«Memleket basshysy atap ótkendeı, búgingi tańda ana men bala máseleleri boıynsha jedel sheshim qabyldaýdy qajet etetin máseleler bar. Osyǵan oraı, júkti áıelder men balalarǵa keshendi, joǵary mamandandyrylǵan medısınalyq kómek kórsetý úshin biz Nur-Sultan, Qostanaı, Jezqazǵan, Atyraý, Oral, Shymkent qalalarynda, Túrkistan oblysynyń Saryaǵash qalasynda jáne Ordabasy aýdanynda 8 zamanaýı perınataldyq ortalyq salýdy kózdep otyrmyz», dedi mınıstr.
Sondaı-aq ol Úkimettiń keńeıtilgen otyrysynda Prezıdent Qasym-Jomart Toqaevtyń medısınalyq saqtandyrý júıesine aıtqan synynan qandaı qorytyndy shyǵarǵandaryn aıtty.
«Medısınalyq saqtandyrý júıesin jetildirý úshin biz Qazaqstan Respýblıkasynyń Strategııalyq josparlaý jáne reformalar jónindegi agenttigimen birlesip, mindetti áleýmettik medısınalyq saqtandyrý júıesin engizý nátıjelerine taldaý júrgizemiz jáne ony iske asyrýdyń tıimdiligin arttyrý jóninde usynystar engizemiz», dedi Ajar Ǵınııat.
