Grand Slamnan bas júlde buıyrmady

20 dzıýdoshy senimdi aqtady ma?

Dúbirli doda aldynda Almaty ob­ly­syndaǵy Olımpıadalyq izbasarlar daıar­laıtyn ortalyqta sońǵy oqý-jattyǵý jıyndaryn ótkizgen Qazaqstan quramasy Mońǵolııa astanasynda ótken jarysqa jalpy sany 20 (13 er, 7 qyz) dzıýdoshy­ny alyp bardy. Atap aıtsaq, Nur­bol Súleımenov baptaıtyn erler qu­rama­synyń sapynda Baýyrjan Narbaev
(60 kg), Qanat Seıilhan (60 kg), Eldos Smetov (66 kg), Ǵusman Qyrǵyzbaev
(66 kg), Erlan Serikjanov (73 kg), Ańsarbek Ǵaınýllın (73 kg), Bekádil Shaımerdenov (81 kg), Abylaıhan Juba­nazar (81 kg), Ersultan Muzap­parov (90 kg), Dıdar Hamza (90 kg), Nurlyhan Sherhan (100 kg), Islam Bozbaev (100 kg), Ádil Orazbaev (+100 kg) syndy balýandar bar.

Áıelder quramasyn baptaıtyn Erlan Alpysbaev Ulan-Batyr qalasyndaǵy jarysqa Abıba Abýjaqynova (48 kg), Sa­malaı Erǵalıeva (63 kg), Zere Bektasqyzy (70 kg), Ekaterına Tokareva (70 kg), Arýna Jangeldına (–78 kg), Naz­gúl Maratova (+78 kg), Kamıla Berliqash (+78 kg) syndy boıjetkenderdi qosty.

Júldegerlerdi aıtpas buryn aldymen, dzıýdoshylarymyzdyń 2022 jyly júrip ótken jarystaryna toqtalyp ótsek.

Tel-Avıvtegi ala-qula kórsetkish

Bıyl 17-19 aqpan aralyǵynda Iz­raıl­diń Tel-Avıv qalasynda ótken Grand Slam týrnırinde Qazaqstannyń er­ler quramasy 1 kúmis, 2 qola medal jeńip aldy. Bul dzıýdoshylarymyzdyń bıylǵy josparlanǵan alǵashqy jarysy bolatyn. Onda 60 kg salmaqta óner kór­setken Baýyrjan Narbaev kúmis medal enshilese, 73 kıloda kúresken Jansaı Smaǵulov úzdik úshtikten kórinip, Grand Slam básekesiniń júldegeri atandy. Sonymen qatar 60 kg salmaqta el namy­syn qorǵaǵan taǵy bir otandasymyz Maǵ­jan Shamshaddın qola medalǵa ıe boldy. Áıtkenmen, bul joly Ulan-Batyrdaǵy dodaǵa M.Shamshaddın barmady. Onyń ornyna Qanat Seıilhan baryp, quralaqan qaıtty.

Byltyr Tokıo Olımpıadasynan keıin 66 kılo salmaqqa aýysqan Eldos Smetov aqpan aıynda ótken Izraıl astanasyndaǵy alamanda jańa salmaqta baǵyn synaǵan edi. О́kinishke qaraı, Smetovtiń sol jarysta joly bolmady. Ol birinshi aınalymda nıderlandtyq balýandy jeńgenimen, ekinshi aınalymda ıspanııalyq qarsylasynan aılasyn asyra almady. Kóptegen halyqaralyq jarystardyń jeńimpazy, álem chempıo­na­tynyń kúmis medal ıegeri Ǵusman Qyr­ǵyzbaev ta 66 kıloǵa ótip, onyń da al­ǵashqy Grand Slam saıysy sátsiz aıaq­taldy.

Sáýir aıyndaǵy sátsizdik

Sáýir aıynda Túrkııanyń Antalıa qa­la­synda taǵy bir Grand Slam jary­synyń jalaýy kóterildi. Qazaqstan quramasy bul básekege 23 balýandy qosyp, barlyǵy da bos qaıtty. Eń jo­ǵary nátıjemiz 73 kılodaǵy Jansaı Smaǵulovtyń besinshi orny boldy. О́kinishtisi sol, Antalıaǵa elimizden eń myqty degen balýandardyń bári qatysty. 60 kılodaǵy Maǵjan Shamshaddın men Baýyrjan Narbaev, 66 kıloda Eldos Smetov pen Ǵusman Qyrǵyzbaev, 90 kıloda Dıdar Hamza, 100 kılo salmaqtyń tizginin ustaǵan Islam Bozbaev Túrkııa tórinde tóselgen tatamıde birinen keıin biri jyǵylyp jatty.

