Álem • 03 Shilde, 2022

Lısıchansk kimniń qolynda?

48 ret kórsetildi

Ýkraınadaǵy áskerı qaqtyǵystyń biter túri kórinbeıdi. Qazirgi tańda Donbassta keskilesken aıqas júrip jatyr. Reseı tarapy Lısıchansk qalasy mańynda alǵa jyljyp, birqatar eldi mekendi basyp aldy. Al Ýkraına Herson baǵytynda qarymta shabýylǵa shyǵyp, birtindep aýyldardy azat ete bastady.

Qazirgi tańda Lısıchansk qalasy kimniń qolynda ekenin tap basyp aıtý qıyn. Reseıdiń keıbir buqaralyq aqparat quraly áskerıler kentti basyp alǵanyn habarlady. Endi biri týıtterde qaladaǵy soǵys memorıalyna Keńes týy tigilgeni týraly beınejazba jarııalady. Áıtse de táýelsiz sarapshylar men jýrnalıster bul málimetti teksere almaı otyr.

Lýgansk separatısteri óz kezeginde kent mańyndaǵy strategııalyq bıikterdi basyp alǵanyn habarlady. Osylaısha, Lısıchansk tolyǵymen qorshaldy dep málimdedi.

Ýkraına qalanyń basyp alynǵanyn da, qorshaýda qalǵanyn da joqqa shyǵardy. Lýgansk oblysynyń gýbernatory Sergeı Gaıdaıdyń aıtýynsha, Lısıchanskini qazir Ýkraına áskeri baqylap tur. Ýkraına Ulttyq gvardııasynyń ókili BBC arnasyna Lýgansk separatısteriniń qalany qorshap alǵany shyndyqqa janaspaıtynyn jetkizgen.

Degenmen S.Gaıdaı Lısıchanskini Reseı áskerleri birneshe baǵyttan atqylap jatqanyn rastady. Ulybrıtanııanyń Qorǵanys mınıstrligi barlaý esebinde Reseı tarapy Lısıchansk aımaǵynda áýeden jáne artıllerııadan oq jaýdyryp, mıtyńdap alǵa jyljyp kele jatqanyn jazǵan.

Lısıchansk – Lýgansk oblysyndaǵy Ýkraına qaramaǵynda bolǵan eń sońǵy iri qala. Buǵan deıin qarsylas tarap Severodonessk qalasyn basyp alǵan edi. Alda-jalda Lısıchansk Reseıdiń qolyna ótse, onda Lýgansk oblysy tolyqtaı okkýpasııaǵa ushyraıdy.

Ýkraına jaǵy Donbassta biraz aýmaǵynan aıyrylyp qalǵanymen, Herson baǵytynda aıtarlyqtaı tabysqa qol jetkizdi. El qarýly kúshteri soǵys bastala sala jaý qolynda qalǵan qalaǵa taıaq tastam jerge kelip tur. Ázirge Ýkraın jaýyngerleri Hersonǵa tikeleı shabýyl jasaı ma, joq pa belgisiz. Conflict Intelligence Team sarapshylary qalany azat etý úshin Ýkraına kóp sarbazyn qurban etýi múmkin ekenin alǵa tartady. Sondyqtan onyń aınalasyndaǵy eldi mekenderdi azat etip, shaharda bekingen qarsylastaryna keletin oq-dárileriniń jolyn kesip, aqyrynda sheginýine ıtermeleý kerek dep esepteıdi.

Aıtpaqshy, Qara teńizdiń Ýkraına jaǵalaýyna jaqyn mańda Zmeınyı dep atalatyn shaǵyn aral bar. Áskerı qaqtyǵys bastalǵan tusta osy bir qarys jerdi qorǵaǵan ýkraın sarbazdary «Moskva» kreıserine aıtqan sózi búkil álemdi sharlap, Zmeınyıdyń aty shyqqan bolatyn. Kóp uzamaı-aq Reseı teńiz kúshteri araldy basyp aldy. Sóıtip onda baza ornatýǵa tyrysqan.

