Aımaqtar • 29 Maýsym, 2022

Masa mazany ala bastady

63 ret kórsetildi

Iá, dál solaı. Boran, Qaljyr aýyly turǵyndaryna masa maza berer emes. Qan sorǵyshtar aýyl tóńireginde qara bult­taı býyp turady. Shydas bermegen el kóship te jatyr. Sońǵy eki jylda masa tipten kóbeıgen, yzyńy qulaq tundyrady. Balalar dalaǵa shyǵýdan qaldy desedi turǵyndar. Al «Zaısan aýdandyq dezınfeksııalaý stansııasy» JShS mamandary ýlaý jumystaryn júrgizip-aq jatyr. Nátıje shamaly.

– Masamen kúresti júıe­li túrde júrgizip otyrmyz. 5-31 ma­myr aralyǵynda der­násilderin ýladyq. Al 12 maý­symnan bas­tap ushyp júrgen masalardy ýlaý­men álekpiz. Shama kelgen­she, azaıtýǵa ty­ry­sýdamyz. Endi ushaq shaqyr­typ, bir júrip ótse deımiz. Biraq túp-tuıaǵymen joıa almaımyz. Masanyń uıasy yl­ǵaldy, qamysty, batpaqty jerde bolady. Sondyqtan ózen ań­ǵa­ryndaǵy shalshyq sýlardy qur­ǵatý kerek, – deıdi «Zaısan aýdandyq dezınfeksııalaý stansııasy» JShS-nyń bas mamany Bıbıgúl Batyrhanova.

Aýyldyqtardyń aıtýynsha, Keńes ókimeti tusynda ushaqpen ýlap, qustarǵa deıin qyryp salady eken. Árı­ne, qustardy emes, terezeler­de kıiz bolyp tur­ǵan masalar­dy joıý kerek. Byl­tyrlary deltaplanmen ý shashyp, azaıtpaq bolypty. Alaı­da esh paıda bolmaǵan. Ushyp júrgen masalardy ǵana qyryp salǵan kórinedi. Nátıje bolmaǵan soń, bıyl mamandar qolmen sha­shyp ýlaýǵa kirisken.

– Kúrshim aýdandyq tur­­ǵyn úı-kommýnaldyq sharýa­shylyǵy­nan qarjy bólinip, masalardy ýlaýǵa kóktemde kiriskenbiz. Mynaý kúnniń qapyryǵynda áıelder tumsha­lanyp, ý shashyp júr. Qoldan kelgenshe eńbektenip-aq jatyr. Biraq mańaıdyń bári sazdaýyt. Menińshe, ǵylymı-zert­teý júrgizip baryp, iske kirispesek, bolmaıtyn sekildi, – deıdi Qal­jyr aýyldyq okrýginiń ákimi Qýat Qızatov.

Jalpy, dezınfeksııalaý ju­mystaryna 18 mln 750 myń teń­ge qarastyrylǵan eken. Onyń 10 mln teńgege jýy­­ǵy «Zaısan aýdandyq dezın­feksııalaý stansııasy» JShS-na berilgen. Alǵa­shynda dernásilderin «baısıdal», «agran» deıtuǵyn dezın­fek­sııa­lyq prepa­rat­tarmen ýla­ǵan. Ekinshi ke­zeńde «amazan», «sıfoks», «fobı» sekildi preparattardy paı­dalanýda. Al ekolog mamandardyń paıym­daýyn­sha, masanyń munshalyqty shekten tys kóbeıýi qustardyń azaıyp ketkendiginen eken. Ol da múmkin. О́tkende ornı­tolog ǵalym Borıs Sherbakov qustyń qaı túri bolsyn, azaıyp ketkendigin aıtyp dabyl qaqqan. Bálkim, okrýg ákimi aıtqandaı, jedel túrde ǵy­lymı-zertteý jumystary júr­gizilýi kerek shyǵar. Áıtpese, ýlap taýysý múmkin emes, ras.

Ádette el jaz shyqsa qýa­nar edi. Al Qaljyr, Boran jaq­­­tyń turǵyndary alańdaı bastaıdy. Ala jazdaı masa­nyń yzyńy qu­laqtan ket­peı­di. Yzyńyn qoıshy, ınfeksııa ­taratýy ábden múmkin. Qala ber­di maldyń jaıylýy qıynda­ǵan. Tańerteń, keshke sıyr saýý da áýre eken. Tútin salady, hımııalyq zattaryn shashqan bolady. Qaıran joq.

– Masa degenge mán ber­meı­tin de shyǵar joǵarǵy jaq. Biraq býyp turǵan masa bizdi áb­den qajytty. Dalada júrý múmkin emes. Senesizder me? Qal­jyr men Qara Ertistiń ortasynda otyr­myz. Masanyń ordasy. Ba­lany qoıyp, ózimiz dalaǵa shy­ǵý­ǵa tartynshaqtaımyz. Bet soǵa­dy. Túk qaldyrmaı talaıdy. Shó­bimizdi qalaı shaýyp ala­myz, bil­meımin. Byltyr da osy­laı bol­ǵan. Bıyl azaıatyn shy­ǵar de­genbiz. Kóbeımese, azaı­ǵan joq. Masa máselesin res­pýb­lı­kadaǵy basshylarǵa sizder jet­kizbeseńizder, aýdan men oblys bas­shylaryna des bereıin dep tur­ǵan joq, – deıdi Boran aýylynyń turǵyny Gúljan Sákenova.

Bul bir ǵana turǵynnyń tile­gi emes, Qaljyr, Boran, Qazaq­stan, Igilik, Jańa aýyl sekildi birneshe aýyl tur­ǵyndarynyń ótinishi, aryz-tilegi. Onyń ústine torǵaıdaı masa bir ǵana dezınfeksııalaý stansasynyń mamandaryna boı bermeıtin sııaqty.

 

Shyǵys Qazaqstan oblysy,

Kúrshim aýdany

Sońǵy jańalyqtar

Búgin 3 qalada aýa sapasy nasharlaıdy

Aýa raıy • Búgin, 09:38

Uqsas jańalyqtar