Mańyzdy qujatqa jumys berýshi tarap pen «Altynalmas AK» AQ jumyskerlerinen saılanǵan ókildik organy, «Kásipqorǵan» taý-ken metallýrgııa kásiporyndary jáne sabaqtas salalar qyzmetkerleriniń ónerkásiptik kásipodaǵy, «Qazprofmetall» salalyq taý-ken metallýrgııa kásipodaǵy atynan jumyskerlerdiń ókilderi qol qoıdy.
Ujymdyq shart kompanııa qyzmetkerleriniń áleýmettik kepildikterin jaqsartýǵa baǵyttalǵan. Shartta qosymsha jáne áleýmettik demalystar, ótemaqylar men yntalandyrý tólemderi, salalyq nagradalarmen marapattalǵandarǵa syıaqy berý múmkindigi qarastyrylǵan. Sonymen birge áleýmettik tólemder, sanıtarlyq-kýrorttyq emdelý múmkindigi sekildi eńbekkerlerge tıimdi jaǵdaılar kózdelip otyr.
– Bizdiń kompanııa aıtarlyqtaı ósip, ujymdyq shartqa qol qoıý arqyly áleýmettik seriktestik ornatýda mańyzdy tabysqa qol jetkizdi. Qujat ázirleý jumysy uzaq ýaqyt zerdelenip, taraptardyń pikirleri eskerildi, basqa kompanııalardyń áleýmettik jeńildikter salasyndaǵy úzdik tájirıbeleri zertteldi. Áleýmettik jeńildikterdiń 80 paıyzy jumys berýshiniń ishki aktisine sáıkes «Altynalmas» qyzmetkerlerine burynnan berilip kelgen. Men ujymdyq shart aıasyndaǵy áleýmettik kepildikterdiń jaqsarýy eńbek qatynastaryn nyǵaıtýǵa oń yqpalyn tıgizetinine jáne ózara tıimdi yntymaqtastyqty yntalandyratynyna senimdimin, – deıdi kompanııanyń personaldy basqarý jónindegi bas atqarýshy dırektory ári Basqarma múshesi Maqpal Núsipova.
«Altynalmas» ujymdyq sharty – saladaǵy úzdik bastamalardyń biri. Kásipodaq ókilderi qujatqa osyndaı joǵary baǵa berip otyr. Sebebi onda áleýmettik seriktestikti damytý men jumysshylar múddesin qorǵaýdy kózdeıtin mańyzdy jaıttar muqııat eskerilgen.
«Kásipqorǵan» kásipodaǵynyń fılıaly – servıstik óndiris kesheniniń tóraǵasy Jibek Omarova: «Ujymdyq shart tarmaqtaryn talqylaý kezinde kóptegen másele boıynsha qyzý pikirtalas órbidi. Biz úshin ymyraǵa kelý jáne barlyq taraptyń múddelerin eskerý asa mańyzdy. Qabyldanǵan ujymdyq shart – ýaqyt pen zańnama talaptaryna saı negizdelgen oń bastama», dep atap ótti.
Jumys ujymdaryndaǵy sabaqtastyq, áleýmettik jaýapkershilik, ınklıýzıvtilik – «Altynalmas» kompanııasy basshylyqqa alatyn ESG kún tártibiniń mańyzdy qaǵıdattary.
Ujymdyq shartta erekshe atap ótýge laıyq mańyzdy aspektilerdiń taǵy biri – saladaǵy áleýmettik áriptestikti damytý boıynsha jumys berýshi men kásipodaqtardyń birlesken kúsh-jigerin arttyrý kózdelgendigi.