Sol synda medal alýǵa múmkindigi bolǵan balýannyń biri Jansaı Smaǵulov bolatyn. Ol óz tobynda birinshi oryn alyp, jartylaı fınalǵa shyqqanymen Grýzııa balýanynan jeńilip qaldy. Dál osy beldesýde otandasymyz tizesinen jaraqat alyp, qola medal úshin bolǵan beldesýge shyǵa almaı, besinshi orynmen shekteldi. Jansaı qazirgi kúni jaraqatyn emdetip júr. Ulan-Batyrdaǵy Grand Slamǵa qatysqan joq. Eger bári jaqsy bolyp, qatarǵa qosylyp jatsa, tamyz aıynda ótetin Azııa chempıo­natynda baq synaýy múmkin.

Kópten kútken medaldar

Qazaqstan quramasy Ulan-Batyr­daǵy álemdik Grand Slam jarysyn 4 qo­la júlde enshilep, medal kestesi bo­ıyn­sha jalpy­ko­mandalyq esepte 11-oryn­men aıaqtady. Bul jarys Pa­rıj Olım­pıa­dasyna reıtıngte upaı úles­tiriletin alǵashqy álemdik báseke.

Dzıýdodan Ulan-Batyr qalasyndaǵy Grand Slam jarysynda Abıba Abýja­qynova 48 kılo salmaqta qurama qor­jynyna alǵashqy qola medaldy saldy. Buryn qyzdardan júldeni tek Otgon­seseg Galbadrah áperetin edi. Abıbanyń qolasy basqa sportshylarǵa úmit syılady. Abıba (reıtıngte 61-orynda) Mońǵolııadaǵy jarysta óte tájirıbeli Shıra Rıshonıdy (Izraıl, álemdik reıtıng 6-orynda), reseılik Sabına Gılıa­zovany (Reseı, reıtıngte 28-oryn) jeńdi. Abıba Ulan-Batyrdaǵy qola­sy úshin 500 upaı alyp, 61-orynnan sha­mamen 35-36-orynǵa kóteriledi. Abı­ba Abýjaqynova 2017 jyly jastar ara­syn­daǵy álem chempıonatynda kúmis medal alǵanyn aıta keteıik.

Buryn áıelder kúresinde asa aýyr salmaqta Gúljan Isanova halyqaralyq jarystarda el namysyn abyroımen qorǵaǵanyn bilemiz. Azııa chempıonaty, Azııa oıyndarynda jáne birneshe ha­lyqaralyq jarystarda júldeli orynnan kóringeni jankúıerler esinde bolar. Gúljan sporttyq karerasyn aıaqtaǵannan keıin Kamıla Berliqash sııaqty qyzdar el namysyn qorǵap keledi. 22 jastaǵy Kamıla alamannyń sońǵy jarys kúninde qola júldeger atandy. Bul Kamılanyń halyqaralyq jarystardaǵy alǵashqy júldesi. Bıyl Tel-Avıvte ótken Grand Slamda jetinshi, Tbılısıdegi Grand Slamda besinshi oryn alǵan. Endi, mine úzdik úshtikten kórinip otyr.

Erler quramasy da eki qola medalǵa ıe boldy. Jarystyń sońǵy kúni 90 kg salmaqqa bıyl ǵana aýysqan Dıdar Hamza qola medal jeńip aldy. Ol alǵashqy aınalymda Chehııa balýany Klammertti utsa, ekinshi aınalymda mońǵoldyń myqtysy Altanbaga Gantýlgadan basym tústi. Shırek fınalda osy jarystyń favorıtteriniń biri nıderlandtyq Esper Smınkti utty. Jartylaı fınalda IJF atynan óner kórsetken reseıdiń myqtysy Mıhaıl Igolnıkovqa ese jiberdi. Qola medal úshin beldesýinde IJF atynan óner kórsetken taǵy bir Reseı balýany Mıhaıl Larıonovty utty.

D.Hamza 2016 jyly 19 jasynda sensasııa jasap Azııa chempıony atanyp, Rıo Olımpıadasyna qatysty. 2018 jyly Azııa oıyndarynyń jeńimpazy atandy. Biraq Grand Slam jáne Grand Price týrnırlerinde joly bolmaı júrgen. Byltyr Tokıo Olımpıadasyna qatysyp, bos qaıtqanyn óz kózimizben kórdik. Bul Dıdardyń Grand Slam týrnırindegi alǵashqy júldesi.

Sondaı-aq atalǵan saıysta asa aýyr salmaqta Ádil Orazbaev qolany qanjyǵasyna baılady. Shyny kerek, aýyr salmaqta álemdik arenada el namysyn abyroımen qorǵaǵan Erjan Shynkeev shyǵar. Búgingi dodada Á.Orazbaev qola júldege ilinip, asa aýyr salmaqtaǵy reıtıngke senimdi kirip keldi.

