«Ulttyq qaýipsizdik júıesi – memlekettigimizdiń basty tuǵyry. Sondaı-aq, derbes damýymyzdyń myzǵymas tiregi. Otan úshin aıanbaı eńbek etip júrgen azamattardyń arqasynda elimiz ósip-órkendeýde. Sizder ishki jáne syrtqy qaýip-qaterlerge der kezinde toıtarys berip kelesizder. Búginde memlekettiń negizi jáne konstıtýsııalyq qurylymy berik qorǵalǵan. Táýelsizdigimizdiń qundylyqtary birneshe ret eleýli syn-qaterlerge tap keldi. Sizder beıbitshilik pen kelisimdi saqtaý úshin tabandy eńbek ettińizder», dedi Prezıdent.
Memleket basshysy ulttyq qaýipsizdik organdarynyń eki myńynshy jyldary terrorızm men radıkaldy dinı ekstremızmge qarsy kúreske qosqan úlesine toqtaldy. Sondaı-aq Syrtqy barlaý qyzmetiniń ulttyq múddeni qorǵaý jolynda óz mindetin tabysty oryndap kele jatqany jáne Komıtettiń «A» arnaýly qyzmeti men Shekara qyzmetiniń jumystary týraly aıtty.
«Jyl basynan beri Komıtet qyzmetkerleriniń tıimdi jumysynyń arqasynda ekstremıstik áreketterge qatysqan jáne terrorızmdi nasıhattaǵan 42 adam ustaldy. Eki terrolyq aktiniń aldyn aldy. Uıymdasqan qylmysqa qarsy kúres qarqyndy júrgizilýde. Ulttyq qaýipsizdik organdary polısııamen birlesip, birqatar asa qaýipti qylmystyq topty quryqtady, bandıttik uıymdardyń 22 múshesi tutqyndaldy. Nátıjesinde 700-ge jýyq qarý-jaraq, 54 granata, 17 myńnan astam oq-dári tárkilendi. Jarty jyldyń ishinde elimizde 15 esirtki laboratorııasy, 23 halyqaralyq jáne 40 aımaqtyq esirtki kanaldary joıyldy, 3 esirtki plantasııasy áshkerelendi. Sheteldik seriktestermen birlesip, halyqaralyq esirtki tasymalyna qarsy kúres aıasynda 14 halyqaralyq arnaıy operasııa júzege asyryldy», dedi Qasym-Jomart Toqaev.
Memleket basshysynyń sóılegen sózinde keltirilgen derekterge sáıkes Qazaqstan shekarashylary shekara jáne aýmaqtyq sýlar rejımin buzǵan 7 myńnan astam adamdy ustaǵan. Jalpy quny 8 mıllıard teńgeden asatyn valıýta, altyn jáne basqa da taýarlardyń zańsyz tasymalynyń joly kesilgen. Sonymen qatar arnaýly qyzmet elimizdiń aqparattyq qaýipsizdigin senimdi qamtamasyz etýde. Elimizdiń mańyzdy ınfraqurylymdyq nysandaryna jasalǵan 1,5 myń DDoS shabýylyna sátti toıtarys berildi.
«Ulttyq qaýipsizdikti qorǵaý isi kóbinese el nazarynan tys júrgiziledi. Ony kópshilik bile bermeıdi. Degenmen, sizderdiń jumystaryńyzdyń mán-mańyzy aıryqsha. Shynaıy patrıotızm ataq úshin emes, Otan úshin elge adal qyzmet etýden kórinedi. Biz el múddesin qorǵaý jolynda qurban bolǵan qaharmandardy eshqashan umytpaımyz. Olardyń erlik isteri jurtqa jarııalanbaıdy. Biraq esimderi Ulttyq qaýipsizdik qyzmetiniń jylnamasyna altyn árippen jazylady. Komıtet ardagerlerine kóp jylǵy eńbegi úshin zor alǵys aıtamyn», dedi Qasym-Jomart Toqaev.
Prezıdent kúsheıip kele jatqan geosaıası shıelenis, buryn-sońdy bolmaǵan sanksııalyq teketires, gıbrıdti qaqtyǵystardyń taralýy ulttyq qaýipsizdikke jańa syn-qaterler qaýpin tóndiredi dep sanaıdy. Onyń pikirinshe, qarqyndy jahandaný men jappaı tehnologııalyq tóńkeris elder arasyndaǵy shekaranyń ashyq bolýyna ákep soqtyrdy. Memleketterdiń bir-birine táýeldiligi artady jáne mundaı jaǵdaıda Qazaqstannyń aqparattyq jáne áleýmettik-mádenı keńistigine syrtqy kúshterdiń yqpaly kúsheıe túsedi.
