Qarjy mınıstrligi Memlekettik kirister komıteti mamandarynyń habarlaýynsha, kólik salyǵy boıynsha qaryzǵa belshesinen batyp júrgenderdiń deni Almaty qalasynda. Bul shahardaǵy 88 myń boryshkerdiń memleketke qaryzy 5,2 mlrd teńgege jetken. Odan keıingi orynda Almaty oblysy tur. Munda 132 myń boryshker bar bolsa, olardyń qaryzy 3,9 mlrd teńgeni quraǵan.
Salyq bereshegi jaǵynan Nur-Sultan men Shymkent qalalarynyń turǵyndary da qalyspaı tur. Olardyń jalpy boryshy – 2,6 mlrd teńge, sonyń ishinde 76 myń boryshkerdiń 1,9 mlrd teńge qaryzy bar.
Memlekettik kirister komıteti basqarma basshysynyń orynbasary Aınur Sartaevanyń aıtýynsha, 2021 jylǵa kólik quraldaryna salyq tóleý merzimi 2022 jylǵy 1 sáýirde aıaqtalǵan. Al 2022 jylǵy 17 mamyrdan bastap salyq somasyn ýaqtyly tólemegen azamattarǵa salyq bereshegin óndirip alý týraly salyq buıryqtary joldana bastady. «Salyq qaryzy tólenbegen jaǵdaıda salyq buıryǵy tabys etilgen kúnnen keıin 5 jumys kúni ótken soń qujat jeke sot oryndaýshylarynyń óńirlik palatasyna májbúrlep oryndatýǵa jiberiledi. О́z kezeginde jeke sot oryndaýshylary «Atqarýshylyq is júrgizý jáne sot oryndaýshylarynyń mártebesi týraly» zańǵa sáıkes bank shottary men múlkine tyıym salý túrinde májbúrlep óndirip alý sharalaryn qoldanýǵa quqy bar. Eger qaryz 40 AEK-ten assa, azamatqa elden shyǵýǵa tyıym salynýy múmkin. Bul týraly aqparatty myna silteme arqyly bilýge bolady https://aisoip.adilet.gov.kz/debtors», deıdi A.Sartaeva
Qazirgi kez – jazǵy demalys kezeńi. Ýaqytyn qyzyqty ári tıimdi ótkizý úshin keıbireýler otbastarymen shetelderde demalǵandy jaqsy kóredi. «Osyndaı demalys maýsymy kezinde jaǵymsyz saldarlardy boldyrmaý úshin Komıtet salyq bereshegi bolǵan jaǵdaıda ony ýaqtyly tóleýge keńes beredi. Salyq qaryzy týraly málimetterd e-Salyq Azamat mobıldi qosymshasyndaǵy «Elektrondy servıster» bóliminen kórýge bolady», deıdi mamandar.
