Bıylǵy «Týr de Franstyń» toǵyz kezeńiniń qorytyndysy boıynsha, qazaqstandyq «Astana» velokomandasynyń ókilderi úzdikter qatarynan kórine alar emes. 2020 jylǵy grand-týrdyń altynshy kezeńinde-aq aldyna jan salmaı, máre syzyǵyn birinshi bolyp kesken kapıtan Alekseı Lýsenko ázirge márege pelotonmen birge jetip júr. Bul – qazaqstandyq komandanyń qazirgi deńgeıi úshin óte jaqsy kórsetkish. Sebebi bıylǵy jarysqa qatysyp jatqan veloshabandozdardyń kóbi mundaı joǵary deńgeıdegi Grand-týrlarda alǵash ret óner kórsetýde. Sondyqtan da olar tájirıbeniń joqtyǵynan Lýsenokoǵa der kezinde kómektese almaı, ońtaıly sátte Alekseıdi qalyń toptyń ishinen sýyryp alyp, márege jetektep jetkizetindeı kúsh-qaırat taba almaı jatyr. Degenmen búkil komanda áli de Alekseı Lýsenkonyń jeke sheberligine senim artady. Astana Qazaqstan Team velokomandasynyń bas menedjeri Aleksandr Vınokýrov komandanyń baspasóz qyzmetine suhbat berip, bıylǵy jarysta joq degende bir-eki kezeńde jeńiske jetýdi kózdeıtinin aıtqan edi.
– Bizdiń basty maqsatymyz – «Týr de Franstyń» bir kezeńinde jeńiske jetý. Múmkin bolyp jatsa taǵy da bir-eki kezeńderde top jarsaq deımiz. Bul bizdiń osy jarystaǵy eń birinshi jáne mańyzdy maqsatymyz. Qalǵanyn ýaqyt enshisine qaldyra turamyz. О́zderińiz biletindeı, bıylǵy Grand-týrǵa komandany kapıtan retinde Alekseı Lýsenko bastap bardy. Ázirge onyń nátıjesine kóńilimiz tolady. Dese de ol áli «Týr de Franstyń» joǵary oryndarynan kórinýge talpynady. Onyń bul nátıjege jetýine tolyq múmkindik bar dep oılaımyn. Jarys aldynda biz oǵan TOP-10 velosportshynyń qatarynan kóriný tapsyrmasyn bergen edik. Búkil komanda Alekseıge kómek kórsetedi. Alaıda jeke kezeńderde jeńiske jetý úshin barlyq velosportshy kúrese alady. О́ıtkeni biz bul jarysqa alty aı boıy daıyndaldyq, – deıdi London Olımpıadasynyń chempıony A.Vınokýrov.
О́kinishke qaraı, bıylǵy dodaǵa osy jarystyń 2014 jylǵy jeńimpazy, jekeleı kezeńderdiń birneshe dúrkin chempıony atanǵan ıtalııalyq Vınchenso Nıbalı men taýly kezeńderdiń koroli kolýmbııalyq Mıgel Anhel Lopes jaraqattaryna baılanysty qatysa almady. Lýsenko, Nıbalı jáne Lopes úshtigi «Týr de Fransqa» qatysqanda, bálkim «Astananyń» qazirgi nátıjesi de, alǵa qoıǵan maqsaty da budan táýir bolar ma edi, kim bilsin?!
Birinshi shildede bastalǵan «Týr de Frans» qazir bel ortasyna taıady. Shveısarııadaǵy alǵashqy taýly kezeńnen keıin jarys kestesine kóz júgirter bolsaq, osy dodanyń keıingi eki jyldaǵy jeńimpazy 23 jastaǵy slovenııalyq veloshabandoz Tadeı Pogachar (UAE Team Emirates) kósh bastap tur. Tórt kezeń boıy sary jeıdege ıelik etken belgııalyq Vaýt van Art (Jumbo – Visma) altynshy kezeńde tómen nátıje kórsetip, jalpy esepte birinshi orynnan 51-satyǵa bir-aq syrǵydy. Degenmen ár kezeńde turaqty nátıje kórsetip kele jatqan onyń danııalyq komandalasy Ionas Vıngegor ekinshi orynǵa kóterilip aldy. Ol Pogachardan 39 sekýndqa qalyp keledi. Úshinshi orynǵa «Týr de Franstyń» 2018 jylǵy jeńimpazy brıtandyq Geraınt Tomas jaıǵasqan.
«Astana» velosportshylarynyń nátıjesine toqtalar bolsaq, ázirge Alekseı Lýsenko jalpy esepte TOP-20 sportshynyń qatarynda tur. Toǵyz kezeńniń qorytyndysy boıynsha jerlesimiz kóshbasshydan shamamen bes mınýtqa qalyp keledi. Áli alda 12 kezeń bar ekenin eskersek, Lýsenkonyń TOP-10 sportshynyń qataryna qosylatyndaı tolyq múmkindigi bar. Alekseıden keıingi úzdik nátıje Sımone Velaskoǵa tıesili. Italııalyq veloshabandoz ázirge 71-oryndy qanaǵat tutýda. Keıingi oryndarǵa qazaqstandyq Andreı Zeıs (103), amerıkalyq Djozef Dombrovskı (114), ıtalııalyq Fabıo Fellıne (121), qazaqstandyq Dmıtrıı Grýzdev (144) jáne belorýssııalyq Aleksandr Rıabýshenko (146) jaıǵasqan. О́kinishke qaraı, segizinshi kezeńde ıtalııalyq Djannı Moskon márege jete almaı, jarys jolynan shyǵyp qaldy. Sondyqtan «Astana» jarystyń qalǵan bóligin jeti veloshabandozben ótkizedi.