Jalpy bul qadam túsinikti de. Zmeınyı – Qara teńizdegi plasdarm. Eger onda zamanaýı áýe qorǵanysy júıesin eshelonmen ornalastyrsa, sý ústinen yzyńdaǵan shybyn usha almaıtyn edi. Onyń ústine, «Moskva» kreıseri sýǵa batqannan keıin araldyń mańyzy arta tústi.

Biraq Ýkraına jaǵy qarap jatqan joq. Qaıta-qaıta Zmeınyıǵa áýeden «Baıraktar» arqyly soqqy jasap, raketamen dúrsin-dúrsin atqylap turdy. Tipti ushaqpen kelip bomba tastap, onda ornalastyrylǵan qorǵanys júıelerin qıratýmen boldy. Bylaısha aıtqanda, ashyq sýdaǵy qorǵanatyn jartasy joq bir shókim jer ońtaıly nysanaǵa aınaldy.

Osydan birneshe kún buryn Reseı qorǵanys mınıstrligi Zmeınyı aralynan áskerin shyǵarǵanyn habarlady. Vedomstvo málimdemesinde mundaı qadamdy «izgi nıet retinde» jasalǵany aıtylǵan.

«Reseı Federasııasy BUU-nyń Ýkraına aýmaǵynan aýylsharýashylyq ónimderin eksporttaý úshin gýmanıtarlyq dáliz uıymdastyrý jónindegi kúsh-jigerine kedergi keltirmeıtini álemdik qoǵamdastyqqa kórsetildi. Osylaısha Reseıdiń Qara teńizdiń soltústik-batys bóligin tolyq baqylaýynda ustaýy Kıevtiń astyq eksporttaýǵa kedergi keltirdi dep syltaý aıtýyna múmkindik berilmeıdi», delingen málimdemede.

Biraq sarapshylar Reseı qorǵanys mınıstrligi áskerin amalsyz áketkenin alǵa tartady. О́ıtkeni Ýkraına birneshe ret araldy snarıadpen atqylap, ondaǵy tehnıkalardy qıratyp tastaǵan. Jalpy, Reseı mundaı «izgi nıet» týraly alǵash ret aıtyp otyrǵan joq. Ýkraınanyń soltústik bóliginen (Kıev, Chernıgov jáne Sýmy oblystary) shegingende de osylaı aıtqan edi. Batys sarapshylary sol kezde Reseı bul aımaqtarda áskerı jeńiliske ushyrap, sheginýge májbúr boldy degen pikir aıtty.

Zmeınyı aralynan áskerin áketken soń Reseı tarapy Ýkraınanyń birneshe qalasyn zymyranmen atqylady. Sonyń saldarynan raketalar beıbit turǵyndardyń tóbesine qulap, elýge jýyq adam mert boldy. Máselen ótken juma kúni tańerteń reseılik ushaqtar Odessa mańyndaǵy kýrorttyq aýylǵa úsh bomba tastaǵan. Zymyrandar qaladan ońtústikke qaraı 80 shaqyrym jerde Belgorod-Dnestrovskıı aýdanyndaǵy Sergeevka aýylyna tústi.

Raketanyń biri toǵyz qabatty turǵyn úıge tıip, ony jartylaı qıratty. Qalǵan ekeýi demalys oryndaryna túsken. Resmı málimet boıynsha, 21 adam qaza tapty. Opat bolǵandar arasynda 12 jasar bala bar. Zardap shekken 38 adamnyń altaýy bala. Ýkraına tótenshe jaǵdaılar jónindegi memlekettik qyzmeti jaralanǵandardyń biri júkti áıel ekenin habarlaǵan. Zardap shekken 8 adam qırandy astynan qutqarylǵan kórinedi.

