Aımaqtar • 06 Shilde, 2022

Ozyq óndiris ornynda boldy

«Kırpıch SK» zaýyty – Soltústik Qazaqstan oblysynyń Qyzyljar aýdanyndaǵy Podgornoe selosyna ornalasqan táýligine 150 myń kirpish shyǵaratyn ozyq óndiris. Májilis depýtattary Erlik Taıjanov pen Dmıtrıı Koloda osy jyldyń mamyr aıynda iske qosylǵan osy kásiporynnyń jumysymen tanysty.

Jaqsybaı SAMRAT

Zaýyt basshylarynyń aıtýyna qaraǵanda, bul zaýyt tolyq kúshine engende oblys qana emes, respýblıkanyń otandyq kirpishke degen suranysynyń 40-50 paıyzyn qamtamasyz etetin bolady eken.

Májilismender saparynyń maqsaty – saılaýaldy baǵdarlamalardy oryndaý boıynsha jol kartalary sheńberinde iske asyrylǵan nysandarǵa monıtorıng júrgizý. Jańa óndiriske «Soltústik» ÁKK qoldaý kórsetýde. «Kırpıch SK» JShS dırektorynyń orynbasary Abel Bernesıannyń aıtýynsha, óndiristiń ekinshi jelisin salý esebinen munda táýligine 300 myńǵa deıin kirpish óndirý josparlanyp otyr. Al ol joǵaryda aıtqanymyzdaı, eldegi kirpish muqtajdyǵynyń 40-50 paıyzyn jaba alady. «Bir kirpishtiń baǵasy 115 teńgeni quraıdy, bul syrttan ákelingen taýarǵa qaraǵanda 30 teńgege arzan. Shıkizat jergilikti, sonyń ishinde saz Qyzyljar aýdanyndaǵy Podgornoe aýylyndaǵy karerden alynady, kómir Beskól aýylynan ákelinedi», deıdi Abel Bernesıan.

Qazir kásiporynda eki aýysymda 100-ge jýyq adam eńbek etedi, ortasha jalaqy 200-den 250 myńǵa deıin. Qazir zaýyt tek jazǵy maýsymda ǵana jumys isteıdi, biraq jaqyn arada basshylyq jyl boıy jumys rejimine kóshýdi josparlap otyr.

Kásiporynnan alǵan áserimen bólisken Dmıtrıı Koloda: «Eń bastysy, munda jergilikti materıaldar paıdalanylady, alystan eshnárse tasýdyń qajeti joq. Ol ózindik qundy turaqty ustaýǵa múmkindik beredi. Taǵy bir plıýsi – ekinshi materıaldy paıdalaný. Beskól aýylynyń ortalyq qazandyǵynan janyp jatqan kómir kirpish óndirý úshin osynda ákelinedi. Problemalyq suraqtar túsken joq, biz keıbir týyndaǵan máselelerge qatysty arnaıy saýaldar jasaıtyn bolamyz», dedi.

Jalpy depýtattardyń kóshpeli is-sharalary 10 kún boıy jalǵasady. Osy ýaqyt ishinde májilismender azamattardy qabyldap, sý, joldar, qonys aýdarýshylarǵa arnalǵan úıler salýǵa baılanysty jáne basqa ózekti máselelerdi qaraıdy.

Soltústik Qazaqstan oblysy

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz