Aımaqtar • 30 Maýsym, 2022

«Altynalmas» – ESG-klýbynyń negizin qalaýshylardyń biri

34 ret kórsetildi

Altyn óndirý isinde aıtarlyqtaı tabysqa jetken «Altynalmas» kompanııasy óz múmkindikterin keńeıtip keledi. Kúni keshe alpaýyt ujym ESG klýbynyń negizin qalaý­shy­lardyń biri atandy. Al Ulttyq ESG klýby turaqty damý jáne ESG qaǵıdattaryn ilgeriletetin jaýapty ınves­torlar men kompanııalardy jumyldyrý boıynsha front-alańǵa aınalmaq.

ESG klýbynyń músheleri turaqty damý maqsattaryna qol jetkizýge, energııa tıim­diligin arttyra otyryp qor­shaǵan ortaǵa keler zalaldy barynsha azaıtýǵa, eńbek jaǵdaılaryn jaqsartýǵa jáne adam quqyqtaryn saqtaýǵa, sondaı-aq ESG salasyndaǵy úzdik tájirıbelerdi taratýǵa yqpal etýdi kózdeıdi.

ESG klýbyn qurý týraly kelisimge qol qoıý rásimi Astana Finance Days dástúrli qarjy konferensııasy aıasynda ótti. Basqosý barysynda konferensııaǵa qatysýshylar ESG qaǵıdattaryn engizýdi qol­daýdyń zamanaýı trendterin, syn-tegeýrinderi men sharalaryn jan-jaqty talqylady.

Reıtıngtik agenttikterdiń ádisnamasyna sáıkes kom­pa­nııanyń ESG qyzmetin anyqtaıtyn jáne ekologııa, áleýmettik jaýapkershilik pen tıimdi korporatıvtik basqarý salalaryn qamtıtyn 70 bólimi bar. Al qarjy naryqtaryn­da emıtentteri jeke kompanııalar da, memleketter de bolyp tabylatyn osy qyzmetti jaqsartýǵa ba­ǵyttalǵan oblıgasııalar shy­ǵarylymynyń ósýi baıqalǵan.

Sondaı-aq konferensııa­da ESG kompanııalarynyń qyzmetin qarjylyq yntalan­dyrýdyń yqtımal tetikteri týraly sóz bolyp, álemdik praktıkadan mysaldar kel­tirildi. Atap aıtqanda, ESG kún tártibine baılanys­ty máse­lelerdi sheshýge baǵyt­talǵan jobalardy nemese baǵ­darlamalardy jeńildikpen qarjylandyrý arqyly kom­panııalardyń ESG qyzmetin yntalandyrý múmkindigi artpaq. Bul tusta kompanııalardyń turaqty damý deńgeıin arttyrýǵa ǵana emes, ESG bastamalaryn is­ke asyrý arqyly óńirlerdiń ekonomıkalyq damýyna yqpal etetin fıskaldyq yntalan­dyrý­dy qoldaný múmkindigi de keńeımek.

Kompanııa ókilderiniń aıtýynsha, «Altynalmas» ESG qaǵıdalaryn engizý boıynsha belsendi jumys júrgize otyryp, bıylǵy jyly ESG joǵary reıtıngtik baǵasyn alýǵa nıetti.

Jańa uıymnyń seriktes­teri qatarynda – «Astana halyq­aralyq qarjy ortalyǵynyń ákimshiligi» AQ, «Qazaqstan qor bırjasy» AQ, Eýrazııalyq damý banki, Green Technology Hub, «Ekonomıkalyq zertteý­ler ınstıtýty» AQ, «ESG Ulttyq turaqty damý odaǵy» ZTB jáne Qazaqstannyń qarjy jáne ónerkásip sektorlarynyń basqa da kásiporyndary bar.

Sońǵy jańalyqtar

Búgin 3 qalada aýa sapasy nasharlaıdy

Aýa raıy • Búgin, 09:38

Uqsas jańalyqtar