Azııa myqtylary elordada bas qosady

Azııa myqtylary demekshi, bıyl sary qurlyq birinshiligi Nur-Sultan qalasynda ótedi. Qytaıdyń Hanjchoý qalasynda ótýge tıis Azııa oıyndary kelesi jylǵa shegerilgendikten Azııanyń dzıýdo qaýymdastyǵy qurlyqtyq jarys­ty ótkizý týraly sheshim qabyldap, ony elimizge senip tapsyrdy. Halyqaralyq dzıýdo qaýymdastyǵynyń kúntizbesinde Azııa chempıonaty 4-7 tamyz aralyǵyna josparlaǵan.

Byltyr Azııa chempıonaty Qyrǵyz­stan­nyń Bishkek qalasynda ótti. Onda Qazaqstan quramasynyń balýandary 2 kúmis, 2 qola medal alyp, komandalyq esepte altynshy orynǵa ıe boldy. Ońtústik Koreıa 5 altyn, 5 kúmis, 8 qola medalmen birinshi orynǵa ıe bolsa, Qytaı men О́zbekstan 3 altyn, 2 kúmis, 6 qola medalmen ekinshi-úshinshi oryndardy bólisti.

Smaǵulov – besinshi orynda

Birneshe kún buryn Halyqaralyq dzıýdo qaýymdastyǵy álemdik reıtıngti qaıta túzdi. Qazaqstan dzıýdoshylarynyń arasynda Jansaı Smaǵulovtan basqasynyń barlyǵy ondyqtyń aýylynan alys ornalasqan.

Jansaı jańadan jasalǵan reıtıngte besinshi orynda tur. Bıylǵy jyldyń eki birdeı Grand Slamynda úzdik bestikte bolǵan balýanymyz 860 upaıǵa ıe boldy. Aldymen Tel-Avıvtegi qola medali úshin 500 upaı berilse, Antalıadaǵy besinshi orynǵa 360 upaı aldy.

Kezinde úz­dikter qatarynda júretin Eldos Sme­tovtiń jańa salmaqtaǵy nátıjesi kóńil qýantarlyqtaı emes. Jyldyń basynan beri ol eki jarysqa qatysyp, 360 upaı aldy. 66 kılo salmaqta kúresýdi endi ǵana bastaǵan sportshymyz 89-orynda tur. Al dál osy salmaqtaǵy taǵy bir balýanymyz Ǵusman Qyrǵyzbaev 480 upaımen 72-orynda. Iаǵnı Smetovten 17 satyǵa joǵary.

Qazaqstan dzıýdoshylary arasynda nátıjesi jaǵynan alda turǵan balýandarymyzdyń biri Kamıla Berli­qash +78 kılo salmaqta el namysyn qor­ǵap júrgen boıjetkenimiz álemdik reıtıngte 31-orynǵa jaıǵasqan. Dál osy salmaqtaǵy Nazgúl Maratova 36-orynda.

60 kılo salmaqta Maǵjan Shamshaddın men Baýyrjan Narbaevtyń nátıjeleri bir-birine shamalas. Maǵjan tizimde 38-shi tursa, odan eki saty tómen Baýyrjan Narbaev ornalasqan.

90 kılo salmaqta 2019 jylǵy Azııa chempıonatynan beri birde-bir jarys­ta júlde almaǵan Islam Bozbaevtyń 100 kıloǵa aýysqany qalaı bolar eken? Tokıo Olımpıadasynan keıin jańa salmaqqa ótken Bozbaev bıylǵy úsh birdeı jarysta júldesiz qaldy. Islam dál qazir reıtıngte 107-orynda tur. Sol sııaqty 81 kılodan 90 kıloǵa aýysqan Dıdar Hamzanyń da ulttyq quramada júrip júlde almaǵanyna biraz jyldyń júzi bolǵan. Áıtkenmen, Mońǵolııadaǵy jarystan 500 upaı jınaǵan Dıdar reıtıngte jaǵdaıyn jaqsartatyny sózsiz. Jerlesimiz 90 kg tartatyn balýandardyń arasynda ázirge 202-orynda tur.

Mine, qazaqstandyq dzıýdoshylardyń búgingi áleýeti osyndaı. Jalpy, osyǵan deıin jerlesterimiz Grand Slamnan jeti ret altyn medal jeńip alǵan. Atap aıtqanda, Maksım Rakov (2014 j. Baký), Rýstam Ibraev (2015 j. Baký), Islam Bozbaev (2017 j. Baký), Eldos Smetov (2018 j. Ekaterınbýrg), Ǵusman Qyrǵyzbaev (2019 j. Abý-Dabı) aldyna jan salmasa, Otgonseseg Galbadrah (2016 j. Abý-Dabı, Parıj) dál osy týrnırde eki ret jeńimpaz atanǵan edi.