Jastarǵa jańa múmkindik

Jaqynda Pavlodar qalasynda Aqparat jáne qoǵamdyq damý mınıstrligi jáne Aza­mattyq bastamalardy qoldaý ortalyǵynyń qol­daýymen «Jastarǵa múmkindik!» taqyry­bynda kezdesý uıymdastyryldy. Shara «Adyrna» ulttyq-etnografııalyq birles­tigi qoǵamdyq qorynyń «Jastardy áleýmet­tendirý jáne ońaltý» jobasy aıasynda ótti.

Qoǵamdyq qordyń prezıdenti Arman Áýbákirdiń aıtýynsha, joba alǵash ret 2018 jyly Batys Qazaqstanda iske qosylǵan. Búginde jastar tarapynan zor qoldaý taýyp, respýblıka kóleminde uıymdastyrylýda.

– Ár óńirdegi jastardy jumysqa ornalastyrýǵa tyrysýdamyz. Ásirese jastardyń kásipkerlermen baılanysyn jolǵa qoıyp otyrmyz. Sebebi jastardyń kóbi jeke bıznespen aınalysqandy táýir kóredi. Jastar úshin sheberlik sabaqtary tegin, – deıdi A.Áýbákir.

Is-shara barysynda «Adyrna» ulttyq-etnografııalyq birlestiginiń ókilderi jer­gilikti jumyspen qamtý ortalyǵy jáne Jastar bastamalaryn damytý ortalyǵy mamandarymen birlesip, adyrna.kz saıtyna tirkelý úshin arnaıy formalar ázirledi. Eki qolǵa bir kúrek izdegender ózderi jaıly derekterdi onlaın-platformaǵa engizdi. En­digi jerde jastardyń árqaısysymen baılanys ornatylyp, kýrstar men sheberlik sabaq­tary ótkiziledi. Joba el jastarynyń ózin-ózi damytýyna septigin tıgizedi degen senim mol.

Jobany jandandyrý úshin barlyq óńirde kásipkerlerdiń halyqpen kezdesýleri ótkizilmek. Bul rette is-shara barysynda stýdentter óńir kásipkerlerine saýaldaryn joldaýǵa múmkindik aldy. Bıznes­men­der ózderiniń jetistikteri týraly aıtyp berdi. Al jumyspen qamtý ortalyǵynyń qyz­met­kerleri memlekettik baǵdarlamalar men jumysqa ornalastyrý jónindegi memlekettik saıasattyń baǵyttaryn túsindirdi. Granttyq jobalardyń jaı-japsary aıtyldy.

Pavlodar oblysy