Aımaqtar • 30 Maýsym, 2022

Jaıyq ózenine bekire tuqymdas 3,5 mln balyq shabaǵy jiberildi

27 ret kórsetildi

29 maýsymda Jaıyq-Atyraý bekire balyq ósirý zaýyty memlekettik kásiporny Jaıyq ózenine 3,5 mln dana bekire balyq túrleriniń shabaqtaryn jiberdi, dep habarlaıdy Egemen.kz.

Ekologııa, geologııa jáne tabıǵı resýrstar mınıstrliginiń baspasóz qyzmeti habarlaǵandaı, bul jumys balyq resýrstaryn molaıtý jónindegi memlekettik tapsyrys sheńberinde bekire tuqymdas balyq túrleriniń qorlaryn saqtaý jáne qalpyna keltirý maqsatynda jyl saıyn júrgiziledi.

«Bekire shabaqtaryn sý aıdyndaryna jiberý buqaralyq aqparat quraldarynyń qatysýymen Jaıyq-Kaspıı oblysaralyq basseındik balyq sharýashylyǵy ınspeksııasy qyzmetkerleriniń, jergilikti atqarýshy organ, qoǵamdyq jáne ǵylymı uıymdar ókilderiniń qatysýymen komıssııalyq túrde júzege asyryldy. Bekire tuqymdas balyqtardyń shabaqtary (qortpa, shoqyr, orys bekiresi, súırik) zaýytta jasandy túrde ósirilgenin atap ótken jón», delingen mınıstrlik habarlamasynda.

Jyl saıyn zaýyt Jaıyq ózeniniń uıyqtyq ýchaskelerinde bekire tuqymdas balyq túrleriniń óndirýshilerin (atalyq jáne analyq) aýlaıdy, odan ári ınkýbasııalaý úshin olardan tiri kezinde jynystyq ónimder (ýyldyryq jáne shoǵal) alady. Mysaly, osy jyldyń 19 sáýirinde ustalǵan, salmaǵy 190 keli qortpadan ýyldyryq alǵannan keıin tabıǵı meken etý ortasy úshin ortasha salmaǵy 15 gramm 729 myń dana shabaq alyndy, olar búgin ózenge jiberildi. Sonymen qatar 629 myń dana súırik, 419 myń dana orys bekiresi jáne 1,723 mln dana orys bekiresiniń shabaqtary jiberildi.

«Jalpy 2022 jyly memlekettik tapsyrys sheńberinde tabıǵı mekendeý ortasyna 93,1 mln dana qundy balyq túrleriniń shabaqtaryn, onyń ishinde 7,5 mln dana bekire shabaqtaryn jiberý josparlanǵan. Búgingi kúni memlekettik kásiporyndar men jeke balyq ósirý sharýashylyqtary 69,4 mln dana balyq shabaqtaryn ósirip, tabıǵı mekendeý ortasyna jiberdi», delingen habarlamada.

Bul rette balyq resýrstaryn jasandy jolmen molaıtý jónindegi jumystar jalǵasýda jáne ony aǵymdaǵy jyldyń qazan aıynda aıaqtaý josparlanyp otyr.

 

Sońǵy jańalyqtar

Búgin 3 qalada aýa sapasy nasharlaıdy

Aýa raıy • Búgin, 09:38

Uqsas jańalyqtar