«Aldymyzda memlekettik jáne qoǵamdyq ınstıtýttardyń ornyqty ári tıimdi jumys isteýin, azamattardyń qaýipsizdigin qamtamasyz etý mindeti tur. Qańtardaǵy qasiretti kúnderde Komıtettiń birqatar basshylarynyń namyssyzdyǵy men satqyndyǵyna qaramastan, kóptegen ofıserlerimiz óz anttaryna adal bolyp, batyl áreket etti, naǵyz erlik kórsetti. О́zge elderde jýyrda bolǵan aýqymdy qaqtyǵystar turaqtylyq bolmaı, ornyqty damý múmkin emes ekenin taǵy da bir kórsetip berdi. Ulttyq qaýipsizdik – memleketterdiń básekege qabilettiligin arttyrýdyń sheshýshi faktory. Arnaýly qyzmetter jumysynyń tabysty bolýy memleketterdiń ishki saıası turaqtylyǵyna ǵana emes, sondaı-aq olardyń ornyqty ekonomıkalyq damýyna aıtarlyqtaı dárejede baılanysty», dedi Memleket basshysy.
Qasym-Jomart Toqaev elimizdiń Jańa Qazaqstandy qurýǵa kiriskenin, qoǵamnyń barlyq salasynda túbegeıli jańǵyrtýlar júrgizile bastaǵanyn málimdedi. Memleket azamattyq qoǵamdy dáıekti túrde damytyp, demokratııalyq qaǵıdattardy qorǵaıdy. Onyń aıtýynsha, bul – elimizdiń damýy úshin óte mańyzdy qadam. Sondyqtan ádildik jáne zań ústemdigi osy jolda basty baǵdar bolady. Prezıdent mamyr aıynda Ulttyq qaýipsizdik komıtetin reformalaý, ıaǵnı onyń qyzmetin túbegeıli transformasııalaý jáne ulttyq qaýipsizdik júıesin basqarý sapasyn arttyrý jónindegi Jarlyqqa qol qoıǵanyn eske saldy.
«О́zgeristerdiń bárin tabysty júzege asyrý úshin bizge kez kelgen qaýipke tıimdi qarsy tura alatyn zamanaýı arnaýly qyzmet kerek. Ulttyq qaýipsizdik organdary ulttyq múddelerdi qorǵaýda jáne kúsheıip kele jatqan zamanaýı syn-qaterlerge qarsy kúreste aldyńǵy shepte bolady. Sondyqtan analıtıkalyq jáne aqparattyq barlaý jumystaryna basa mán bere otyryp, problemalardy bastapqy satysynda joıý qajet. Qazaqstan jahandyq jáne óńirlik qaýipsizdikti nyǵaıtýǵa baǵyttalǵan teńgerimdi ári syndarly syrtqy saıasat júrgizedi. Sondyqtan elimizdiń odaqtasy jáne strategııalyq seriktesi sanalatyn memlekettermen aradaǵy tabysty yntymaqtastyqty arnaýly qyzmetter salasy boıynsha damytý óte mańyzdy. Qaýipsizdik salasyndaǵy strategııalyq maqsattardy júzege asyrý kezinde azamattar quqyǵynyń taptalýyna jáne elimizde iskerlik klımattyń buzylýyna jol berýge múlde bolmaıdy», dedi Prezıdent.
Memleket basshysynyń pikirinshe, arnaýly organda qyzmet etý, eń aldymen, jan-jaqty, san qyrly bilim ıesi bolýdy, kez kelgen jaǵdaıdy tereń zerttep, salmaqty, parasatty sheshim qabyldaı bilýdi talap etedi.
«Komıtettiń árbir qyzmetkeri óz isine adal jáne naǵyz maman bolýǵa tıis. Qandaı jaǵdaı bolsyn, memleket múddesi bárinen joǵary turýy qajet. Sizderdiń kásibı qabiletterińiz ben jeke adamı qasıetterińizdiń arqasynda el múddesi tıisti deńgeıde qorǵalatyny anyq. Sondaı-aq azamattarymyzdyń bılikke degen senimi artyp, memleketimizdiń bolashaǵy jarqyn bolmaq. Sondyqtan kez kelgen jaǵdaıdy tereń zerttep, salmaqty, parasatty sheshim qabyldaı bilý – óte mańyzdy mindetterińiz», dedi Qasym-Jomart Toqaev.
Jıyn sońynda Prezıdent ulttyq qaýipsizdik organdarynyń birqatar qyzmetkerin memlekettik nagradalarmen marapattady.
