Maǵjan Jumabaevtyń birinshi qarasózi «Balapan qanat qaqty» dep atalady. Muny ol «Balapan» jýrnalyna arnap jazypty. «Balapan qanat qaqty... jas edi. Qanaty da qatyp jetken joq edi. Amalsyz qaqty. Soltústiktiń sýyǵyna shydaı almady. Sýyq jel súıegine jetti. Yzǵar ókpesine ótti. Ushyp ormanǵa baryp edi, kúni keshe kúbirlesip, kúlimdesip, jyly qushaǵyn ashyp turǵan aǵashtar buǵan moınyn burmady. Ushyp toǵaıǵa baryp edi, qansha shyryldap aınalyp júrse de, qaly aq kebinin jamylyp, toǵaı turmady». Sonaý qıyn kúnderde aqyn bul sózderdi «Balapan» jýrnalyna dep arnap jazǵanymen, ultyna degen kózqaras pen úmitti astarlap jetkizgeni shyndyq. Ásirese Maǵjannyń «Balapandy» «jas edi», «qanatyn amalsyz qaqty», «Yzǵar ókpesine jetti» deýi «Balapannyń» emes, sol tustaǵy Qazaq degen ulttyń basyndaǵy jaǵdaı emes pe? Al «Soltústiktiń yzǵary» degendi ashyp aıtpasa da, túsinikti sóz. Ol yzǵar áli de aıyqqan joq.
Ol qarasózin jalǵastyra kele búı deıdi:
«Balapan qanat qaqty...
Ashtan óletin boldy. Oıdy-qyrdy qar basqan. Bir qyltanaq taba almady. Oı – jan-dármen jyly jaqqa ketý, egiz Esil-Nuranyń tátti sýlarynan iship, Araldyń ystyq qumyn qushpaqshy. Tereń Balqashtyń móldirine shomylmaqshy. Altaıdyń eteginde «úh» dep demin alyp, Marqakóldiń qaımaǵynda júzbekshi». Sońǵy sóılemderde aqyn óz ultynyń úmitin, armanyn, endigi jolyn sóz sıqyryna syıdyryp, dáldep jetkizip otyr. Biz úshin «Balapannyń» jyly jaqqa ushýy – qazaqtyń óz bıligin óz qolyna alyp, derbes el bolýy. Keshegi keseldi kúnderde aqyn osyndaı oıy, kózqarasy bar ekenin jasyrmaıdy.
Maǵjan aqynnyń ekinshi qara sózi «Dombyra» degen taqyrypta. Ol bul týyndysyn «Marqum Sh-ǵa arnaımyn» depti. «Dombyra keıde aǵash japyraqtarynyń dirildep kúbirlegenindeı, keıde aýrý adamnyń yńyrsyǵanyndaı bolady. Ol qaıǵyrady... zarlanady... maǵan alystan talyp bir daýys estiledi. Muńdy bir daýys jaqyndap keledi. Názik, zarly daýyspen bireý aqyryn ǵana óleń aıtqandaı... áıel daýsy... «bizden sorly jalǵanda jan bar ma eken?». Jylap turǵan qazaq áıeli arqyly Maǵjan qarańǵy qoǵam, teńsizdik pen ádiletsizdikti syn tezine alǵysy keledi. «Maǵan jaqyndap kelip, meniń kózderime týra qarady. Kóz qaraýy ári maıda, ári salqyn. Kishkene kúlimsirep, qansyz erinin qozǵap, sóıleıin dep edi, jóteldi... uzaq jóteldi... Aqyryn aýyr jótel». Munda aqynnyń «áıeldiń maǵan jaqyndap kelip, kózime qarady» degeni eldiń sózin bir aıtsa aqyn aıtar, muńyn aqyn túsiner degen izgi tileginen týyndasa kerek.
«Dombyra» qarasózin aqyn «Denem kúıdi... Júregim aýzyma tyǵyldy. Kózimnen ystyq jas tógildi... dombyra da kúńirenedi, zarlaıdy, aqyryn jassyz jylaıdy. Jyla, dombyra, jyla» dep aıaqtaıdy. Aqyn nege dombyrany jylatqysy kelip otyr, óıtkeni qazaqtyń muń-qaıǵysy, qýanysh-jaqsylyǵy tek dombyra únimen, qos ishektiń tilimen sharshy álemge jetip jatatyn.
