiretip, Ulttyq quryl­taı shaqyrǵan edi. Sol sáttiń mezgil saǵaty soqty. Saltanaty jarasqan baısaldy Májilisten halyqtyń kútetin úmiti men senimi mol.

Ulytaý baıtaǵyndaǵy Jo­shy han kesenesiniń irgesine Aq shatyr tigilip, baıraǵy jel­biregen Ulttyq quryltaı Qazaq eline, el-halyqqa qaıyrly bolǵaı!

Janarbek ÁShIMJAN,

Májilis depýtaty