Mamandardyń aıtýyna qaraǵanda, elimizdiń aýmaǵynda paleolıt dáýirine tán artefaktiler kóp emes. Buǵan deıin Qarataý jotasynan buryn-sońdy belgisiz bolyp kelgen paleolıt dáýirine tıesili 85 úńgir anyqtalǵan. Onyń syrtynda, sońǵy jyldary Túrkistan oblysy Báıdibek aýdanyna qarasty Boraldaı taýyndaǵy Tuttybulaq úńgirine zamanaýı tehnologııalardy paıdalanyp júrgizilgen skanerleý jumystary nátıjesinde, bul núktede osydan 41 myń jyl buryn, ıaǵnı orta tas dáýirinde turaq bolǵany anyqtalypty.
Al bul retki, qazaq-nemis birlesken ekspedısııasy halyqaralyq joba aıasynda, mamyr aıynan bastap Almaty oblysy Kerbulaq jáne Eńbekshiqazaq aýdandarynda zertteý jumystaryn júrgizýmen aınalysýda. Nátıjesinde, joǵaryda atap ótkenimizdeı, Eńbekshiqazaq aýdanyndaǵy «Tikenekti-2» nysanynyń mádenı qabatynan orta tas dáýiri, keıingi paleolıt jáne neolıt dáýirlerine jatatyn artefaktiler anyqtaldy. Sonymen qatar qazba jumystary barysynda tabylǵan janýarlar súıekteri men kómir qaldyqtaryn zerthanalyq saraptamaǵa jiberý jaıy da qarastyrylýda eken.
«Arheologııalyq qazba jumystary halyqaralyq joba bolǵandyqtan munda Ulttyq mýzeı qyzmetkerlerimen qatar Ispanııa, Grekııa, Germanııa, AQSh elderiniń zertteýshileri, sondaı-aq, Ál-Farabı atyndaǵy Qazaq ulttyq ýnıversıtetiniń stýdentteri de belsene atsalysýda. Eki shákirtimiz paleolıt dáýirine qatysty doktorlyq dıssertasııasyn shetelde qorǵaıdy», deıdi birlesken joba jetekshisi, tarıh ǵylymdarynyń doktory Jáken Qojahmetuly.
Aıta keteıik, atalǵan birlesken ekspedısııa kelesi kezekte Qazaqstan aýmaǵynan paleolıt dáýirine tán eskertkishterdi izdestirý maqsatynda, aldaǵy kúnderi jumysyn Túrkistan, Jambyl, Shyǵys Qazaqstan oblys aýmaǵynda jalǵastyrmaq.