Kreml bıligi Reseı áskeri azamattyq nysandardy kózdemeıtinin taǵy da málimdedi. «Reseı Federasııasynyń prezıdenti men bas qolbasshysynyń myna sózin qaıta eske salǵym keledi. Arnaıy áskerı operasııa kezinde Reseı qarýly kúshteri azamattyq nysandar men azamattyq ınfraqurylymdarǵa soqqy jasamaıdy», dedi Kreml baspasóz hatshysy Dmıtrıı Peskov.

Conflict Intelligence Team sarap­shylarynyń málimetine súıensek, shabýylǵa ushyraǵan Odessa obly­syn­daǵy aýmaqta eshqandaı áskerı ınfra­qurylym joq. BBC agenttiginiń habar­laýynsha, Reseı tarapy azamattyq ny­sandar men ınfraqurylymdarǵa birin­shi ret shabýyl jasap otyrǵan joq. Onyń ústine, reseılik sheneýnikter beıbit turǵyndardyń zardap shegip jat­qanyn árdaıym joqqa shyǵarady. Tipti halyqaralyq adam quqyqtary jáne gý­manıtarlyq uıymdardyń derekterin esker­meıdi. Kreml mundaı málimetti «jal­ǵan jáne arandatýshylyq» dep ataıdy.

Sonymen qatar Nıkolaev jáne Har­kov oblystaryna da zymyran tastaldy. Harkov oblysynyń gýbernatory Oleg Sınegýbov telegram arnasynda shabýyl­dan eshkim zardap shekpegenin jazdy. Nıkolaev qalasynda qatty jarylys bol­ǵany týraly málimet tarady. Degenmen onyń saldary týraly ázirge derek joq.

Ulybrıtanııa barlaý qyzmeti Reseıdiń kemege qarsy raketalarmen jerdegi nysandardy atqylaý bastaǵanyn habarlady. Munyń sebebin barlaý qyzmeti zamanaýı zymyrandarynyń azaıýymen baılanystyrady. Aǵylshyndardyń mundaı pikirge kelýine 27 maýsymda Kremenchýgtegi oıyn-saýyq ortalyǵyna tastalǵan zymyran áser etti.

Ýkraınanyń ortalyq bóliginde ornalasqan Kremenchýg qalasyndaǵy oıyn-saýyq ortalyǵyna raketa tıgen edi. Sonyń saldarynan 19 adam qaza taýyp, 66 adam jaraqattandy. Shabýyl jasalar kezde ortalyqta kóp adam bolǵan. Jarylǵan bombadan keıin órt shyǵyp, ǵımarat otqa orandy. Aqyrynda onyń kúli ǵana qaldy.

Ortalyqqa tıgen zymyrannyń qalaı kelip jarylǵany jaqyn mańdaǵy beıne baqylaýǵa jazylyp qalǵan eken. Vıdeony taldaý barysynda jarylǵan H-32 raketasy ekeni anyqtaldy. Bul – áýeden jiberiletin qanatty zymyran. Ony Keńes ókimetinen qalǵan, kemege qarsy qoldanylatyn H-22 raketasynyń negizinde qurastyrǵan. Ulybrıtanııa barlaý qyzmeti H-32 ájepteýir jańar­tyl­ǵanymen, onymen jerdegi ǵımarattardy, ásirese qalalyq ortada nysanalardy kózdeý múmkin emesin alǵa tartady.

Batys elderi Ýkraınaǵa kómek retinde dúrkirete atatyn reaktıvti júıelerdi, atap aıtqanda HIMARS qondyrǵysynyń sanaýly danasyn jetkizgen bolatyn. CNN arnasynyń habarlaýynsha, Ýkraına jaýyngerleri ony jedel meńgerip, Reseıdiń komandalyq pýnkterine aıamaı soqqy jasap jatqan kórinedi.

Sońǵy jańalyqtar

Uqsas jańalyqtar