Atalǵan qorymdardan qola dáýirine jatatyn jádigerler, atap aıtqanda, turmystyq zattar, zergerlik buıymdar qazyp alyndy. Eskertkishterdi qorǵaý ortalyǵy dırektorynyń orynbasary Janbolat Májıtov bul qola jáne temir ǵasyrlarynyń qorymdary tarıhty zerdeleýge mol múmkindik beretin asa qundy jerleý oryndary ekenin aıtady.
Al arheolog, tarıh ǵylymdarynyń kandıdaty Igor Kýkýshkınniń aıtýynsha, bul qorymdar erterekte aıaýsyz tonalǵan eken.
– Máıitter kóshirilip, qundy zattar alynyp, tek qoladan jasalǵan buıymdar ǵana qalǵan, – deıdi arheolog ǵalym. – Balalardyń biz tapqan beıitteri eresekterden bólek ornalasqan jáne jalpaq tastardan turǵyzylǵan. Sol kezde qaıtys bolǵan adamnyń arýaǵy mundaı tastardan attap óte almaıdy jáne adamdardy mazalamaıdy degen senim bolǵan. Sondaı-aq balalar máıitteriniń janynda sút tárizdi suıyqtyqtyń qaldyqtary bar ydys-aıaqtar tabyldy.
Igor Kýkýshkın bastaǵan ekspedısııa ǵalymdaryna akademık E.Bóketov atyndaǵy Qaraǵandy ýnıversıtetiniń tarıh fakýltetinde oqıtyn stýdentter kómektesip júr. Solardyń biri Bekarys Tilegenov kóne jádigerlerdi kózimen kórip, qolymen ustap, tájirıbelik turǵyda mol maǵlumat alǵanyna qýanyshty ekenin aıtady.
– Qola dáýirindegi qysh ydystar, qola pyshaqtar, syrǵalar men saqınalar taptyq. Biz ejelgi adamdardyń súıekterin qazirgilermen salystyryp, nátıjesinde, aıtarlyqtaı aıyrmashylyqtar bar ekenin baıqadyq. Eski zaman adamdarynyń qoldary men aıaqtarynyń súıekteri uzyn jáne jýan bolǵan eken.
Sonymen qatar stýdent Bekarys Tilegenov qorymnan tabylǵan adamdardyń tisteriniń sap-saý jáne tap-taza bolǵanyna qaıran qalady. «Osy oraıda kóne zaman adamdarynyń gıgıenany qalaı saqtaǵany tańǵaldyrady», deıdi bolashaq ǵalym.
Jergilikti atqarýshy bılik aldaǵy ýaqytta Taldy arheologııalyq parkinde týrıster úshin iri tarıhı-mádenı ortalyq ashýdy josparlap otyr. Mundaǵy maqsat – kóne zamannan qalǵan tas pıramıdalardy, qorǵandardy, qorymdardy dúnıe júziniń áýesqoı tarıhshylary men saıahatshylaryna kórsetý.
Qaraǵandy oblysy,
Shet aýdany
