О́.Joldasbekov atyndaǵy stýdentter saraıynda ońtústik astanadaǵy fızıka-matematıka baǵytyndaǵy NIS-tiń 140 túlegine saltanatty túrde attestattar tabystaldy. Bul bilim ordasy el jáne álemdegi eń tabysty mektepterdiń biri retinde tanymal, oqýshylar men túlekterdiń biregeı jetistikteri Qazaqstandy jahandyq bilim berý keńistigine belsendi túrde ıntegrasııalap keledi.
2021-2022 oqý jylynda NIS joǵary akademııalyq standarttardy taǵy da rastady. Kembrıdjdiń Halyqaralyq emtıhan keńesine tapsyrylatyn syrtqy jıyntyq baǵalaýdyń qorytyndylary boıynsha bilim sapasy 99,3 baldy qurady; árbir ekinshi oqýshy A* jáne A baǵalaryn aldy, IELTS halyqaralyq sertıfıkatynyń ortasha baly 7,1 baldy qurady.
Almatydaǵy fızıka-matematıka baǵytyndaǵy NIS úshinshi jyl qatarynan jalpy bilim beretin pánderden respýblıkalyq olımpıadanyń qorytyndysy boıynsha «Eldiń úzdik olımpıadalyq komandasy» bolyp tanyldy.
2022 jylǵy túlekter arasynda Taır Satýbaldın, Tamırlan Bektemisov, Nurasyl Ábdirazaq jáne basqa da halyqaralyq jáne respýblıkalyq olımpıadalardyń, sonyń ishinde IMO halyqaralyq matematıka olımpıadasy, Jáýtikov olımpıadasy, Jibek joly halyqaralyq olımpıadasy sııaqty bedeldi bilim báıgesiniń jeńimpazdary bar.
Mektep dırektory Ermek Paızov jaqynda ǵana ózderiniń akademııalyq jetistikterin taǵy bir márte rastaǵan oqýshylarǵa attestattardy birinshi bolyp tabys etti. «Altyn belgige» úmitker 9 zııatker jáne úzdik attestatqa úmitker 29 oqýshy óz bilimderin dáleldedi.
Attestattardy saltanatty túrde tabystaý rásimi О́.Joldasbekov atyndaǵy stýdentter saraıynda ótkeniniń sımvoldyq máni bar. Búginde túlekterdiń úshten bir bóliginen astamy ózderin stýdent dep senimdi túrde aıta alady. Olardyń barlyǵy otandyq jáne sheteldik bedeldi ýnıversıtetterdiń granttaryna ıe boldy. Osy mektep túlekteriniń Shyrmaýyq lıgasyna túsý dástúrin Dana Eralı men Alıma Tuıaqaeva jalǵastyrdy.
Dana prezıdentter men Nobel syılyǵy laýreattarynyń alma-materi retinde belgili Iel ýnıversıtetiniń tolyq qarjylandyrý granty ıegeri atandy. Ol Ethics, Politics, and Economics salasynda bilim alýdy josparlap otyr. Alıma Tuıaqaeva AQSh-taǵy bıznes mektepteri arasynda kóshbasshy bolyp tabylatyn Pensılvanııa ýnıversıtetinen resmı shaqyrtý aldy.
– Birneshe jyl boıy ýnıversıtetimniń oqýǵa túsken stýdentterge jibergen hattaryn oqyp kelemin. Tipti jatqa bilem. Biraq búgingi hattyń mazmuny múlde basqa. «It’s time to celebrate» («Toılaıtyn ýaqyty keldi») degen jazýdy kórip, jylap jiberdim.
«Altyn belgi» ıegeri atanǵan Elıkaı Atabaeva saltanatty jıynda mektep túlekteriniń atynan súıikti bilim ordasyna alǵysyn jetkizdi:
– Mektep bizge úlken múmkindikter berip, taǵdyrdyń kez kelgen soqqysyna tótep berýdi úıretti, – dedi ol.
