Oqý-jattyǵýdyń jospary boıynsha teńizdegi kemeniń dızel-generator bóliginen órt shyqty. Jalynnyń kesirinen keme toqtan tolyqtaı ajyratylyp, negizgi qozǵaltqyshtar isten shyǵyp qaldy. Azamattyq kemeniń órt sóndirý toby da tilsiz jaýdy aýyzdyqtaı almaıdy.
Kemeniń ornalasqan jeri, onymen baılanystyń bolmaýyn izdestirý úshin Áskerı-teńiz kúshteri men Áýe qorǵanysy kúshteri avıasııasynyń, Mańǵystaý oblysy boıynsha Ulttyq qaýipsizdik komıteti Shekara qyzmeti departamentiniń, Tótenshe jaǵdaılar mınıstrligi bólimsheleriniń korablderi men katerleriniń birlesken is-qımyldary uıymdastyryldy.
Birlesken is-qımyldardyń nátıjesinde apatqa ushyraǵan kemeniń koordınattary belgilenip, órt der kezinde aýyzdyqtaldy. Al keme jaqyn mańdaǵy portqa súıretip jetkizildi.
– Izdestirý-qutqarý jumystaryn júrgizý kezinde birlesken is-qımyldardy uıymdastyrý jónindegi oqý-jattyǵýlardyń negizgi maqsatyna qol jetkizildi. Mundaı oqý-jattyǵýlardy ótkizý praktıkasy jalǵasa beredi, – dep atap ótti Áskerı-teńiz bazasy komandıriniń jaýyngerlik daıarlyq jónindegi orynbasary II dárejeli kapıtan Baýyrjan Muratuly.
