Halyqtyń asa muqtaj bóligine kómek qolyn sozýdy maqsat etken qor áli kúnge iske qaýyrt kirisip, óziniń laıyqty ornyna jete almaı otyrǵany B.Jámishevtiń kóp sóziniń arasynan kórinip qaldy.
«Biz alty aı boıy qordyń tujyrymyn jasaýmen, jobalaryn anyqtaýmen belsendi túrde jumys istedik. Osy jumystardyń barysynda biz qordyń tujyrymy Prezıdenttiń qordy qurý bastamashyldyǵynda belgilegen masshtabyn qamtı almaıtynyn túsindik. Osyǵan baılanysty biz azamattyq qoǵam ókilderin tartatyn úlken konferensııa ótkizý kerek degen sheshim qabyldadyq», dedi ol.
Tóraǵanyń sózine súıensek, alty aıda qorǵa 130 mlrd teńgedeı qarajat quıylǵan eken, biraq sonyń ıgerilgeni týraly aqparattar kóńildi kónshite qoımady. Jarty jylda qordan kómek surap 38 myńdaı adam ótinish túsirgen eken. Sonyń 8 myńy densaýlyq saqtaý, 2 myńy bilim alý jáne basqalary nesıeni jabýǵa kómek, turǵyn-úı satyp alýǵa járdem, bıznesti damytýǵa qolqabys, tipti kıim-keshek pen dári-dármek alýǵa qolushyn berý sııaqty áleýmettik kómekter surapty.
Berilgen kómekter qatarynda 304 adamǵa kóz aýrýynan emdelýge kómek jasaýǵa 370 mln teńge, turmysy tómen otbasylardaǵy 128 balanyń tamyr patologııasyn emdeýge 21 mln teńge bólingeni alǵa tartyldy.
«Biz aıryqsha nazardaǵy balalarǵa járdem beremiz. «Qamqorlyq» qorymen birlese otyryp, ártúrli aımaqtarda erekshe otbasylarǵa kómek jasaý úshin 13 ońaltý ortalyqtaryn qajetti qural-jabdyqtarmen qamtamasyz etemiz. 29 jasqa deıingi balalar men jasóspirimderdi zamanaýı protezdermen qamtamasyz etý baǵdarlamasyn bekittik», dedi B.Jámishev.
Sonymen birge qorǵa Qazaqstanda emdelmeıtin aýrýy bar 8200 adam júginipti. Ondaı naýqastyń keıbirin emdeýdiń joldary bizde áli kúnge anyqtalmaǵan da eken. Mysaly, balalardyń orfandy naýqastary sekildi aýrý túrleri bar. Qor osyndaı naýqastarǵa qajetti dárilerdi aldyrý jolynda elshilikterdiń kómegimen kelissózder júrgizýde kórinedi.
«Mundaı naýqastarǵa biz «SQ-Farmasııa» kásipornynyń kómegimen qol jetkizip, sol mekemeniń grantymen emdeýge qol jetkizýge tyrysamyz», dedi B.Jámishev.
Bilim alý salasyna jasalatyn kómekter qatarynda turmysy tómen otbasylardyń balalaryna 360 bilim berý granttary qarastyrylǵany aıtyldy. Bul joba aldymyzdaǵy oqý jylynan bastalyp, oǵan 350 mln teńge qarastyrylypty. Sonymen birge aýyl mektepteriniń sapasyn jaqsartýǵa da qarajat bólý qarastyrylatyny aıtyldy.
Qordyń qolǵa alatyn jumysynyń biri – árbir aımaqta bir-birden joǵary dárejede qamtamasyz etiletin tirek mektepterin ashý. Oǵan 250 mln teńgeden qarajat bólý qarastyrylǵan.
Kezdesý barysynda birneshe adam sóılep, qordyń paıdasyn arttyrý jóninde ózderiniń usynys-pikirlerin aıtty. Sonyń ishinde zeınetkerler men ardagerlerge de qor tarapynan kómek kórsetilý usynyldy. B.Jámishev keıbir usynystardy iske asyrýdy qarastyrýǵa bolatynyn jetkizdi.
Soltústik Qazaqstan oblysy
